സ്വര്‍ണക്കടത്ത് കേസിന്റെ നിര്‍ണായക ദിവസമാണിന്ന്. സ്വര്‍ണകള്ളക്കടത്ത് കേസുമായി ബന്ധപ്പെട്ട് എന്‍ഫോഴ്‌സ്മന്റ് ഡയറക്ടറേറ്റ് എടുത്ത കേസില്‍ സ്വപ്ന സുരേഷ് നല്‍കിയ ജാമ്യാപേക്ഷയില്‍ എറണാകുളം പ്രിന്‍സിപ്പല്‍ സെഷന്‍സ് കോടതി ഇന്ന് വിധിപറയുകയാണ്. ഹവാല, ബിനാമി ഇടപാടുകള്‍, കള്ളപ്പണം വെളുപ്പിക്കല്‍ എന്നിവയുമായി തനിക്ക് യാതൊരുബന്ധവും ഇല്ലെന്നാണ് സ്വപ്ന സുരേഷ് ജാമ്യ ഹരജിയില്‍ വാദിച്ചത്. ഇതുമായി ബന്ധപ്പെട്ട് തനിക്കെതിരെ ഒരു തെളിവും ഹാജരാക്കാന്‍ എന്‍ഫോഴ്‌സമന്റ് ഡയറക്ടറേറ്റിന് കഴിഞിട്ടില്ല. താന്‍ സമ്പാദിച്ചത് നിയമപരമായാണെന്നും അനധികൃതമായി ഒരു ഇടപാടും നടത്തിയിട്ടില്ലെന്നുമാണ് സ്വപ്ന സുരേഷിന്റെ വാദം. കേസ് നിര്‍ണായ ഘട്ടത്തിലിരിക്കെ സ്വപ്ന സുരേഷിന് ജാമ്യം കിട്ടുന്നത് വലിയ വഴിത്തിരിവാകും. അതിനാല്‍ തന്നെ എല്ലാ കണ്ണുകളും കൊച്ചിയിലേക്കാണ്.

സ്വപ്നയ്ക്ക് ജാമ്യം കിട്ടാതിരിക്കാന്‍ ശക്തമായ നീക്കമാണ് അന്വേഷണ സംഘം നടത്തുന്നത്. പ്രതികള്‍ക്ക് ഈ കേസില്‍ ബന്ധമുണ്ടെന്നതിന് കേസ് ഡയറിയില്‍ മതിയായ തെളിവുകളുണ്ടെന്ന് എന്‍ഫോഴ്മന്റ് ഡയറക്ടറേറ്റ് വാദിച്ചു. സ്വപ്ന സുരേഷിന്റെ പേരിലുള്ള രണ്ട് ബാങ്ക് ലോക്കറിലെ പണം സംബന്ധിച്ച് നിരവധി ദുരൂഹതയുണ്ട്. ലോക്കറില്‍ സൂക്ഷിച്ച പണം സംബന്ധിച്ച് ദുരൂഹത നിലനില്‍ക്കുന്നെന്നും ഉന്നത സ്വാധീനമുള്ള സ്വപ്നക്ക് ഉടന്‍ ജാമ്യം നല്‍കരുതെന്നുമാണ് എന്‍ഫോഴ്മന്റിന്റെ വാദം.

അതേസമയം സ്വര്‍ണക്കടത്തിന് പിന്നാലെ ലൈഫ് മിഷന്‍ പദ്ധതിയിലും സ്വപ്ന സുരേഷിന്റെ ഇടപെടലുകള്‍ ശിവശങ്കറിനെ വീണ്ടും കുരുക്കിലാക്കുകയാണ്. അതിനിടെ ശിവശങ്കറിനെ കുരുക്കുന്ന ചാര്‍ട്ടേഡ് അക്കൗണ്ട് വേണുഗോപാല്‍ അയ്യരുടെ നിര്‍ണായക മൊഴിയും പുറത്ത് വന്നു. സ്വപ്നയെ ഓഫീസില്‍ കൊണ്ടു വന്ന് പരിചയപ്പെടുത്തിയത് ശിവശങ്കറാണെന്നും ഒന്നിച്ച് ലോക്കര്‍ തുടങ്ങാനും നിര്‍ദ്ദേശിച്ചുവെന്നും ചാര്‍ട്ടേഡ് അക്കൗണ്ട് എന്‍ഫോഴ്‌സ്‌മെന്റിന് നല്‍കിയ മൊഴിയില്‍ പറയുന്നു. നേരത്തെ ഒന്നിച്ച് ലോക്കര്‍ തുറക്കാന്‍ ആവശ്യപ്പെട്ടിട്ടില്ലെന്നും സ്വപ്നയെ പരിചയപ്പെടുത്തിയ ശേഷം മടങ്ങിയെന്നുമായിരുന്നു ശിവശങ്കറിന്റെ മൊഴി. എന്നാല്‍ ഈ വാദങ്ങളെ തള്ളുന്നതാണ് ചാര്‍ട്ടേഡ് അക്കൗണ്ടന്റ് വോണുഗോപാല്‍ അയ്യര്‍ നല്‍കിയ മൊഴി.

മണിക്കൂറുകളോളം ഓഫീസില്‍ ശിവശങ്കറിന്റെ സാന്നിധ്യത്തില്‍ സ്വപ്നയുമായി സംസാരിച്ചതായി അയ്യര്‍ പറഞ്ഞു. ചര്‍ച്ചകളില്‍ ശിവശങ്കര്‍ പങ്കാളിയായിരുന്നു. ജോയിന്റ് അക്കൗണ്ടിലേക്ക് ആദ്യം നിക്ഷേപിച്ചത് 30 ലക്ഷമായിരുന്നു. പിന്നീട് പലഘട്ടത്തിലായി സ്വപ്ന തന്നെ ഈ തുക പിന്‍വലിച്ചു. തുടര്‍ന്ന് അക്കൗണ്ട് അവസാനിപ്പിക്കാന്‍ ആവശ്യപ്പെട്ടു. എന്നാല്‍ തന്റ് കുറച്ച് സ്വര്‍ണാഭരണങ്ങള്‍ അക്കൗണ്ടിലുണ്ടെന്നായിരുന്നു സ്വപ്ന അന്ന് പറഞ്ഞത്. അന്വേഷണ ഏജന്‍സികള്‍ ഈ ജോയിന്റ് അക്കൗണ്ടില്‍ നിന്നും 64 ലക്ഷവും സ്വര്‍ണ്ണവുമായിരുന്നു പിടികൂടിയത്. എന്നാല്‍ അക്കൗണ്ടിലുണ്ടായിരുന്ന ബാക്കി തുകയെ കുറിച്ച് അറിയില്ലെന്നുമാണ് അയ്യര്‍ നല്‍കിയ മൊഴി.

അതേസമയം സ്വപ്നയും കൂട്ടരും പിച്ചച്ചട്ടിയില്‍ പോലും കയ്യിട്ടെന്നതിന് തെളിവുകളും കിട്ടി. ജീവകാരുണ്യത്തിന്റെ പേരില്‍ ബാങ്ക് അക്കൗണ്ട് തുടങ്ങി വിദേശത്ത് നിന്ന് കോടികള്‍ എത്തിച്ചുവെന്നാണ് വിവരം. യുഎഇ കോണ്‍സുലേറ്റിന്റെ പേരില്‍ വ്യാജമായി അക്കൗണ്ട് തുടങ്ങി, സ്വപ്നയുടെ നേതൃത്വത്തില്‍ രാജ്യാന്തര സംഘടനകളെ തെറ്റിദ്ധരിപ്പിച്ചാണ് പണമെത്തിച്ചത്. നയതന്ത്ര പരിരക്ഷ ലഭിക്കാനാണ് കോണ്‍സുലേറ്റ് അറിയാതെ ആ പേരില്‍ അക്കൗണ്ട് എടുത്തത്. കോണ്‍സുലേറ്റില്‍ സ്വപ്നയ്ക്ക് ജോലിയുണ്ടായിരുന്ന സമയത്താണ് അക്കൗണ്ട് തുടങ്ങിയത്.

2018 ഒക്ടോബര്‍ മുതല്‍ ഈ അക്കൗണ്ടിലേക്ക് കോടികള്‍ എത്തിയതായാണ് വിവരം. കിട്ടുന്ന തുകയില്‍ കുറച്ചുമാത്രം സന്നദ്ധ സംഘടനകള്‍ക്കു വിതരണം ചെയ്യും. ബാക്കിയുള്ളവ സ്വപ്നയും സംഘവും കൈക്കലാക്കിയെന്നാണു എന്‍ഐഎയ്ക്കും ഇഡിക്കും ലഭിച്ച വിവരം. ഇതിലേക്കും അന്വേഷണം നീളുകയാണ്. എന്തായാലും ഇന്നത്തെ സ്വപ്നയുടെ ജാമ്യാപേക്ഷയിലാണ് എല്ലാം എല്ലാമിരിക്കുന്നത്. കാത്തിരിക്കാം.