ഇത്രയും വേദന മറ്റൊരാള്‍ക്കും ഉണ്ടാകില്ല. അതാണ് പാലായില്‍ ജോസ് കെ. മാണിയുടെ അവസ്ഥ. സ്വന്തം പിതാവ് വളര്‍ത്തി വലുതാക്കിയ പാര്‍ട്ടിയില്‍ സംരക്ഷണം നല്‍കിയവര്‍ തന്നെ തിരിച്ച് കൊത്തുകയാണ്. എന്തിന് അര്‍ഹതപ്പെട്ട പാല സീറ്റില്‍ രണ്ടില ചിഹ്നം പോലും നല്‍കാന്‍ പിജെ ജോസഫ് തയ്യാറായില്ല. മാത്രമല്ല കേരള കോണ്‍ഗ്രസിന്റെ ഔദ്യോഗിക സ്ഥാനാര്‍ത്ഥിയെ ജോസഫ് തോല്‍പ്പിക്കുകയും ചെയ്തു. അതിന് പിന്നാലെ ജോസഫ് കളിച്ച കളിയില്‍ യുഡിഎഫും വീണതോടെ കേരള കോണ്‍ഗ്രസ് ജോസ് മാണി ഗ്രൂപ്പിനെ യുഡിഎഫില്‍ നിന്നും പുറത്താക്കി. എന്നാല്‍ ധീരമായ നിലപാടോടെ നിന്ന ജോസ് കെ. മാണിക്ക് പഴയ പ്രതാപം തിരിച്ച് കിട്ടുന്നതാണ് കേന്ദ്ര തെരഞ്ഞെടുപ്പ് കമ്മീഷന്റെ വിധി.

കേരള കോണ്‍ഗ്രസിന്റെ തെരഞ്ഞെടുപ്പ് ചിഹ്നമായ രണ്ടില ജോസ് കെ മാണി വിഭാഗത്തിന് തന്നെ നല്‍കിയിരിക്കുകയാണ്. കേന്ദ്ര തിരഞ്ഞെടുപ്പ് കമ്മീഷനാണ് ചിഹ്നതര്‍ക്കത്തില്‍ അന്തിമ വിധി പുറപ്പെടുവിച്ചത്. പാര്‍ട്ടിയുടെ പേര് ജോസ് വിഭാഗത്തിന് ഉപയോഗിക്കാമെന്നും കമ്മീഷന്‍ വ്യക്തമാക്കി.

തിരഞ്ഞെടുപ്പ് കമ്മീഷനിലെ മൂന്നംഗങ്ങളില്‍ രണ്ടുപേരാണ് ചിഹ്നം ജോസ് വിഭാഗത്തിന് നല്‍കുന്നതിനെ അനുകൂലിച്ചത്. ഒരംഗം ഈ തീരുമാനത്തെ എതിര്‍ത്തു. എന്നാല്‍ ഭൂരിപക്ഷ തീരുമാനം ജോസ് വിഭാഗത്തിന് അനുകൂലമായതിനാല്‍ ചിഹ്നം അവര്‍ക്ക് നല്‍കി ഉത്തരവിറക്കുകയായിരുന്നു.

ആത്യന്തികമായി സത്യം വിജയിക്കുമെന്ന് തെളിയിക്കുന്നതാണ് കേന്ദ്ര തിരഞ്ഞെടുപ്പ് കമ്മീഷന്റെ വിധിയെന്ന് ജോസ് കെ. മാണി പ്രതികരിച്ചു. കേരള കോണ്‍ഗ്രസ് പ്രവര്‍ത്തകരുടെ ആത്മാഭിമാനം ഉയര്‍ത്തിപ്പിടിക്കുന്ന വിധിയാണിത്. കെ.എം. മാണി ഉയര്‍ത്തിപ്പിടിച്ച രാഷ്ട്രീയത്തെ ഇല്ലാതാക്കാന്‍ ശ്രമിച്ചവര്‍ക്കുള്ള തിരിച്ചടി കൂടിയാണ് ഈ വിധിയെന്നും അദ്ദേഹം പറഞ്ഞു. അതേസമയം, കമ്മീഷനിലെ ഒരംഗം തീരുമാനത്തെ എതിര്‍ത്ത സാഹചര്യത്തില്‍ അപ്പീല്‍ നല്‍കുമെന്ന് പി.ജെ. ജോസഫ് പ്രതികരിച്ചു.

രണ്ടില ചിഹ്നം ലഭിച്ചത് ജോസ് കെ.മാണിക്ക് വലിയ നേട്ടമായി മാറുമെന്നാണ് വിലയിരുത്തല്‍. കെ.എം. മാണിയുടെ വിയോഗത്തിന് പിന്നാലെയാണ് കേരള കോണ്‍ഗ്രസില്‍ ജോസ്‌ജോസഫ് വിഭാഗങ്ങള്‍ തമ്മില്‍ തര്‍ക്കങ്ങള്‍ ഉടലെടുത്തത്. ഇത് പിന്നീട് തിരഞ്ഞെടുപ്പ് ചിഹ്നത്തിലേക്കും നീണ്ടു. ചിഹ്നം സംബന്ധിച്ച തര്‍ക്കത്തെ തുടര്‍ന്ന് പാലാ ഉപതിരഞ്ഞെടുപ്പില്‍ കേരള കോണ്‍ഗ്രസ് സ്ഥാനാര്‍ഥി ജോസ് ടോം, 'കൈതച്ചക്ക' ചിഹ്നത്തിലാണ് മത്സരിച്ചത്.

രണ്ടില ചിഹ്നം കേരള കോണ്‍ഗ്രസ് (എം) ജോസ് കെ മാണി വിഭാഗത്തിന് അനുവദിച്ചതായുള്ള കേന്ദ്ര തിരഞ്ഞെടുപ്പ് കമ്മീഷന്റെ തീരുമാനത്തില്‍ അതീവ സന്തോഷവാന്‍മാരാണ് ജോസ് വിഭാഗം. ഓരോ കേരളാ കോണ്‍ഗ്രസ് പ്രവര്‍ത്തകന്റെയും ആത്മാഭിമാനം ഉയര്‍ത്തിപ്പിടിക്കുന്ന വിധിയാണെന്നാണ് ജോസ് കെ.മാണി അഭിപ്രായപ്പെട്ടത്.

ജോസഫ് ജോസ് വിഭാഗങ്ങള്‍ നല്‍കിയ പരാതിയിന്‍മേലാണ് കേന്ദ്ര തിരഞ്ഞെടുപ്പ് കമ്മീഷന്‍ തീരുമാനം. ജോസഫ് വിഭാഗത്തിന്റെ അവകാശ വാദം തളളിയാണ് കമ്മീഷന്റെ തീരുമാനം. തിങ്കളാഴ്ചയാണ് കേന്ദ്ര തെരെഞ്ഞെടുപ്പ് കമ്മീഷന്‍ രണ്ടില ചിഹ്നവുമായി ബന്ധപ്പെട്ട തര്‍ക്കത്തില്‍ തീരുമാനം കൈകൊണ്ടത്.

ഇതോടെ വെട്ടിലായിരിക്കുന്നത് ജോസഫ് പക്ഷമാണ്. ഈ രണ്ടില ജോസഫ് നല്‍കാത്തതാണ് ജോസഫുമായി ജോസ് പക്ഷം ഇടയാന്‍ കാരണം. അന്നെല്ലാം വീമ്പ് പറഞ്ഞ ജോസഫിനെ സംബന്ധിച്ച് കനത്ത തിരിച്ചടിയാണ് ഉണ്ടായിരിക്കുന്നത്. മാത്രമല്ല രാജ്യസഭാ തെരഞ്ഞെടുപ്പില്‍ ജോസ് പക്ഷം നല്‍കിയ വിപ്പ് ഇപ്പോള്‍ ഔദ്യോഗികമായിരിക്കുകയാണ്. അതിനാല്‍ തന്നെ വിപ്പ് ലംഘിച്ച ജോസഫിനും മറ്റ് എംഎല്‍എമാര്‍ക്കും എല്‍എല്‍എ സ്ഥാനം കൂടി നഷ്ടപ്പെടുന്ന അവസ്ഥ കൂടിയാണുള്ളത്.