പള്ളിപ്പുറം, കുറക്കോട് കാറും ലോറിയും കൂട്ടിയിടിച്ച് മൂന്ന് പേര്‍ക്ക് പരിക്കേറ്റു. ഇന്നലെ രാവിലെയായിരുന്നു അപകടം. തിരുവനന്തപുരത്തുനിന്നു കൊല്ലത്തേക്കു പോവുകയായിരുന്ന കാറും എതിരെ വന്ന മീന്‍ ലോറിയും കൂട്ടി ഇടിച്ചതിന് ശേഷം അതുവഴി പോയ മറ്റൊരു ലോറിയിലും ബൈക്കിലും ഇടിക്കുകയായിരുന്നു.

കാറിലുണ്ടായിരുന്ന കൊല്ലം സ്വദേശികളായ അനില്‍കുമാര്‍, ഭാര്യ സിനി എന്നിവര്‍ക്കും ബൈക്ക് യാത്രക്കാരനുമാണ് പരിക്കേറ്റത്. കാറിലുണ്ടായിരുന്ന രണ്ടു പേരുടെ നില ഗുരുതരമെന്ന് മംഗലപുരം പൊലീസ് പറഞ്ഞു. പരിക്കേറ്റവരെ ആദ്യം മെഡിക്കല്‍ കോളേജ് ആശുപത്രിയിലും പിന്നീട് സ്വകാര്യ ആശുപത്രിയിലും പ്രവേശിപ്പിച്ചു. തിരുവനന്തപുരത്തെ ബന്ധുവീട്ടില്‍ പോയി മടങ്ങവെയാണ് കാര്‍ അപകടത്തില്‍പ്പെട്ടത്.
മറ്റൊരു വാഹനത്തെ മറികടന്ന് വന്ന മീന്‍ ലോറി കാറില്‍ ഇടിക്കുകയായിരുന്നു. ഇടിയുടെ ആഘാതത്തില്‍ പിന്നിലേക്ക് പോയ കാറില്‍ പുറകില്‍ നിന്നെത്തിയ മറ്റൊരു ലോറിയും ഇടിച്ചു. തുടര്‍ന്ന് കാര്‍ റോഡ് വശത്തെ കുഴിയിലേക്ക് മറിഞ്ഞു.

അപകടത്തില്‍ കാര്‍ പൂര്‍ണ്ണമായും തകര്‍ന്നു. കഴക്കൂട്ടത്ത് നിന്നെത്തിയ അഗ്നിശമന സേനയും നാട്ടുകാരും പൊലീസും ചേര്‍ന്ന് കാര്‍ വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്. മംഗലപുരം പൊലീസ് കേസ് രജിസ്റ്റര്‍ ചെയ്തു.