പെരിയാര്‍ കടുവാസങ്കേതത്തിലെ അതീവ സംരക്ഷണ മേഖലയിലെ കൈയേറ്റവും അനധികൃത മരംമുറിക്കലും അന്വേഷിക്കാനെത്തിയ വനംവകുപ്പ് ഉദ്യോഗസ്ഥരെ സംഘംചേര്‍ന്നു മര്‍ദിച്ച സംഭവത്തില്‍ അഞ്ചുപേര്‍ അറസ്റ്റില്‍. നാട്ടുകാരായ നെല്ലിക്കല്‍ അജയന്‍ (42), പുന്നയ് ക്കല്‍ സതീഷ് (39), വിഷ്ണുഭവനില്‍ വിഷ്ണു(30), ഈട്ടിക്കുന്നേല്‍ ബിജു(32), പാലംമൂട്ടില്‍ രഞ്ജിത്ത് (26) എന്നിവരാണ് പിടിയിലായത്. കഴിഞ്ഞ ജനുവരി 25-നായിരുന്നു സംഭവം. 

കേസില്‍ 13 പ്രതികളാണുള്ളത്. ശേഷിക്കുന്ന എട്ടുപേരുടെ അറസ്റ്റ് ഉടന്‍ ഉണ്ടാകുമെന്ന് അന്വേഷണത്തിന് നേതൃത്വംവഹിച്ച ഡിവൈ.എസ്.പി. രാജ്മോഹന്‍ പറഞ്ഞു.

അന്വേഷണത്തിനായി ബീറ്റ് ഫോറസ്റ്റ് ഓഫീസര്‍ സി. സുജിത്ത്, താല്‍ക്കാലിക വാര്‍ഡന്‍മാരായ അലിയാര്‍, കാര്‍ത്തിക് എന്നിവര്‍ സ്ഥലത്തെത്തിയപ്പോള്‍ ഉദ്യോഗസ്ഥരെ തടഞ്ഞു വച്ചശേഷം സ്ത്രീകള്‍ ഉള്‍പ്പെടെ ഇവരെ മര്‍ദിക്കുകയായിരുന്നു. വള്ളക്കടവ് റേഞ്ച് ഓഫീസറടക്കം നോക്കി നില്‍ക്കുമ്പോഴായിരുന്നു മര്‍ദനം. ഇവരെ മര്‍ദിക്കുന്ന ദൃശ്യങ്ങള്‍ പിന്നീട് സമൂഹികമാധ്യമങ്ങളില്‍ പ്രചരിച്ചിരുന്നു. വനംവകുപ്പിലെ ഉദ്യോഗസ്ഥരാണെന്നു പറഞ്ഞിട്ടും മര്‍ദനം തുടരുന്നത് വീഡിയോ ദൃശ്യങ്ങളില്‍ കാണാം.

വനംവകുപ്പിനു പരാതി ലഭിച്ചത് പെരിയാര്‍ കടുവാസങ്കേതത്തിലെ മൂലക്കയം ഭാഗത്ത് മരം മുറിച്ചു കടത്തുന്നതായിട്ടായിരുന്നു. അന്വേഷണത്തില്‍ പ്രദേശത്ത് മരം വെട്ടിക്കടത്തിയതിന്റെ കുറ്റികള്‍ കണ്ടെത്തുകയും ചെയ്തു. ഉദ്യോഗസ്ഥര്‍ വഞ്ചിവയല്‍ വഴി പോയത് ഈ ചിത്രങ്ങള്‍ വള്ളക്കടവ് റേഞ്ച് ഓഫീസറെ കാണിക്കാനായിട്ടാണ്്. വഞ്ചിവയല്‍ അഗന്‍വാടിക്കു സമീപം ഇവരെ തടഞ്ഞ നാട്ടുകാര്‍ മര്‍ദനം അഴിച്ചുവിടുകയായിരുന്നു.

എന്നാല്‍ വനത്തിനുള്ളിലെ വിവാദമായ ഗ്രൗണ്ട് നിര്‍മാണവുമായി ബന്ധപ്പെട്ട് വന്നവരാണെന്ന തെറ്റിദ്ധാരണയിലാണ് ഉദ്യോഗസ്ഥരെ കൈയേറ്റം ചെയ്തതെന്ന് നാട്ടുകാര്‍ പറഞ്ഞു. ഉദ്യോഗസ്ഥരെ മര്‍ദിച്ചവരെ അറസ്റ്റ് ചെയ്യാതിരുന്ന സംഭവത്തില്‍ വകുപ്പിനുള്ളില്‍ പ്രതിഷേധം ശക്തമായിരുന്നു.

ഇതിനിടെയാണ് അഞ്ചുപേരുടെ അറസ്റ്റുണ്ടായത്. പ്രതികള്‍ക്കെതിരേ ഔദ്യോഗിക കൃത്യനിര്‍വഹണം തടസപ്പെടുത്തല്‍, കൈയേറ്റം ചെയ്യല്‍ തുടങ്ങിയ വകുപ്പുകളാണ് ചുമത്തിയിട്ടുള്ളത്. പ്രതികളെ കോവിഡ് പരിശോധന അടക്കമുള്ള വൈദ്യപരിശോധനകള്‍ക്ക് വിധേയരാക്കി.