വനം വകുപ്പിന്റെ കസ്റ്റഡിയിലിരിക്കെ മരിച്ച പത്തനംതിട്ട കുടപ്പന സ്വദേശി മത്തായിയുടെ മൃതദേഹം സംസ്‌കരിക്കാന്‍ ഇനിയും വൈകിയേക്കും. റീ പോസ്റ്റുമോര്‍ട്ടം വേണ്ടി വന്നേക്കുമെന്ന് സിബിഐ അറിയിച്ചു. ഇക്കാര്യം മത്തായിയുടെ കുടുംബത്തെ അറിയിച്ചിട്ടുണ്ട്. മത്തായിയുടെ ഭാര്യ ഷീബയെ സിബിഐ തിരുവനന്തപുരത്തേക്ക് വിളിപ്പിച്ച് വിവരങ്ങള്‍ ശേഖരിച്ചിട്ടുണ്ട്. കഴിഞ്ഞ ദിവസം മത്തായിയുടെ മരണത്തില്‍ സിബിഐ അന്വേഷണത്തിന് ഉത്തരവിട്ടിരുന്നു. മൃതദേഹം സംസ്‌കരിക്കാന്‍ നടപടി വേണമെന്നും മത്തായിയുടെ ഭാര്യയോട് ഹൈക്കോടതി പറഞ്ഞു.

എന്നാല്‍ മൃതദേഹം റീപോസ്റ്റുമോര്‍ട്ടം ചെയ്യേണ്ടി വരുമെന്നാണ് സിബിഐ പറയുന്നത്. ക്രൈംബ്രാഞ്ചിന്റെ അന്വേഷണം പുരോഗമിക്കുന്നതിനിടെയാണ് സിബിഐ അന്വേഷണത്തിന് കോടതി അനുമതി നല്‍കുന്നത്. സി.ബി.ഐ. എസ്.പി നന്ദകുമാര്‍ നായര്‍, ഡി.വൈ.എസ്.പി. ടി.പി അനന്ദകൃഷ്ണന്‍ എന്നിവരടങ്ങുന്ന സംഘമാണ് മത്തായിയുടെ മരണം അന്വേഷിക്കുന്നത്.പോലീസ് അന്വേഷണത്തിന്റ തുടര്‍ച്ച ആയിട്ടല്ല, പകരം തുടക്കം മുതലാകും സി ബി.ഐ കേസ് അന്വേഷിക്കുക. ഉടന്‍ അന്വേഷണം ആരംഭിക്കും.

സി.ബി.ഐ അന്വേഷണം വന്നതോടെ വിവിധ രാഷ്ട്രീയ പാര്‍ട്ടികള്‍ നടത്തി വന്ന പ്രതിഷേധം അവസാനിപ്പിച്ചിരുന്നു. നേരത്തെ കേസ് അന്വേഷിച്ച പൊലീസ് ഹൈക്കോടതിയില്‍ റിപ്പോര്‍ട്ടിന് പുറമെ സീല്‍ വച്ച കവറിലും വിശദാംശങ്ങള്‍ നല്‍കിയിരുന്നു.