മലയാളത്തിലെ സര്‍വമാന മാധ്യമങ്ങളേയും മന്ത്രി കെടി ജലീല്‍ വെറുപ്പിച്ചിരിക്കുകയാണ്. മാത്രമല്ല അവരുടെ പ്രതിഷേധം വര്‍ധിപ്പിച്ച് ഡല്‍ഹിയിലുള്ള ഇംഗ്ലീഷ് ഓണ്‍ലൈന് അഭിമുഖം നല്‍കുകയും ചെയ്തു. സ്വപ്നയുടെ ഫോണ്‍ വിളിയില്‍ ജലീല്‍ ഉണ്ടെന്ന വാര്‍ത്ത വന്നപ്പോള്‍ തന്നെ ചാനലുകാരെ ജലീലാണ് വിളിച്ചു വരുത്തി തെളിവ് നിരത്തിയത്. ആ തെളിവ് തനിക്ക് തന്നെ പാരയായപ്പോഴാണ് മാധ്യമങ്ങളെ വെറുപ്പിച്ചത്. അവസാനം ഇഡി രണ്ട് പ്രാവശ്യം ചോദ്യം ചെയ്യാന്‍ പോയപ്പോഴും ഒരു പത്രക്കാരേയും അറിയിച്ചില്ല. ചോദ്യം ചെയ്യലിന് ശേഷം വിളിച്ച മാധ്യമ പ്രവര്‍ത്തകരോട് പോലും ഇഡി ചോദ്യം ചെയ്തില്ലെന്ന് ജലീല്‍ കള്ളം പറഞ്ഞു. അതിനാല്‍ തന്നെ മാധ്യമങ്ങള്‍ ജലീലിനെ ഒന്നു കിട്ടാനായി കാത്തിരിക്കുകയാണ്. ദാ ഇപ്പോള്‍ അവസരം ഒതതു വന്നിരിക്കുകയാണ്.

രാഷ്ട്രീയ കേരളത്തെ വീണ്ടും മുള്‍മുനയിലാക്കി മന്ത്രി കെ ടി ജലീല്‍ ചോദ്യം ചെയ്യലിനായി എന്‍ഐഎ ഓഫീസിലെത്തി. പുലര്‍ച്ചെ ആറുമണിയോടെ സ്വകാര്യ കാറിലാണ് ജലീല്‍ എത്തിയത്. മന്ത്രിയുടെ മൊഴി എന്‍ഐഎ രേഖപ്പെടുത്തുമെന്ന സൂചന നേരത്തെ ഉണ്ടായിരുന്നു. കഴിഞ്ഞ ദിവസം ലഭിച്ച നോട്ടീസിന്റെ അടിസ്ഥാനത്തിലാണ് മന്ത്രി എന്‍ഐഎ ഓഫീസില്‍ എത്തിയിരിക്കുന്നത്. സ്വര്‍ണ്ണം അല്ലെങ്കില്‍ ഏതെങ്കിലും ഹവാല ഇടപാടുകള്‍ മതഗ്രന്ഥത്തിന്റ മറവില്‍ നടന്നിട്ടുണ്ടോയെന്നതാണ് പരിശോധനാ വിഷയം.

മന്ത്രി ജലീലിനോട് കോണ്‍സുല്‍ ജനറലാണ് മതഗ്രന്ഥങ്ങള്‍ കൈപ്പറ്റി വിതരണം ചെയ്യണമെന്ന് ആവശ്യപ്പെട്ടത്. കോണ്‍സുല്‍ ജനറല്‍അടക്കം ഉള്ളവര്‍ക്ക് കള്ളക്കടത്ത് ഇടപാടില്‍ പങ്കുണ്ടെന്ന നിലപാടിലാണ് കേന്ദ്ര ഏജന്‍സികള്‍. ഇതിന്റെ പശ്ചാത്തലത്തിലാണ് മന്ത്രിയെയും എന്‍ഐഎ ചോദ്യം ചെയ്യുന്നത്. ആദ്യഘട്ടത്തില്‍ മറ്റ് പ്രതികളെ എന്‍ഫോഴ്‌സ്‌മെന്റ് ചോദ്യം ചെയ്തതില്‍ മന്ത്രിക്കെതിരെ തെളിവുകള്‍ കണ്ടെത്താന്‍ കഴിഞ്ഞിട്ടില്ലെന്നാണ് സൂചന. മന്ത്രിയുടെ മൊഴിയെടുത്ത ഘട്ടത്തിലും ഇതുസംബന്ധിച്ച അറിവുണ്ടായിട്ടില്ലെന്ന നിലപാട് തന്നെയാണ് അദ്ദേഹം സ്വീകരിച്ചത്.

ജലീലിനെതിരായ അന്വേഷണം അവസാനിപ്പിച്ചിട്ടില്ലെന്ന എന്‍ഫോഴ്‌സ്‌മെന്റ് ഡയറക്ടറേറ്റ് മേധാവിയുടെ വിശദീകരണത്തിന് പിന്നാലെ ചോദ്യം ചെയ്യലിന്റെ വിവരങ്ങള്‍ തേടി ഇന്നലെ എന്‍.ഐ.എ സംഘം ഇ.ഡി ഓഫീസിലെത്തി. ജലീല്‍ നല്‍കിയ മൊഴികളാണ് വിശദമായി പരിശോധിച്ചു. ഇതോടെ ജലീലിനെ എന്‍.ഐ.എയും ചോദ്യംചെയ്യുമെന്ന് ഉറപ്പായത്.

നയതന്ത്ര ചാനലിലൂടെ എത്തിയ മതഗ്രന്ഥങ്ങളുടെ മറവില്‍ സ്വര്‍ണം കടത്തിയോയെന്നാണ് കേന്ദ്ര ഏജന്‍സികള്‍ അന്വേഷിക്കുന്നത്. ജലീലിന്റെ മൊഴികളില്‍ പൊരുത്തക്കേടുകളുള്ളതിനാല്‍ വീണ്ടും ചോദ്യംചെയ്യാന്‍ ഇ.ഡിയും തീരുമാനിച്ചിട്ടുണ്ട്.

സ്വപ്‌ന, സന്ദീപ് നായര്‍ എന്നിവരുടെ മൊബൈല്‍ ഫോണുകള്‍, ലാപ്‌ടോപ്പ് എന്നിവയില്‍ നിന്ന് മായ്ച്ചുകളഞ്ഞ തെളിവുകള്‍ എന്‍.ഐ.എ വീണ്ടെടുത്തിരുന്നു. ഇതിന്റെ വിശദാംശങ്ങള്‍ കസ്റ്റംസും ഇ.ഡിയും ചോദിച്ചിട്ടുണ്ട്.

ഡിജിറ്റല്‍ തെളിവുകള്‍ വീണ്ടെടുത്തതോടെ സ്വപ്നയെ വീണ്ടും ചോദ്യം ചെയ്യാനുള്ള തയ്യാറെടുപ്പിലാണ് എന്‍.ഐ.എ. ഇതിനു ശേഷമായിരിക്കും ജലീലിനെയും ലൈഫ് ഭവനപദ്ധതി കമ്മിഷനുമായി ബന്ധപ്പെട്ട് ആരോപണ വിധേയനായ മന്ത്രി പുത്രന്‍, മറ്റൊരു മന്ത്രി എന്നിവരെയും ചോദ്യംചെയ്യുക.

അതേസമയം സ്വര്‍ണക്കടത്ത് കേസ് പ്രതി സ്വപ്ന സുരേഷിനൊപ്പം സെല്‍ഫി എടുത്തതിന് വനിതാ പൊലീസുകാര്‍ക്കെതിരെ അച്ചടക്ക നടപടി. വനിതാ പൊലീസുകാരെ പണിഷ്‌മെന്റ് റോള്‍ പട്ടികയില്‍പെടുത്തി. കോടതി നടപടി ക്രമം പോലെ അന്വേഷണ ഉദ്യോഗസ്ഥന് ഇവരെ വിളിച്ചു വരുത്തുകയും സംഭവത്തെക്കുറിച്ച് വിചാരണ നടത്തി സാക്ഷികളെ വിളിച്ചു വരുത്തി നടപടി ക്രമങ്ങള്‍ പൂര്‍ത്തിയാക്കുകന്നതാണ് പണിഷ്‌മെന്റ് റോള്‍. ഇതില്‍ പൊലീസ് സേനയ്ക്ക് അപമാനം ഉണ്ടാക്കുന്ന തരത്തില്‍ ഇവരുടെ ഭാഗത്ത് എന്തെങ്കിലും കുറ്റം ഉണ്ടായിട്ടുണ്ടെങ്കില്‍ തുടര്‍നടപടികള്‍ സ്വീകരിക്കാന്‍ ശുപാര്‍ശ ചെയ്യാം.

തുടരന്വേഷണത്തിന് െ്രെകം ബ്രാഞ്ച് എ.സി.പിയെയാണ് ചുമതലപ്പെടുത്തിയത്. സ്വപ്ന തൃശൂര്‍ മെഡിക്കല്‍ കോളജില്‍ ചികിത്സയില്‍ കഴിയുന്ന സമയത്താണ് ആറു വനിതാ പൊലീസുകാര്‍ സെല്‍ഫിയെടുത്തത്. ഗുരുവായൂര്‍, കുന്നംകുളം സബ് ഡിവിഷനില്‍പ്പെട്ട പൊലീസുകാര്‍ക്കെതിരെയാണ് നടപടി. ഇങ്ങനെ സംഭവ ബഹുലമായ അവസ്ഥയിലാണ് ജലീല്‍ ചോദ്യം ചെയ്യലിനായി ഹാജരായത്.