സുവിശേഷ, സന്നദ്ധ പ്രവര്‍ത്തനങ്ങള്‍ക്ക് വിദേശത്തുനിന്നു കോവിഡ് കാലത്ത് സഹായം വാഗ്ദാനം ചെയ്ത് സുവിശേഷകരെ കബളിപ്പിച്ച് പണം തട്ടുന്നു. ഫെയ്സ്ബുക്കിലൂടെയും ചാറ്റിങ്ങിലൂടെയും സുവിശേഷകരുടെ പ്രവര്‍ത്തനം മനസിലാക്കിയാണ് തട്ടിപ്പിനു കളമൊരുക്കുന്നത്. വടവാതൂര്‍ സ്വദേശിയായ യുവ സുവിശേഷകന് 29,000 രൂപ നഷ്ടമായി.

ഇംഗ്ലണ്ടിലുള്ള സിസ്റ്റര്‍ സ്രണ്‍ഗേല തോമസ് എന്നു പരിചയപ്പെടുത്തിയ വ്യക്തി സുവിശേഷകനുമായി ബന്ധം സ്ഥാപിച്ചു. പരസ്പരം ബൈബിള്‍ വാക്യങ്ങളിലൂടെയായിരുന്നു ചാറ്റിങ്ങ്. സുവിശേഷകന്റെ വരുമാനവും പ്രവര്‍ത്തനരീതികളും മനസിലാക്കി. ഒരു മാസം കഴിഞ്ഞപ്പോള്‍, കേരളത്തിലെ സുവിശേഷ പ്രവര്‍ത്തനങ്ങളില്‍ സഹായിക്കാന്‍ തങ്ങളുടെ ബിഷപ്പിനു താല്‍പ്പര്യമുണ്ടെന്നറിയിച്ചു.

ബൈബിള്‍, ഐഫോണ്‍, ലാപ്ടോപ്പ്, സ്വര്‍ണാഭരണങ്ങള്‍, പൗണ്ട്, ഗോള്‍ഡ് വാച്ച് എന്നിവ ബിഷപ്പ് വീട്ടിലെ മേല്‍വിലാസത്തില്‍ അയച്ചിട്ടുണ്ടെന്നു സന്ദേശം കിട്ടി. കൊറിയര്‍ സര്‍വീസിന്റെ വേ ബില്ലിന്റെയും അയച്ച സാധനങ്ങളുടെയും ചിത്രങ്ങള്‍ വാട്ട്സ് ആപ്പില്‍ നല്‍കി. 24 മണിക്കൂറിനുള്ളില്‍ ഡല്‍ഹിയില്‍നിന്നു വിളിക്കുമെന്നും അറിയിച്ചു.

ഡല്‍ഹിയില്‍ ഗിഫ്റ്റ് പായ്ക്കറ്റ് എത്തിയെന്നും സര്‍വീസ് ചാര്‍ജായി 29,000 രൂപ അടച്ച് അതു കൈപ്പറ്റണമെന്നും അറിയിച്ച് അടുത്ത ഫോണ്‍കോളെത്തി. സുവിശേഷകന്‍ അവര്‍ നല്‍കിയ ബാങ്ക് അക്കൗണ്ടില്‍ അമ്മയുടെ മാല പണയംവച്ച് പണമടച്ചു. കസ്റ്റംസില്‍ ജി.എസ്.ടി. ഇനത്തില്‍ 89000 രൂപ അടയ്ക്കണമെന്ന സന്ദേശം പിന്നാലെയെത്തി. സംശയം തോന്നിയ സുവിശേഷകന്‍ അന്വേഷിച്ചപ്പോഴാണു പറ്റിക്കപ്പെട്ടെന്നു തിരിച്ചറിഞ്ഞത്.

കോത്തല സ്വദേശിയായ സുവിശേഷകനെയും അമേരിക്കയില്‍ നിന്നെന്നു പറഞ്ഞ് കബളിപ്പിക്കാന്‍ ശ്രമം നടന്നു. മാസ്‌ക്, സാനിറ്റൈസര്‍ എന്നിവ അയച്ചിട്ടുണ്ടെന്നും കൊറിയര്‍ ചാര്‍ജ് അയയ്ക്കണമെന്നുമായിരുന്നു സന്ദേശം. പണമടയ്ക്കാതിരുന്നതോടെ നിരന്തരം വിളിയെത്തി. വീഡിയോ കോളില്‍ വന്നാല്‍ പണം അടയ്ക്കാമെന്നു സന്ദേശം അയച്ചതോടെ വിളി നിന്നു. ഇത്തരത്തില്‍ നിരവധി പേര്‍ കബളിപ്പിക്കപ്പെട്ടെന്നാണ് സൂചന.