കോവിഡ്​ വ്യാപന പശ്ചാത്തലം നിലനിൽക്കെ ചട്ടങ്ങൾ കാറ്റിൽപറത്തി സിറ്റി പൊലീസിലെ ഉന്നത ഉ​ദ്യോഗസ്​ഥൻ അമ്പതോളം സഹപ്രവർത്തകർക്ക്​ വിരുന്നൊരുക്കിയത്​ വിവാദത്തിലെത്തിയിരിക്കുകയാണ്. ഒരു അസി. കമീഷണറാണ്​ ഗൃഹപ്രവേശനത്തോടനുബന്ധിച്ച്​ ഉന്നത പൊലീസുദ്യോഗസ്​ഥർക്കായി ആഗസ്​റ്റ്​ 13ന്​ വൈകീട്ട്​ പൊലീസ്​ ക്ലബിൽ വിരുന്നൊരുക്കിയതാണ് പ്രശനങ്ങൾക്ക് വഴിയൊരുക്കിയത്​.

നഗരത്തിലെ ഒരു അസി. കമീഷണറും സിറ്റി പൊലീസ്​ മേധാവിയും ഒഴികെയുള്ള മുഴുവൻ ഉന്നത ഉദ്യോഗസ്​ഥരും വിരുന്നിൽ പങ്കെടുത്തതായാണ്​ വിവരം. ​ഇൻറലിജൻസ്​ എസ്​.പി, നടക്കാവ്​, മെഡിക്കൽ കോളജ്​ സി.ഐമാരും പല സ്​റ്റേഷൻ ഹൗസ്​ ഓഫിസർമാരും പങ്കെടുത്തു.

അടുത്തദിവസം നടത്തിയ ​ആൻറിബോഡി പരിശോധനയിൽ വിരുന്നൊരുക്കിയ അസി. കമീഷണർ പോസിറ്റിവായി. ഇതോടെയാണ്​ ഉന്നത ഉദ്യോഗസ്​ഥർ മിക്കവരും ക്വാറൻറീനിലായത്​. ചിലർ വീടുകളിൽനിന്ന്​ ജോലി ചെയ്യുന്നുണ്ട്​.

സംഭവം രഹസ്യാന്വേഷണ വിഭാഗം റിപ്പോർട്ടായി നൽകിയില്ലെങ്കിലും വിരുന്നിനെ പൊലീസിന്റെ 'ഔദ്യോഗിക യോഗമാക്കി' മാറ്റി മുകളിലേക്ക്​​ അറിയിച്ചിട്ടുണ്ട്​. യോഗത്തിൽ പങ്കെടുത്ത ഒരു ഉദ്യോഗസ്​ഥന്​ പോസിറ്റിവായതിനാൽ എല്ലാവരും ക്വാറൻറീനിലാണ്​ എന്നാണ്​ അറിയിച്ചത്​. പൊലീസുദ്യോഗസ്​ഥരുടെ സമ്പർക്കപ്പട്ടിക തയാറാക്കുന്നതുമായി ബന്ധപ്പെട്ട്​ ആരോഗ്യവകുപ്പിനെ അറിയിച്ചപ്പോഴും വിരുന്നിനെ ഔദ്യോഗിക യോഗമായാണ്​ ചിത്രീകരിച്ചത്​.

ജില്ലയിലെ പൊലീസുകാർക്കിടയിൽ കോവിഡ്​ വ്യാപനത്തിന്​ ഉന്നത ഉദ്യോഗസ്​ഥർക്കുണ്ടായ പാളിച്ചയും കാരണമായെന്ന​​ ആക്ഷേപം നിലനിൽക്കെ​ ഉദ്യോഗസ്​ഥന്റെ 'വിരുന്നും' സേനയിൽ ചർച്ചയായിട്ടുണ്ട്. കോവിഡ്​ പ്രോട്ടോകോൾ ലംഘനത്തിന്റെ പേരിൽ ദിവസേന നിരവധി​ പേർക്കെതിരെ കേസെടുക്കുന്ന പൊലീസ്​ മറ്റുള്ളവർക്ക്​ മാതൃകയാവണമെന്നിരിക്കെ ഗുരുതര അച്ചടക്ക ലംഘനമാണുണ്ടായതെന്നാണ്​ പരാതി. പകുതി പേർക്ക്​ ജോലി -പകുതി പേർക്ക്​ വിശ്രമം, അമ്പതുകഴിഞ്ഞവർക്ക്​ ഫീൽഡ്​ ഡ്യൂട്ടി നൽകരുത്​ ഉൾപ്പെടെ ഡി.ജി.പിയുടെ ഉത്തരവുകൾ കാര്യക്ഷമമായി നടപ്പാക്കാത്തതും പ്രതിഷേധത്തിനിടയാക്കിയിട്ടുണ്ട്​.

വിജിലന്‍സ് ആന്‍ഡ് ആൻറി കറപ്ഷന്‍ ബ്യൂറോ, റൂറൽ എസ്​.പി ഓഫിസ്​, തിരുവമ്പാടി, താമരശ്ശേരി, ബേപ്പൂർ, എലത്തൂർ സ്​റ്റേഷനുകൾ എന്നിവിടങ്ങളിലെ ഉദ്യോഗസ്​ഥർക്കാണ്​ ഇതിനകം പോസിറ്റിവായത്​. റൂറൽ എസ്​.പി ഓഫിസിലെ ഹെഡ്​ ക്ലാർക്ക്​ കോവിഡ്​ ബാധിച്ച്​ മരിക്കുകയും ചെയ്​തു.