തൃശൂര്‍ ജൂവലറി കവര്‍ച്ച... തുരപ്പനെ തേടി പോലീസ്... ജൂവലറിയില്‍ ഒരുതരി സ്വര്‍ണം പോലും ഇല്ലായിരുന്നതായി സ്ഥിരീകരിച്ചതോടെ ജൂവലറിയുടെ ഭിത്തി തുരന്നതാരെന്ന് കണ്ടെത്താനൊരുങ്ങി പോലീസ്
തൃശൂര്‍ ജൂവലറി കവര്‍ച്ച... തുരപ്പനെ തേടി പോലീസ്... ജൂവലറിയില്‍ ഒരുതരി സ്വര്‍ണം പോലും ഇല്ലായിരുന്നതായി സ്ഥിരീകരിച്ചതോടെ ജൂവലറിയുടെ ഭിത്തി തുരന്നതാരെന്ന് കണ്ടെത്താനൊരുങ്ങി പോലീസ്. കയ്പമംഗലം മൂന്നൂപീടിക സെന്ററിലെ ജൂവലറി കവര്‍ച്ചയില്‍ അന്വേഷണം പുതിയ ഘട്ടത്തിലേക്ക്. ജൂവലറിയില്‍ ഒരുതരി സ്വര്‍ണം പോലും ഇല്ലായിരുന്നതായി സ്ഥിരീകരിച്ചതോടെയാണ് ജൂവലറിയുടെ ഭിത്തി തുരന്നതാരെന്ന് കണ്ടെത്താന്‍ അന്വേഷണം തുടരുന്നത്.
സ്വര്‍ണം മോഷണം പോയെന്ന പരാതി തെറ്റാണെന്ന് ജൂവലറി ഉടമ സമ്മതിച്ചെങ്കിലും ഭിത്തി തുരന്ന് ആരോ അകത്തുകയറിയെന്ന വാദത്തില്‍ ഇയാള്‍ ഉറച്ചുനില്‍ക്കുകയാണ്. വെള്ളിയാഴ്ചയാണ് മൂന്നുപീടിക സെന്ററിലെ ഗോള്‍ഡ് ഹാര്‍ട്ട് ജൂവലറിയില്‍ മോഷണം നടന്നുവെന്ന വാര്‍ത്ത പുറത്തുവരുന്നത്.
ജൂവലറിയുടെ ഭിത്തി തുരന്ന് മൂന്നേകാല്‍ കിലോ സ്വര്‍ണം മോഷ്ടിച്ചെന്നായിരുന്നു ഉടമയുടെ പരാതി. തെളിവ് നശിപ്പിക്കാന്‍ ജൂവലറിയ്ക്കുള്ളില്‍ മുളകുപൊടിയും വിതറിയിരുന്നു. ഭൂമിക്കടിയിലെ രഹസ്യഅറ തുറന്ന് സ്വര്‍ണം മോഷ്ടിച്ചെന്നായിരുന്നു ജൂവലറി ഉടമയുടെ വാദം.
എന്നാല്‍ പോലീസ് സംഘം നടത്തിയ വിശദമായ പരിശോധനയില്‍ ഇത് വ്യാജമാണെന്ന് കണ്ടെത്തി. മാത്രമല്ല, ജൂവലറിക്ക് അകത്ത് മുളകുപൊടി വിതറിയ രീതിയും സംശയത്തിനിടയാക്കി. തുടര്‍ന്ന് ഉടമയെയും ജീവനക്കാരെയും വിശദമായി ചോദ്യംചെയ്തതോടെയാണ് സ്വര്‍ണം മോഷണം പോയെന്ന പരാതി വ്യാജമാണെന്ന് തെളിഞ്ഞത്. ആറ് മാസമായി കച്ചവടമില്ലാതിരുന്ന ജൂവലറിയില്‍നിന്ന് ഇത്രയധികം സ്വര്‍ണം നഷ്ടപ്പെട്ടെന്ന പരാതി തുടക്കം മുതലേ സംശയത്തിനിടയാക്കിയിരുന്നു.
ജൂവലറിയിലെ മേശപ്പുറത്തുണ്ടായിരുന്ന ആഭരണങ്ങള്‍ സ്വര്‍ണമായിരുന്നില്ല എന്നതും നിര്‍ണായക കണ്ടെത്തലായി. അതിനിടെ, ജൂവലറി ഉടമയുടെ മറ്റുചില ഇടപാടുകളെക്കുറിച്ചും സംശയങ്ങള്‍ ഉയര്‍ന്നിട്ടുണ്ട്. നിരവധിയാളുകളില്‍ നിന്നും പണം നിക്ഷേപമായി സ്വീകരിച്ച് കെട്ടിടനിര്‍മാണം അടക്കമുള്ള ബിസിനസുകള്‍ ഇയാള്‍ നടത്തിയിരുന്നു. എന്നാല്‍ എല്ലാ ബിസിനസുകളും പൊളിഞ്ഞതോടെ കനത്ത സാമ്പത്തിക നഷ്ടമുണ്ടായി. ഇതിനിടെ, ജൂവലറിയില്‍ ആറ് കിലോ സ്വര്‍ണം സ്റ്റോക്കുണ്ടെന്ന് കാണിച്ച് ഉടമ ബാങ്കില്‍നിന്ന് വന്‍തുക വായ്പയും എടുത്തിട്ടുണ്ട്. ഈ വായ്പയ്ക്ക് ഇന്‍ഷുറന്‍സ് പരിരക്ഷയുള്ളതിനാല്‍ ഉടമ തന്നെ ആസൂത്രണം ചെയ്ത മോഷണക്കഥയാണെന്നാണ് പോലീസ് ഇപ്പോഴും വിശ്വസിക്കുന്നത്.
എന്തായാലും ഭിത്തി തുരന്നതാരാണെന്ന് കണ്ടെത്തിയാല്‍ വ്യാജ മോഷണക്കഥയ്ക്ക് പരിസമാപ്തിയാകുമെന്നാണ് പോലീസ് പ്രതീക്ഷിക്കുന്നത്. എന്നാല്‍ ഭിത്തി തുരന്ന സംഭവത്തില്‍ പരാതിക്കാരന്‍ ഉറച്ചുനില്‍ക്കുന്നതിനാല്‍ ഇക്കാര്യം തെളിയിക്കാന്‍ വിശദമായ അന്വേഷണം വേണമെന്നാണ് പോലീസ് നല്‍കുന്ന സൂചന.
https://www.facebook.com/Malayalivartha
