കോഴിക്കോട് ഫറോക്കിലെ അഞ്ച് കടകളിൽ മോഷണം. വ്യാഴാഴ്ച രാവിലെ കട തുറക്കാൻ എത്തിയപ്പോഴാണ് മോഷണവിവരം കടയുടമകൾ അറിയുന്നത്‌. റെയിൽവേ സ്‌റ്റേഷനു സമീപത്തെ സൈനുദ്ദീന്റെ ഉടമസ്ഥതയിലുള്ള എൻ.എസ്. ചിക്കൻ സ്​റ്റാളിന്റെ പൂട്ട് തകർത്ത് മേശയിൽ സൂക്ഷിച്ച മൂവായിരം രൂപ, സ്കൂളിനു സമീപത്തെ ഡോൾഫിൻ ബുക്​സ്​റ്റാളിന്റെ ഷട്ടർ തകർത്ത് ബുക്​സ്​റ്റാളിലെ 1500 രൂപ എന്നിവ മോഷ്​ടിച്ചു.

ഫറോക്കിലെ താഴെ സ്കൂൾ റോഡിലെ ഹുസൈന്റെ ഉടമസ്ഥതയിലുള്ള പച്ചക്കറിക്കടയിൽ കയറി സാധനങ്ങൾ വാരിവലിച്ചിട്ട നിലയിലാണ്. സമീപത്തെ പറക്കോട്ട് സ്​റ്റാർസ് പാത്രക്കടയുടെ ഷട്ടറിന്റെ പൂട്ട്​ മോഷ്​ടാക്കൾ അടിച്ചുതകർത്തു. സമീപത്തെ ബഷീറിന്റെ ഉടമസ്​ഥതയിലുള്ള ധാന്യം പൊടിക്കുന്ന മില്ലിലും മോഷണം നടന്നു. ഫറോക്ക് പൊലീസെത്തി കടകൾ പരിശോധിച്ചു. കോവിഡ് ഭീഷണിയുള്ളതിനാൽ കടകൾ നേരത്തേ അടക്കുന്നതും വൈകീട്ടോടെ അങ്ങാടികൾ വിജനമാകുന്നതും മോഷ്​ടാക്കൾക്ക് അനുഗ്രഹമായിരിക്കുകയാണ്.