മാനം കെടുത്തല്ലേ... ദേശീയ അന്വേഷണ ഏജന്സികള്ക്ക് പിന്നാലെ സംസ്ഥാന പോലീസും സ്വപ്ന സുരേഷിനെ ചോദ്യം ചെയ്യാനൊരുങ്ങുന്നു; പത്താം ക്ലാസ് പോലും കടന്നിട്ടില്ലാത്ത സ്വപ്നയെങ്ങനെ ഡിഗ്രി നേടി; സ്വപ്നയെ കസ്റ്റഡിയില് വേണമെന്നാവശ്യപ്പെട്ട് പൊലീസ് കോടതിയില്
ഏതാണ്ട് എല്ലാ പ്രധാന ദേശീയ അന്വേഷണ ഏജന്സികളും സ്വപ്നയുടെ പുറകേയാണ്. നികുതി വെട്ടിച്ച് കള്ളക്കടത്ത് നടത്തുന്നവരെ പിടികൂടുന്ന കസ്റ്റംസ്, രാജ്യ വിരുദ്ധ പ്രവര്ത്തനങ്ങള് അന്വേഷിക്കുന്ന എന്ഐഎ, സാമ്പത്തിക കുറ്റകൃത്യങ്ങള് അന്വേഷിക്കുന്ന എന്ഫോഴ്സ്മെന്റ് ഡയറക്ടറേറ്റ് എന്നിവയെല്ലാം സ്വര്ണക്കടത്ത് കേസ് അന്വേഷണത്തിലാണ്. അതിന് പിന്നാലെ സംസ്ഥാന പോലീസും സ്വപ്നയെ കസ്റ്റഡിയില് വേണമെന്ന് ആവശ്യപ്പെട്ടിരിക്കുകയാണ്.
സ്പേസ് പാര്ക്കിലെ ജോലിക്ക് വ്യാജ ബിരുദ സര്ട്ടിഫിക്കറ്റ് നല്കിയ കേസില് സ്വപ്ന സുരേഷിനെ കസ്റ്റഡിയില് വേണമെന്നാവശ്യപ്പെട്ട് പൊലീസ് കോടതിയില് അപേക്ഷ നല്കി. വഞ്ചിയൂര് ജുഡിഷ്യല് ഒന്നാംക്ലാസ് മജിസ്ട്രേറ്റ് കോടതി മൂന്നിലാണ് കന്റോണ്മെന്റ് എസ്.എച്ച്.ഒ ബി.എം. ഷാഫി ഇന്നലെ അപേക്ഷ നല്കിയത്. കഴിഞ്ഞ ദിവസം ഇന്സ്പെക്ടറുടെ നേതൃത്വത്തിലുള്ള നാലംഗസംഘം കാക്കനാട് ജില്ല ജയിലിലെത്തി സ്വപ്നയുടെ അറസ്റ്റ് രേഖപ്പെടുത്തിയിരുന്നു. കേരള ഐ.ടി ഇന്ഫ്രാ സ്ട്രക്ചര് ലിമിറ്റഡ് (കെ.എസ്.ഐ.ടി.എല്) എം.ഡി ഡോ. ജയശങ്കര് പ്രസാദിന്റെ പരാതിയില് വ്യാജരേഖ ചമയ്ക്കല്, പണം തട്ടല് എന്നീ വകുപ്പുകളാണ് പൊലീസ് ചുമത്തിയിരിക്കുന്നത്.
സ്വപ്ന എയര് ഇന്ത്യയിലുള്പ്പെടെ ജോലിക്കു കയറിയത് മഹാരാഷ്ട്രയിലെ ഡോ. ബാബാ സാഹിബ് അംബേദ്കര് ടെക്നോളജിക്കല് സര്വകലാശാലയില് നിന്നുള്ള വ്യാജ ബിരുദ സര്ട്ടിഫിക്കറ്റുപയോഗിച്ചാണെന്ന് കണ്ടെത്തിയിരുന്നു.
അതേസമയം വിമാനത്താവളം വഴിയുള്ള സ്വര്ണക്കടത്ത് കേസിലെ പ്രതി സ്വപ്ന സുരേഷിനെ ഐ.ടി വകുപ്പിന് കീഴില് നിയമിച്ച സംഭവത്തില് അന്വേഷണമാകാമെന്ന നിയമോപദേശം കിട്ടിയിട്ടും വിജിലന്സിന് സര്ക്കാര് അനുമതി നല്കിയിട്ടില്ല. പ്രതിപക്ഷ നേതാവിന്റെ പരാതിയില് അന്വേഷണം നടത്താന് വിജിലന്സ് അനുമതി തേടിയെങ്കിലും സര്ക്കാര് മറുപടി നല്കിയിരുന്നില്ല. അന്വേഷണമാകാം എന്ന നിയമോപദേശം സഹിതം വിജിലന്സ് റിപ്പോര്ട്ട് സമര്പ്പിച്ചിട്ടും ആഭ്യന്തരവകുപ്പ് അനുമതി നല്കുന്നില്ല.
മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിനെ മുഖ്യമന്ത്രി പിണറായി വിജയനുള്പ്പെടെ ഭരണകക്ഷി നേതാക്കളെല്ലാം തള്ളിപ്പറഞ്ഞിട്ടും എന്തുകൊണ്ടാണ് ഈ വിഷയത്തില് വിജിലന്സ് അന്വേഷണത്തിന് സര്ക്കാര് അനുമതി നല്കാത്തതെന്നകാര്യത്തില് ദുരൂഹതയുണ്ട്. സ്വപ്ന സുരേഷിനെ സ്പേസ് പാര്ക്കില് നിയമിച്ചതിന് പിന്നില് എം. ശിവശങ്കറാണെന്നകാര്യം വ്യക്തമായതാണ്. സര്ക്കാര് ഉദ്യോഗസ്ഥന് അധികാര ദുര്വിനിയോഗം നടത്തിയ കേസില് വിജിലന്സ് അന്വേഷണം നടത്താന് സാധിക്കുമായിരുന്നു. എന്നാല്, അതിന് തയാറാകാതെ ധനകാര്യ ഇന്സ്പെക്ഷന് വിഭാഗത്തെ ഉപയോഗിച്ചുള്ള അന്വേഷണത്തിനാണ് സര്ക്കാര് ഉത്തരവിട്ടത്. സര്ക്കാര് അനുകൂല സംഘടനാ നേതാക്കളെ ഉള്പ്പെടുത്തിയുള്ള ഈ സമിതിയുടെ അന്വേഷണം ശിവശങ്കറിനെ ഉള്പ്പെടെ രക്ഷിക്കാനുള്ള ശ്രമമാണെന്ന ആക്ഷേപം ഉയര്ന്നിരുന്നു.
സ്വര്ണക്കടത്ത് കേസില് സ്വപ്ന സുരേഷ് അറസ്റ്റിലായതോടെയാണ് അനധികൃത നിയമനം പുറത്തുവന്നത്.
സ്വപ്ന സുരേഷ് എസ്എസ്എല്സി കടന്നിട്ടുണ്ടോന്ന സംശയം സ്വന്തം സഹോദരന് പോലും സംശയം ഉന്നയിച്ചിരുന്നു. പാവപ്പെട്ട മലയാളികള് ജോലി കിട്ടാതെ ആത്മഹത്യ ചെയ്യുമ്പോള് പത്ത് ജയിക്കാത്ത സ്വപ്നയെങ്ങനെ ഒരു ലക്ഷത്തിന് മുകളില് ശമ്പളം പറ്റുന്ന ജോലിയില് കയറി എന്ന ആക്ഷേപവും നിലനില്ക്കുന്നു. എന്തായാലും സംസ്ഥാന പോലീസ് സ്വപ്നയെ കസ്റ്റഡിയില് വാങ്ങുമ്പോള് സ്വാഭാവികമായും ഈ വിഷയങ്ങളും ചര്ച്ചയാകും.
https://www.facebook.com/Malayalivartha
