ഇന്ത്യ ചൈന സര്‍ഘര്‍ഷം തുടരുന്നതിനിടെ ചരിത്ര ദൗത്യവുമായി ഇന്ത്യ കുതിക്കുന്നു. ചൈനയുടെ സകല അത്യാധുനിക നിരീക്ഷണ സംവിധാനങ്ങളേയും നിഷ്പ്രഭമാക്കിയാണ് വലിയ പ്രത്യാഘാതമുണ്ടാക്കുന്ന ദൗത്യം ഇന്ത്യന്‍ സേന ഏറ്റെടുത്തത്. ചൈനയെ നേരിടാന്‍ ആദ്യം സേനാവിന്യാസം ശക്തിപ്പെടുത്തുകയാണ് ചെയ്തത്. ഈ സാഹചര്യത്തില്‍ ഭാവി മുന്‍നിര്‍ത്തി ജലപര്യവേക്ഷണ ദൗത്യത്തിലേര്‍പ്പെട്ടിരിക്കുകയാണ് ഇന്ത്യന്‍ സേന. കിഴക്കന്‍ ലഡാക്കില്‍ 17,000 അടി ഉയരത്തില്‍ ദൗലത് ബേഗ് ഓള്‍ഡിയിലെപര്‍വതത്തിലാണു സൈന്യം വെള്ളത്തിനായി പര്യവേക്ഷണം നടത്തുന്നത്.

2020 മേയ് ആദ്യം മുതല്‍ ഇന്ത്യയുടെയും ചൈനയുടെയും സൈനികര്‍ മുഖാമുഖം തുടരുന്ന യഥാര്‍ഥ നിയന്ത്രണ രേഖയില്‍, രാജ്യത്തിന്റെ വിദൂരവും ഏറ്റവും തന്ത്രപ്രധാനവുമായ ഔട്ട്‌പോസ്റ്റാണു ഡിബിഒ. സൈന്യത്തിന് ഇവിടെ വെള്ളത്തിന്റെ ലഭ്യത ഉറപ്പാക്കേണ്ടത് അത്യന്താപേക്ഷിതമായ സാഹചര്യമാണിപ്പോള്‍. സിയാച്ചിന്‍ ഗ്ലേസിയര്‍, ബറ്റാലിക് എന്നിവിടങ്ങളില്‍ സൈന്യത്തോടൊപ്പം പ്രവര്‍ത്തിച്ചിട്ടുള്ള പ്രശസ്ത ജിയോളജിസ്റ്റ് ഡോ. റിതേഷ് ആര്യയാണു മാര്‍ഗനിര്‍ദേശങ്ങളുമായി കൂടെയുള്ളത്.

സ്ഥിരതയാര്‍ന്ന ഭൂഗര്‍ഭ ജലവിഭവ സ്രോതസ്സ് കണ്ടെത്തുന്നതിന്റെ ഭാഗമായി കാരു മുതല്‍ ടാംഗിള്‍ വരെ 28 ദിവസത്തെ പ്രാഥമിക പര്യവേക്ഷണമാണ് നടത്തുന്നത്. മുന്‍കാലങ്ങളില്‍, കിഴക്കന്‍ ലഡാക്കിലെ ഉയര്‍ന്ന പര്‍വതങ്ങളില്‍ സൈന്യത്തിനായി ഭൂഗര്‍ഭ ജലസ്രോതസ്സുകള്‍ ഡോ. റിതേഷ് വിജയകരമായി കണ്ടെത്തിയിട്ടുണ്ട്.

ഗല്‍വാന്‍ കൂടാതെ പാംഗോങ് സോ, ലുകുങ്, താക്കുങ്, ചുഷുല്‍, റെസാങ് ലാ, ടാങ്‌സെ എന്നിവിടങ്ങളില്‍ വെള്ളം ഉറപ്പാക്കുന്നതില്‍ ഇവരുടെ സംഘം വിജയിച്ചിട്ടുണ്ട്. ഡിബിഒയിലും വെള്ളം കണ്ടെത്തുമെന്നാണു പ്രതീക്ഷ. 10,000 വര്‍ഷങ്ങള്‍ക്ക് മുമ്പ് ഡിബിഒയില്‍ നിലനിന്നിരുന്ന ഒരു തടാകം പുനര്‍നിര്‍മിക്കാനും പദ്ധതിയുണ്ട്. ഇതു സൈന്യത്തിനു സഹായമാകുന്നതോടൊപ്പം സഞ്ചാരികളെ ആകര്‍ഷിക്കാനും ഉപകാരപ്പെടുമെന്നാണു കണക്കുകൂട്ടല്‍.

അതേസമയം ചൈന കയ്യേറിയത് കേരളത്തോളം വരുമെന്നാണ് പ്രതിരോധ മന്ത്രി രാജ്‌നാഥ് സിംഗ് പറയുന്നത്. കേരളത്തിന്റെ ഭൂവിസ്തൃതി 38,863 ചതുരശ്ര കിലോമീറ്ററാണ്. കിഴക്കന്‍ ലഡാക്കില്‍ ചൈന ഇന്ത്യയുടെ 38,000 ചതുരശ്ര കിലോമീറ്റര്‍ സ്ഥലം കയ്യടക്കി വച്ചിരിക്കുന്നുവെന്നാണ് പ്രതിരോധ മന്ത്രി രാജ്‌നാഥ് സിങ് ലോക്‌സഭയില്‍ പറഞ്ഞത്.

നിയന്ത്രണ രേഖ സംബന്ധിച്ച ഉഭയകക്ഷി കരാറുകള്‍ ചൈന അംഗീകരിക്കുന്നല്ല. ഇന്ത്യയുടെ അതിര്‍ത്തിയും പരമാധികാരവും സംരക്ഷിക്കാന്‍ സൈന്യം സുസജ്ജമാണെന്നും ഏതു സ്ഥിതിയും നേരിടാന്‍ ഒരുക്കമാണെന്നും മന്ത്രി പറഞ്ഞു.

അതിര്‍ത്തിയില്‍ എല്ലാ കരാറുകളും ലംഘിച്ച് ചൈന സൈനിക വിന്യാസം നടത്തുകയാണ്. നയതന്ത്രതലത്തിലും സൈനിക തലത്തിലും ചര്‍ച്ച നടക്കുമ്പോള്‍ത്തന്നെ നിയന്ത്രണ രേഖ ലംഘിക്കാന്‍ നിരന്തരശ്രമം നടത്തുന്നു. നിയന്ത്രണ രേഖയില്‍ തല്‍സ്ഥിതി മറികടക്കാന്‍ ശ്രമിക്കുന്നതു സമാധാന ചര്‍ച്ചകള്‍ക്കു വിഘാതമാണ്. ചൈനയുടെ നീക്കങ്ങള്‍ ഇന്ത്യന്‍ സൈന്യം സമയോചിതമായി പരാജയപ്പെടുത്തിയെന്നും പ്രതിരോധ മന്ത്രി പറഞ്ഞു.

കിഴക്കന്‍ ലഡാക്കിലെ ഗോഗ്ര, കൊങ്ക്ക ലാ, പാംഗോങ് തടാകത്തിന്റെ വടക്കും തെക്കും കരകള്‍ എന്നിവിടങ്ങളില്‍ കടന്നുകയറാന്‍ ചൈന ശ്രമിക്കുന്നുണ്ട്. നമ്മുടെ സൈന്യം മതിയായ പ്രതിരോധ സന്നാഹങ്ങള്‍ ഒരുക്കിയിട്ടുണ്ട്. സൈന്യത്തിന് ഈ സ്ഥിതി കൈകാര്യം ചെയ്യാന്‍ കഴിയുമെന്ന കാര്യം സഭ വിശ്വാസത്തിലെടുക്കണമെന്നും പിന്തുണ നല്‍കണമെന്നും രാജ്‌നാഥ് പറഞ്ഞു. ഇതിന് പിന്നാലെയാണ് ഇന്ത്യന്‍ സൈന്യത്തിന്റെ ധീരത പുറത്തായത്.