ബിജെപി അധ്യക്ഷന്‍ കെ. സുരേന്ദ്രന്‍ പഴയ സുരേന്ദ്രനല്ലെന്നാണ് ഓരോ സംഭവത്തിലൂടെയും തെളിയുന്നത്. സുരേന്ദ്രന്‍ പല കാര്യങ്ങളും മുന്‍കൂട്ടി അറിഞ്ഞ് പറയുന്നത് പോലെയാണ് പറയുന്നത്. അതെല്ലാം നടക്കുകയും ചെയ്യുന്നു. എന്നാല്‍ സുരേന്ദ്രനെ കളിയാക്കാനാണ് സഖാക്കള്‍ ശ്രമിക്കുന്നത്. അവസാന ഉദാഹരണമാണ് ജലീലിനെ എന്‍ഐഎ ചോദ്യം ചെയ്യുമെന്ന് പറഞ്ഞത്. അതിപ്പോള്‍ നടക്കുകയും ചെയ്തു. അതിന് പിന്നാലെ സുരേന്ദ്രന്‍ പറഞ്ഞ പേരുകളാണ് മന്ത്രി പുത്രനും മറ്റൊരു മന്ത്രിയും. എന്നാല്‍ സഖാക്കള്‍ കളിയാക്കി തള്ളുകയാണ് ചെയ്തത്. അതേസമയം ജലീലിനെ എന്‍ഐഎ ചോദ്യം ചെയ്യാന്‍ വിളിച്ചതോടെ മന്ത്രിപുത്രനും അച്ഛന്‍ മന്ത്രിക്കും മറ്റൊരു മന്ത്രിക്കും ടെന്‍ഷന്‍ കൂടുകയാണ്.

ഇന്ന് രാവിലെയാണ് മന്ത്രി കെ. ടി. ജലീല്‍ ചോദ്യം ചെയ്യലിനായി കൊച്ചി എന്‍ഐഎ ഓഫിസിലെത്തിയത്. പുലര്‍ച്ചെ ആറുമണിയോടെയാണ് ആലുവ മുന്‍ എംഎല്‍എ എ.എം. യൂസഫിന്റെ പേരില്‍ രജിസ്റ്റര്‍ ചെയ്തിട്ടുള്ള കാറില്‍ മന്ത്രി എത്തിയത്. മതഗ്രന്ഥത്തിന്റെ മറവില്‍ നയതന്ത്ര ചാനലിലൂടെ സ്വര്‍ണം കടത്തിയിട്ടുണ്ട് എന്ന സംശയത്തിന്റെ അടിസ്ഥാനത്തിലാണ് എന്‍ഐഎ മന്ത്രിയില്‍ നിന്ന് മൊഴിയെടുക്കുന്നതിനായി എന്‍ഐഎ വിളിപ്പിച്ചിരിക്കുന്നത്.

മാധ്യമങ്ങളുടെയും ജനങ്ങളുടെയും കണ്ണു വെട്ടിക്കുന്നതിനാണ് മന്ത്രിയുടെ പ്രത്യേക താല്‍പര്യത്തില്‍ പുലര്‍ച്ചെ സമയം എന്‍ഐഎ ഓഫിസില്‍ ഹാജരായത് എന്നാണ് വ്യക്തമാകുന്നത്. സാധാരണ നിലയില്‍ ഒമ്പതു മണിക്കു മാത്രമേ അന്വേഷണ ഉദ്യോഗസ്ഥര്‍ ഓഫിസില്‍ എത്തൂ എന്നിരിക്കെയാണ് മന്ത്രി അതിരാവിലെ ഓഫിസിനുള്ളില്‍ കടന്നിരിക്കുന്നത്.

ഇന്ന് ഉന്നതരില്‍ ഒരാളെ ചോദ്യം ചെയ്യുമെന്ന് കഴിഞ്ഞ ദിവസം തന്നെ മാധ്യമങ്ങള്‍ക്ക് വിവരം ലഭിച്ചിരുന്നു. ഇതിനായി ദേശീയ ഏജന്‍സികളില്‍ ഒന്നിന്റെ ഉന്നത ഉദ്യോഗസ്ഥന്‍ കൊച്ചിയില്‍ എത്തിയതായി വിവരം ലഭിച്ചിരുന്നു. ഇന്നലെ രാത്രി എന്‍ഫോഴ്‌സ്‌മെന്റ് അഭിഭാഷകന്‍ ഉള്‍പ്പടെയുളളവര്‍ ഉന്നത ഉദ്യോഗസ്ഥനെ കാണുന്നതിനായി കൊച്ചിയിലെ ഓഫിസില്‍ എത്തിയതോടെ മാധ്യമങ്ങളും സ്ഥലത്ത് എത്തിയിരുന്നു. എന്നാല്‍ ആരെ, എപ്പോള്‍ ചോദ്യം ചെയ്യാനാണ് എന്നതിനെക്കുറിച്ച് വ്യക്തതയില്ലായിരുന്നു. ഇതിനിടെയാണ് ഇന്നു പുലര്‍ച്ചെ മന്ത്രി കെ.ടി. ജലീല്‍ എന്‍ഐഎ ഓഫിസില്‍ എത്തിയിരിക്കുന്നത്.

ഇന്നലെ എന്‍ഐഎ അന്വേഷണ സംഘം ഇഡി ഓഫിസിലെത്തി മന്ത്രി കെ.ടി. ജലീലിന്റെ വിവരങ്ങള്‍ ശേഖരിച്ച് വിലയിരുത്തിയിരുന്നു. ഇത് ഇന്ന് മന്ത്രിയെ ചോദ്യം ചെയ്യുന്നതിന് മുന്നോടിയായാണ് എന്നാണ് വ്യക്തമാകുന്നത്.

മന്ത്രി എന്‍ഐഎ ഓഫിസില്‍ എത്തിയതിനു പിന്നാലെ ഉയര്‍ന്ന പൊലീസ് ഉദ്യോഗസ്ഥര്‍ ഉള്‍പ്പടെയുള്ളവര്‍ സ്ഥലത്ത് എത്തിയിട്ടുണ്ട്. ഡിസിപി പൂങ്കുഴലിയുടെ നേതൃത്വത്തിലുള്ള സംഘമാണ് സ്ഥലത്ത് എത്തിയിരിക്കുന്നത്. പൊലീസ് സ്ഥലത്തെത്തി ഇവിടെ ബാരിക്കേഡ് സ്ഥാപിച്ചിരിക്കുകയാണ്. പ്രതിപക്ഷ പാര്‍ട്ടി പ്രവര്‍ത്തകര്‍ ഇവിടെ എത്തി മന്ത്രിക്കെതിരെ പ്രതിഷേധ പ്രകടനം നടത്താനുള്ള സാധ്യത പരിഗണിച്ചാണ് പൊലീസ് ബാരിക്കേഡുകള്‍ സ്ഥാപിച്ചിരിക്കുന്നത്.

സര്‍ക്കാരിനെ സംബന്ധിച്ചും ജലീലിനെ സംബന്ധിച്ചും നിര്‍ണായകമാണ് എന്‍ഐഎയുടെ ചോദ്യം ചെയ്യല്‍. എന്‍ഐഎ ക്ലീന്‍ ചിറ്റ് നല്‍കിയാല്‍ അതോടെ എല്ലാം തീരും. അഗ്നിശുദ്ധി വരുത്തി പുറത്ത് വരാം. അല്ലെങ്കില്‍ വലിയ പ്രതിസന്ധിയാണ് ഉണ്ടാക്കുന്നത്. ഇതിന് പിന്നാലെ വന്ന മന്ത്രിയും മന്ത്രി പുത്രനും കൂടിയാകുമ്പോള്‍ വലിയ തലവേദന തന്നെയാണ് പാര്‍ട്ടിക്കും സര്‍ക്കാരിനും.

 "