എത്തിയത് സ്വകാര്യ കാറില്‍... മന്ത്രി കെ.ടി. ജലീല്‍ ചോദ്യം ചെയ്യുന്നതിന് വേണ്ടി എന്‍ഐഎ ഓഫീസില്‍ രഹസ്യമായെത്തി; എത്തിയത് സ്വകാര്യ കാറില്‍; ഇത്തവണയും ജലീല്‍ എത്തിയത് മാധ്യമങ്ങളെ വെട്ടിച്ച്; എന്ത് സംഭവിക്കുന്നുവെന്നറിയാന്‍ സകല ചാനലുകളും കൊച്ചിയില്‍
രാഷ്ട്രീയ കേരളത്തെ ചൂടുപിടിപ്പിച്ച് മന്ത്രി കെടി ജലീലിനെ എന്‍ഐഎ ചോദ്യം ചെയ്യാന്‍ കൊച്ചിയില്‍ വിളിപ്പിച്ചു. ചോദ്യം ചെയ്യലിനായി മന്ത്രി ജലീല്‍ സ്വകാര്യ കാറില്‍ കൊച്ചിയിലെത്തിയിട്ടുണ്ട്. നേരത്തെ രണ്ട് തവണ ഇഡി ചോദ്യം ചെയ്യാന്‍ വിളിപ്പിച്ചപ്പോഴും ജലീല്‍ രഹസ്യമായാണ് എത്തിയത്. ഇത്തവണയും അങ്ങനെ തന്നെയാണ്. സ്വകാര്യ കാറിലാണ് ഇപ്പോള്‍ എന്‍ഐഎയുടെ ചോദ്യം ചെയ്യലിനായി ജലീല്‍ വീണ്ടും എത്തിയത്. ഇത്തവണയും ജലീല്‍ വരുന്ന വിവരം മാധ്യമങ്ങള്‍ അറിഞ്ഞില്ല. ജലീല്‍ എന്‍ഐഎ ഓഫീസില്‍ എത്തിയതിന് ശേഷമാണ് ചാനലുകാര്‍ വിവരം അറിഞ്ഞത്. അതോടെ ആഘോഷിക്കാനനായി ചാനലുകള്‍ കൊച്ചിയിലേക്ക് കുതിക്കുകയാണ്. ഇനിയുള്ള നിമിഷങ്ങള്‍ നിര്‍ണായകമാണ്.
എന്‍ഫോഴ്‌സ്‌മെന്റ് ഡയറക്ടറേറ്റ് സാമ്പത്തിക തിരിമറിയാണ് അന്വേഷിക്കുന്നതാണെങ്കില്‍ എന്‍ഐഎ വിളിപ്പിച്ചത് ജലീലിനേയും സര്‍ക്കാരിനേയും വലിയ പ്രതിരോധത്തിലാക്കും. സ്വര്‍ണക്കടത്തും രാജ്യവിരുദ്ധവുമാണ് ഇപ്പോള്‍ എന്‍ഐഎ അന്വേഷിക്കുന്നത്. അതിനാല്‍ തന്നെ എന്‍ഐഎ ജലീലിനെ ചോദ്യം ചെയ്യാന്‍ വിളിച്ച് വരുത്തിയത് വലിയ ചര്‍ച്ചയാകുകയാണ്. പ്രതിപക്ഷം ഇപ്പോള്‍ തന്നെ വലിയ സമരത്തിലാണ് അതിന് പിന്നാലെയാണ് എന്‍ഐഎയുടെ ചോദ്യം ചെയ്യല്‍. അതിനാല്‍ തന്നെ പ്രതിപക്ഷം സമരം ശക്തമാക്കും. അതേസമയം കൊച്ചിയില്‍ എന്തു സംഭവിക്കുമെന്ന ആകാംക്ഷയുമുണ്ട്. ജലീലിന് എന്‍ഐഎ ക്ലീന്‍ ചിറ്റ് നല്‍കുമോ അന്വേഷണം തുടരുമോയെന്ന് കണ്ടറിയാം.
അതേസമയം ജലീലിനെ സംബന്ധിച്ച് അത്ര ശുഭകരമല്ലാത്ത വാര്‍ത്തയാണ് വരുന്നത്. ജലീലിനെതിരായ അന്വേഷണം അവസാനിപ്പിച്ചിട്ടില്ലെന്ന എന്‍ഫോഴ്‌സ്‌മെന്റ് ഡയറക്ടറേറ്റ് മേധാവിയുടെ വിശദീകരണത്തിന് പിന്നാലെ ചോദ്യം ചെയ്യലിന്റെ വിവരങ്ങള്‍ തേടി എന്‍.ഐ.എ സംഘം ഇന്നലെ ഇ.ഡി ഓഫീസിലെത്തിയത്. ജലീല്‍ നല്‍കിയ മൊഴികളാണ് വിശദമായി പരിശോധിച്ചത്. ഇതോടെയാണ് ജലീലിനെ എന്‍.ഐ.എയും ചോദ്യംചെയ്യുമെന്ന് ഉറപ്പായത്.
നയതന്ത്ര ചാനലിലൂടെ എത്തിയ മതഗ്രന്ഥങ്ങളുടെ മറവില്‍ സ്വര്‍ണം കടത്തിയോയെന്നാണ് കേന്ദ്ര ഏജന്‍സികള്‍ അന്വേഷിക്കുന്നത്. ജലീലിന്റെ മൊഴികളില്‍ പൊരുത്തക്കേടുകളുള്ളതിനാല്‍ വീണ്ടും ചോദ്യംചെയ്യാന്‍ ഇ.ഡിയും തീരുമാനിച്ചിട്ടുണ്ട്.
സ്വപ്ന, സന്ദീപ് നായര്‍ എന്നിവരുടെ മൊബൈല്‍ ഫോണുകള്‍, ലാപ്‌ടോപ്പ് എന്നിവയില്‍ നിന്ന് മായ്ച്ചുകളഞ്ഞ തെളിവുകള്‍ എന്‍.ഐ.എ വീണ്ടെടുത്തിരുന്നു. ഇതിന്റെ വിശദാംശങ്ങള്‍ കസ്റ്റംസും ഇ.ഡിയും ചോദിച്ചിട്ടുണ്ട്.
ഡിജിറ്റല്‍ തെളിവുകള്‍ വീണ്ടെടുത്തതോടെ സ്വപ്നയെ വീണ്ടും ചോദ്യം ചെയ്യാനുള്ള തയ്യാറെടുപ്പിലാണ് എന്‍.ഐ.എ. ഇതിനു ശേഷമായിരിക്കും ജലീലിനെയും ലൈഫ് ഭവനപദ്ധതി കമ്മിഷനുമായി ബന്ധപ്പെട്ട് ആരോപണ വിധേയനായ മന്ത്രി പുത്രന്‍, മറ്റൊരു മന്ത്രി എന്നിവരെയും ചോദ്യംചെയ്യുക.
അതേസമയം സ്വര്‍ണക്കടത്തു കേസിലെ മുഖ്യപ്രതികളെ വീണ്ടും കസ്റ്റഡിയില്‍ ചോദ്യം ചെയ്യാന്‍ എന്‍.ഐ.എ നല്‍കിയ അപേക്ഷയില്‍ ,സ്വപ്ന സുരേഷിനെ ഇന്നലെയും കോടതിയില്‍ ഹാജരാക്കിയില്ല. 22 ന് ഹാജരാക്കുമെന്നാണ് അധികൃതര്‍ നല്‍കുന്ന വിവരം.
സ്വപ്ന, സന്ദീപ് , മുഹമ്മദ് ഷാഫി, മുഹമ്മദാലി ഇബ്രാഹിം, മുഹമ്മദ് അന്‍വര്‍ എന്നിവരെ വീണ്ടും കസ്റ്റഡിയില്‍ വിട്ടുകിട്ടാനാണ് എന്‍.ഐ.എ അപേക്ഷ നല്‍കിയത്. ഇവരില്‍ സ്വപ്നയും അന്‍വറും ഒഴികെയുള്ള പ്രതികളെ വെള്ളിയാഴ്ച വരെ കോടതി കസ്റ്റഡിയില്‍ വിട്ടുനല്‍കിയിരുന്നു. ഇന്നലെ കോടതിയില്‍ ഹാജരാക്കിയ അന്‍വറിനെയും എന്‍.ഐ.എയുടെ കസ്റ്റഡിയില്‍ വിട്ടു. എന്നാല്‍ നെഞ്ചുവേദനയെത്തുടര്‍ന്ന് തൃശൂരിലെ മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന സ്വപ്നയെ കസ്റ്റഡിയില്‍ വിട്ടുകൊടുക്കുന്നകാര്യം മെഡിക്കല്‍ബോര്‍ഡ് നല്‍കുന്ന റിപ്പോര്‍ട്ടിന്റെ അടിസ്ഥാനത്തില്‍ തീരുമാനിക്കാമെന്ന് കോടതി വ്യക്തമാക്കിയിരുന്നു. സ്വപ്നയെ കഴിഞ്ഞദിവസം ഡിസ്ചാര്‍ജ് ചെയ്ത് ജയിലിലേക്ക് മാറ്റി. ഇതിന് പിന്നാലെയാണ് ജലീലിനെ എന്‍ഐഎ വിളിപ്പിച്ചത്. എന്തായാലും ഇനി എല്ലാ കണ്ണുകളും കൊച്ചിയിലാണ്.
"
https://www.facebook.com/Malayalivartha
