താന്‍താന്‍ ചെയ്യുന്ന പാപ കര്‍മ്മത്തിന്‍ ഫലം താന്‍താന്‍ തന്നെ അനുഭവിക്കണമെന്നാണ് ചൊല്ല്. അത് ഈ കലിയുഗത്തിലും പ്രാര്‍ത്തികമാകുകയാണ്. അല്ലെങ്കില്‍ ചക്കരയും ഈച്ചയുമായിരുന്ന ശിവശങ്കറിനെ ജി സുധാകരന്‍, കടകംപള്ളി സുരേന്ദ്രന്‍, എകെ ബാലന്‍ തുടങ്ങിയ മന്ത്രിമാരെല്ലാം തള്ളിപ്പറയുമോ. അവസാനമായി ശിവശങ്കറിന്റെ മനസാക്ഷി സൂക്ഷിപ്പുകാരനായ ചാര്‍ട്ടേര്‍ഡ് അക്കൗണ്ടന്റ് വേണുഗോപാല്‍ അയ്യരും തള്ളിപ്പറഞ്ഞു.

സ്വര്‍ണക്കടത്ത് കേസില്‍ നിര്‍ണായകമായി മാറിയ സ്വപ്ന സുരേഷിന്റെ ബാങ്ക് ലോക്കര്‍ സംബന്ധിച്ച് വേണുഗോപാല്‍ അയ്യര്‍ എന്‍ഫോഴ്‌സ്‌മെന്റ് ഡയറക്ടറേറ്റിന് വ്യക്തമായ മൊഴിയാണ് നല്‍കിയിരിക്കുന്നത്. സ്വര്‍ണക്കടത്ത് കേസിലെ രണ്ടാം പ്രതിയായ സ്വപ്‌ന സുരേഷിന്റെ ബാങ്ക് ലോക്കറിലുണ്ടായിരുന്നത് വന്‍ നിക്ഷേപമാണ്. ശിവശങ്കര്‍ പറഞ്ഞിട്ടാണ് താന്‍ ലോക്കര്‍ തുടങ്ങിയതെന്നും ഇടപാട് നടത്തിയതെന്നും പറഞ്ഞതോടെ ശിവശങ്കര്‍ വെട്ടിലായിരിക്കുകയാണ്. ലോക്കറില്‍ കെട്ടുകളായി സൂക്ഷിച്ചിരുന്ന പണം സ്വപ്‌നയുടെയും ശിവശങ്കറിന്റേയും നിര്‍ദ്ദേശ പ്രകാരം പലപ്പോഴായി പലര്‍ക്കും എടുത്തു നല്‍കിതായും അയ്യര്‍ വെളിപ്പെടുത്തി.

അതേസമയം സ്വപ്‌ന സുരേഷിന്റെ ബാങ്ക് ലോക്കറില്‍ കണ്ടെത്തിയ സ്വര്‍ണവും പണവും സ്വര്‍ണക്കടത്തില്‍നിന്നു ലഭിച്ച വരുമാനമാണെന്നും അതില്‍ ശിവശങ്കറിന് പങ്കുമുണ്ടെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് വിലയിരുത്തിയി. ലോക്കറില്‍ കണ്ടെത്തിയ ഒരു കോടി രൂപയ്ക്കും ഒരു കിലോയോളം സ്വര്‍ണത്തിനും അവകാശികളായി ഉന്നതര്‍ വേറെയുമുണ്ടോ എന്ന് അന്വേഷണം തുടരുന്നു.

ശിവശങ്കറിന്റെ ശിപാര്‍ശയിലാണ് ചാര്‍ട്ടേഡ് അക്കൗണ്ടന്റായ വേണുഗോപാല്‍ അയ്യരുടെയും സ്വപ്‌നയുടെയും പേരുകള്‍ ചേര്‍ത്തു 2018ല്‍ ലോക്കറെടുത്തത്. ഒരു വര്‍ഷത്തോളം വേണുഗോപാലാണു ലോക്കര്‍ കൈകാര്യം ചെയ്തത്. അദ്ദേഹം മൂന്നുതവണ ലോക്കര്‍ തുറന്നിട്ടുണ്ട്. ഇക്കാലയളവില്‍ പണവും മറ്റും വച്ചിരുന്നു. 2019 പകുതിയോടെയാണു സ്വപ്‌ന സ്വര്‍ണവും പണവും ലോക്കറില്‍ വച്ചത്.

കണ്ടെടുത്ത സ്വര്‍ണം വിവാഹസമ്മാനമായി ലഭിച്ചതാണെന്നാണു സ്വപ്‌നയുടെ വാദം. ആദ്യവിവാഹം കഴിഞ്ഞിട്ട് 20 വര്‍ഷത്തോളമായി. ഇക്കാലമത്രയും സ്വര്‍ണം എവിടെയാണു സൂക്ഷിച്ചിരുന്നതെന്ന ചോദ്യത്തിനു സ്വപ്‌ന തൃപ്തികരമായ ഉത്തരം നല്‍കിയിട്ടില്ല. കണ്ടെത്തിയ സ്വര്‍ണത്തിനു വര്‍ഷങ്ങളുടെ പഴക്കമില്ലെന്നും ഏറെയും പുതിയ ആഭരണങ്ങളാണെന്നും പരിശോധനയില്‍ വ്യക്തമായി. കള്ളപ്പണമായതിനാലാണ് അക്കൗണ്ടില്‍ നിക്ഷേപിക്കുന്നതിനു പകരം നോട്ടുകെട്ടുകളായി ലോക്കറില്‍ വച്ചതെന്നും വ്യക്തം.

തെറ്റാണെന്ന് അറിഞ്ഞുകൊണ്ടുതന്നെ ശിവശങ്കര്‍ സ്വപ്‌നയുമൊത്തു ലോക്കറെടുപ്പിച്ചതു ഗുരുതരമാണെന്ന് അന്വേഷണോദ്യോഗസ്ഥര്‍ പറഞ്ഞു. ലോക്കറില്‍ എന്താണെന്ന് അറിഞ്ഞിരുന്നില്ലെന്നാണു ശിവശങ്കറിന്റെ മൊഴി. എന്നാല്‍ വന്‍തുക സൂക്ഷിച്ചതു ശിവശങ്കറിന്റെ അറിവോടെയാണെന്ന് ഇ.ഡി. കരുതുന്നു. സ്വപ്‌നയുടെ ഉന്നത ബന്ധങ്ങളെപ്പറ്റി ചാര്‍ട്ടേഡ് അക്കൗണ്ടന്റില്‍നിന്നു വ്യക്തമായ സൂചന ലഭിച്ചിട്ടുണ്ട്. കൂടുതല്‍ വ്യക്തത വരുത്തിയശേഷം ശിവശങ്കറെ വീണ്ടും ചോദ്യംചെയ്യും. ഉത്തരം കൃത്യമല്ലെങ്കില്‍ പ്രതിയാക്കുമെന്നും അറസ്റ്റിലേക്കു കാര്യങ്ങള്‍ നീങ്ങുമെന്നുമാണു റിപ്പോര്‍ട്ട്.

ലോക്കറിലെ പണം ലൈഫ് മിഷന്റെ വടക്കാഞ്ചേരിയിലെ ഫ്‌ളാറ്റ് കരാറുകാര്‍ നല്‍കിയ കമ്മിഷനാണെന്നാണ് സ്വപ്‌ന പറയുന്നത്. കമ്മിഷന്‍ നല്‍കിയെന്നു കരാര്‍ കമ്പനിയുടമ സമ്മതിച്ചിട്ടുണ്ട്. കമ്മിഷന്‍ യു.എ.ഇ. കോണ്‍സുല്‍ ജനറലിനാണു ലഭിച്ചതെന്നും അതദ്ദേഹം തനിക്കു പാരിതോഷികമായി തന്നതാണെന്നുമാണു സ്വപ്‌ന പറയുന്നത്. ഇത് കോണ്‍സുല്‍ ജനറലിനെ പഴിചാരി രക്ഷപ്പെടാനുള്ള തന്ത്രമാണെന്ന് ഇ.ഡി. ഉറപ്പിക്കുന്നു. ലൈഫ് മിഷന്‍ സി.ഇ.ഒ: യു.വി. ജോസിനെ രണ്ടു ദിവസത്തിനകം ചോദ്യംചെയ്യും.

എന്തായാലും മനസാക്ഷി സൂക്ഷിപ്പുകാരനായ വോണുഗോപാല്‍ അയ്യരുടെ മൊഴി ശിവശങ്കറിനെ പൂട്ടാന്‍ പോന്നതാണ്. ഇതുവരേയും ശിവശങ്കര്‍ പിടിച്ച് നിന്നത് തനിക്കൊന്നും അറിയില്ലെന്ന് പറഞ്ഞാണ്. എന്നാല്‍ അയ്യരുടെ മൊഴിയോടെ ശിവശങ്കറിന് പലതിനും ഉത്തരം പറയേണ്ടി വരും. അല്ലെങ്കില്‍ കുടുങ്ങുക തന്നെ ചെയ്യും.