ടിനി ടോമിനെതിരെ പരിഹാസവുമായി എം.എ നിഷാദ്
വ്യക്തിയധിക്ഷേപം നടത്തിയെന്ന നടി അന്സിബ ഹസന്റെ പരാതിയില് ടിനി ടോമിനെതിരെ കേസെടുക്കാന് കോടതി നിര്ദേശിച്ചതിന് പിന്നാലെ നടനെതിരെ പരിഹാസവുമായി സംവിധായകന് എം.എ. നിഷാദ്. ടിനി ടോമിന്റെ പേര് പറയാതെ, 'ഠീം ഠോം' എന്ന് അഭിസംബോധന ചെയ്താണ് നിഷാദിന്റെ കുറിപ്പ്. കോടതിയില് മജിസ്ട്രേറ്റിനെ അനുകരിക്കാന് ശ്രമിക്കരുതെന്ന ഉപദേശമാണ് നിഷാദ് പരിഹാസരൂപേണ ടിനിക്ക് നല്കിയത്.
കോടതി നിര്ദേശത്തെക്കുറിച്ചുള്ള വാര്ത്താ കാര്ഡ് പങ്കുവെച്ചായിരുന്നു നിഷാദിന്റെ പരിഹാസം. 'എത്രയും ബഹുമാനപ്പെട്ട ഠീം ഠോം അറിയാന്. താങ്കള്ക്ക് കോടതിസന്ദര്ശനഭാഗ്യം സിദ്ധിച്ചതായി അറിയുന്നു. ഈ സവിശേഷസാഹചര്യത്തില് ഒരുപദേശമെന്നോണം ഒരൂട്ടം കോടതീല് ചെന്നിട്ട് മൈസ്രേട്ടിനെ അനുകരിക്കാന് നില്ക്കരുത്', നിഷാദ് കുറിച്ചു.
'കോട്ടും കുപ്പായോം കറുപ്പുമൊക്കെ കാണുമ്പോള് അങ്ങയുടെ ഉള്ളില് അനുകരണത്വരയുണരുമെന്നറിയാം. ആപത്താണെന്ന് മാത്രമല്ല, കോടതിയലക്ഷ്യം കൂടാതെ കൊട്ടുവടിയാല് പിടലിയില് താഡനമേല്ക്കാനും യോഗം കാണുന്നുണ്ട്. ആയതിനാല് നീതിപീഠത്തെ പീഡിപ്പിക്കാനുള്ള നടപടികളില്നിന്ന് താങ്കള് ഒഴിഞ്ഞുനില്ക്കുമെന്ന് വിശ്വസിക്കട്ടെ മൂന്നു പടങ്ങളില് അങ്ങയെ അഭിനയിപ്പിക്കാന് ഭാഗ്യമുണ്ടായൊരു സംവിധായകന്', സംവിധായകന് കൂട്ടിച്ചേര്ത്തു.
ടിനി ടോം വ്യക്തിയധിക്ഷേപം നടത്തിയെന്ന് ആരോപിച്ച് അന്സിബ ഹസന് പോലീസില് പരാതി നല്കിയിരുന്നു. പരാതിയില് പ്രാഥമികാന്വേഷണം നടത്തിയ പോലീസ് കേസെടുക്കാന് കഴിയില്ലെന്ന നിഗമനത്തില് എത്തിച്ചേരുകയായിരുന്നു. എന്നാല് ടിനി ടോമിനെതിരെ കേസെടുത്ത് അന്വേഷണം നടത്തണമെന്ന ആവശ്യവുമായി അന്സിബ കോടതിയെ സമീപിച്ചു. അന്സിബയുടെ ആവശ്യം അനുവദിച്ച കോടതി, ടിനിക്കെതിരെ കേസെടുക്കാന് നിര്ദേശിക്കുകയായിരുന്നു.
https://www.facebook.com/Malayalivartha
