16 വര്‍ഷം മുന്‍പ് യുവതിയെ കൊലപ്പെടുത്തിയ കേസില്‍ അറസ്റ്റിലായ ശേഷം ജാമ്യത്തിലിറങ്ങി മുങ്ങിയ ഒന്നാം പ്രതി മുഹമ്മദ് സാദിഖിനെ സൗദിയിലെ ദവാദ്മയില്‍ മരിച്ച നിലയില്‍ കണ്ടെത്തിയതായി പൊലീസിനു വിവരം ലഭിച്ചു. കൊല്ലം അയത്തില്‍ അഷ്‌റഫ് എന്ന വ്യാജ മേല്‍വിലാസത്തിലാണ് ഇയാള്‍ സൗദിയില്‍ ജോലി നോക്കിയിരുന്നത് എന്നു പൊലീസിനു വിവരം ലഭിച്ചിരുന്നു.

തൊടുപുഴ കരിങ്കുന്നം തട്ടാരത്തട്ട വാഴേപറമ്പില്‍ സിജിയെ(24) വിവാഹവാഗ്ദാനം നല്‍കി കൂട്ടിക്കൊണ്ടു പോയി കൊലപ്പെടുത്തിയ കേസിലെ പ്രതിയായ കോട്ടയം ആര്‍പ്പൂക്കര പനമ്പാലം കദളിക്കാലായില്‍ മുഹമ്മദ് സാദിഖ് (സലിം) 16 വര്‍ഷമായി ഒളിവില്‍ കഴിയുകയായിരുന്നു.

അമ്മയുടെ ചികിത്സയുമായി ബന്ധപ്പെട്ട് കോട്ടയം മെഡിക്കല്‍ കോളജില്‍ എത്തിയ സിജിയെ പരിചയപ്പെട്ട മുഹമ്മദ് സാദിഖ്, ഭര്‍ത്താവ് ഗള്‍ഫിലായിരുന്ന യുവതിക്ക് വിവാഹവാഗ്ദാനം നല്‍കിയതായി പൊലീസ് പറയുന്നു. തുടര്‍ന്ന് 2004 ജൂലൈ 29-ന് റജിസ്റ്റര്‍ വിവാഹത്തിന് എന്ന വ്യാജേന 3 സുഹൃത്തുക്കളുമായി ചേര്‍ന്ന് നേര്യമംഗലം വനമേഖയിലെ ചീയപ്പാറയില്‍ എത്തിച്ചു. രാത്രി പതിനൊന്നോടെ കഴുത്തറുത്തു കൊലപ്പെടുത്തി പതിനഞ്ചര പവന്‍ ആഭരണങ്ങളും 16,000 രൂപയും തട്ടിയെടുത്ത സംഘം മൃതദേഹം കൊക്കയില്‍ ഉപേക്ഷിച്ചു മുങ്ങിയെന്നാണു കേസ്.

പ്രത്യേക അന്വേഷണ സംഘം അന്ന് അടിമാലി സിഐ ആയിരുന്ന എം.എ. ജോര്‍ജിന്റെ നേതൃത്വത്തില്‍ ഒരു മാസത്തിനുള്ളില്‍ നാല്‍വര്‍ സംഘത്തെ അറസ്റ്റ് ചെയ്തു. പിന്നീട് ജാമ്യത്തിലിറങ്ങിയ ഒന്നാം പ്രതി മുഹമ്മദ് സാദിഖ് കൊല്ലത്തെ ഭാര്യ വീട്ടിലേക്കു മുങ്ങുകയായിരുന്നുവെന്നും അവിടെ നിന്ന് വ്യാജ മേല്‍വിലാസത്തില്‍ പാസ്‌പോര്‍ട്ടും വീസയും സംഘടിപ്പിച്ച് സൗദിക്കു കടന്നതായും പൊലീസ് പറയുന്നു. ഇയാളെ ഒഴിവാക്കി നടന്ന കേസിന്റെ വിചാരണയില്‍ രണ്ടാം പ്രതിയെ ജീവപര്യന്തം തടവിനു ശിക്ഷിച്ചിരുന്നു.

ഈയിടെ അടിമാലി എസ്എച്ച്ഒ അനില്‍ ജോര്‍ജിന്റെ നിര്‍ദേശ പ്രകാരം അടിമാലി വെള്ളത്തൂവല്‍ പൊലീസ് സ്റ്റേഷനില്‍ നിന്നുള്ള എസ്‌ഐമാരായ എസ്. ശിവലാല്‍, സജി എന്‍. പോള്‍, സി.ആര്‍.സന്തോഷ് എന്നിവരുടെ നേതൃത്വത്തില്‍ പൊലീസ് സംഘം കൊല്ലത്ത് എത്തി അന്വേഷണം നടത്തിയിരുന്നു.