മൂന്ന് വര്‍ഷത്തിനിടയില്‍ 17,000 കിലോ ഈന്തപ്പഴം എന്തിന് ഇറക്കുമതി ചെയ്തു എന്ന ചോദ്യത്തിന് ഉത്തരം തേടി കസ്റ്റംസ്. വാണിജ്യ ആവശ്യത്തിന് നയതന്ത്ര ബാഗേജ് വഴി ഈന്തപ്പഴം ഇറക്കുമതി ചെയ്യാനും കഴിയില്ല. അപ്പോപിന്നെ എന്തോ ഒരു അസ്വാഭാവികതയുണ്ട്. ഈന്തപ്പഴത്തിന്റെയും മതഗ്രന്ഥത്തിന്റേയും മറവില്‍ സ്വര്‍ണം കടത്തിയെന്നാണ് അന്വേഷണ സംഘം വിശ്വസിക്കുന്നത്. ഇതോടെയാണ് യു.എ.ഇ. കോണ്‍സുലേറ്റില്‍നിന്ന് അനധികൃതമായി മതഗ്രന്ഥവും ഈന്തപ്പഴവും വിതരണം ചെയ്ത സംഭവത്തില്‍ കസ്റ്റംസ് പ്രിവന്റീവ് വിഭാഗം കേസ് രജിസ്റ്റര്‍ ചെയ്തത്.

ഈന്തപ്പഴക്കടത്തില്‍ കസ്റ്റംസ് പ്രത്യേക സംഘത്തിന്റെ അന്വേഷണവും തുടങ്ങി. നയതന്ത്രചാനല്‍ ഉപയോഗപ്പെടുത്തിയ രണ്ടു സംഭവത്തിലും ചട്ടലംഘനമുണ്ടായെന്ന് കണ്ടെത്തിയതിനെ തുടര്‍ന്നാണിത്. മതഗ്രന്ഥങ്ങള്‍ കൈപ്പറ്റിയതില്‍ മന്ത്രി കെ.ടി. ജലീലിനെ കസ്റ്റംസ് ചോദ്യം ചെയ്യും.

നയതന്ത്രസ്ഥാപനം പാലിക്കേണ്ട ചട്ടങ്ങളൊന്നും പാലിക്കപ്പെട്ടിട്ടില്ലെന്നാണ് വിലയിരുത്തല്‍. മന്ത്രി ഉള്‍പ്പടെയുള്ള സംസ്ഥാന സര്‍ക്കാര്‍ പ്രതിനിധികളുടെ ഭാഗത്തുനിന്ന് പ്രോട്ടോക്കോള്‍ ലംഘനവും ഉണ്ടായിട്ടുണ്ട്.

അതേസമയം നിര്‍ണായക നീക്കം നടത്തുകയാണ് എന്‍ഐഎ. സ്വര്‍ണക്കടത്തില്‍ യു.എ.ഇ കോണ്‍സുലേറ്റ് ഉദ്യോഗസ്ഥരടക്കമുള്ള ഉന്നതരെ ചോദ്യം ചെയ്യണമെന്ന് എന്‍.ഐ.എ കോടതിയില്‍ വ്യക്തമാക്കി. ഒന്നാം പ്രതി പി.എസ്. സരിത്തുള്‍പ്പെടെ 16 പേരുടെ റിമാന്‍ഡ് നീട്ടാനുള്ള അപേക്ഷയിലാണിക്കാര്യമുള്ളത്. കള്ളക്കടത്ത് സമ്പാദ്യം തീവ്രവാദ പ്രവര്‍ത്തനങ്ങള്‍ക്ക് ഫണ്ട് ചെയ്യാന്‍ ഉപയോഗിച്ചിരിക്കാമെന്നും എന്‍.ഐ.എ ഡിവൈ.എസ്.പി സി. രാധാകൃഷ്ണപിള്ള സമര്‍പ്പിച്ച റിപ്പോര്‍ട്ടിലുണ്ട്.

സ്വപ്ന സുരേഷടക്കമുള്ള പ്രതികളില്‍ നിന്ന് പിടിച്ചെടുത്ത മൊബൈല്‍ ഫോണുകള്‍, ലാപ് ടോപ്പ് എന്നിവയില്‍ നിന്ന് ശേഖരിച്ച ഡിജിറ്റല്‍ തെളിവുകളുടെ അടിസ്ഥാനത്തില്‍ ഇവരെ വീണ്ടും ചോദ്യം ചെയ്യുകയാണ്.

മുഴുവന്‍ പ്രതികളും സ്വര്‍ണക്കടത്തിലെ പങ്കാളിത്തം വ്യക്തമാക്കിയിട്ടുണ്ട്. തിരുവനന്തപുരം, കോഴിക്കോട്, മലപ്പുറം എന്നിവിടങ്ങളിലായി നടത്തിയ ഗൂഢാലോചനയും തുടര്‍ നടപടികളും ഇവര്‍ വെളിപ്പെടുത്തി. വിദേശത്തും ഇന്ത്യയിലും ഗൂഢാലോചന നടത്തിയ സ്ഥലങ്ങള്‍ ഗൂഗിള്‍ മാപ്പിലൂടെ പ്രതികള്‍ ചൂണ്ടിക്കാട്ടി.മിഡില്‍ ഈസ്റ്റില്‍ നിന്ന് വന്‍തോതില്‍ സ്വര്‍ണം നയതന്ത്ര ബാഗിന്റെ മറവില്‍ ഇന്ത്യയിലേക്ക് തുടര്‍ച്ചയായി കടത്തി വ്യക്തികള്‍ക്ക് കൈമാറിയതിന് തെളിവുകളുണ്ടെന്നും എന്‍.ഐ.എ വ്യക്തമാക്കുന്നു. കഴിഞ്ഞ ദിവസം സ്വപ്ന ഒഴികെയുള്ള പ്രതികളെ കോടതിയില്‍ ഹാജരാക്കിയിരുന്നു.പി.എസ്. സരിത്ത്, സ്വപ്ന, കെ.ടി. റമീസ്, എ.എം. ജലാല്‍, സെയ്ദ് അലവി, പി.ടി. അബ്ദു, മുഹമ്മദ് അലി, കെ.ടി. ഷറഫുദീന്‍, മുഹമ്മദ് ഷഫീഖ്, ഹംസത്ത് അബ്ദുസലാം, ടി.എന്‍. സന്‍ജു, ഹംജദ് അലി എന്നീ 12 പ്രതികളുടെ റിമാന്‍ഡ് കാലാവധി ഒക്ടോബര്‍ പത്തു വരെയും സി.വി. ജിഫ്‌സല്‍, പി. അബൂബക്കര്‍, മുഹമ്മദ് അബ്ദു ഷമീം, പി.എം. അബ്ദുള്‍ ഹമീദ് എന്നീ പ്രതികളുടെ റിമാന്‍ഡ് കാലാവധി എട്ടു വരെയും നീട്ടി.

അതേസമയം സ്വര്‍ണക്കടത്ത് കേസിന്റെ അന്വേഷണ പുരോഗതി സൂക്ഷ്മമായി നിരീക്ഷിച്ച് എന്‍ഫോഴ്‌സ്‌മെന്റ് ഡയറക്ടറേറ്റിലെ ഉന്നത ഉദ്യോഗസ്ഥര്‍. കേസിന്റെ അന്വേഷണ പുരോഗതി നേരിട്ട് വിലയിരുത്തുന്നത് എന്‍ഫോഴ്‌സ്‌മെന്റ് സ്‌പെഷ്യല്‍ ഡയറക്ടര്‍ സുശീല്‍ കുമാറാണ്. കഴിഞ്ഞ ദിവസം എന്‍ഫോഴ്‌സ്‌മെന്റ് ഡയറക്ടറേറ്റ് കൊച്ചി മേഖലാ ഓഫീസില്‍ എത്തിയ സുശീല്‍കുമാര്‍ അഞ്ച് മണിക്കൂറോളമാണ് അന്വേഷണ ഉദ്യോഗസ്ഥരുമായി കൂടിക്കാഴ്ച നടത്തിയത്.

സുശീല്‍ കുമാറിന്റെ വരവ് രണ്ട് മാസം കൂടുമ്പോഴുളള പതിവ് സന്ദര്‍ശനം മാത്രമാണെന്നാണ് എന്‍ഫോഴ്‌സ്‌മെന്റ് വിശദീകരണം. എന്നാല്‍ ഈ വരവിനെ വെറും വരവായി ആരും കാണുന്നില്ല. ഇത്രയും നിര്‍ണായകമായ കേസിലെ വിശദാംശങ്ങള്‍ ശേഖരിച്ച് വേണ്ട നിര്‍ദേശം നല്‍കാനാണ് സുശീല്‍ കുമാര്‍ എത്തിയതെന്ന് വ്യക്തം. കാരണം ഈ പുലിക്കുട്ടി വന്നതിന് ശേഷമാണ് അന്വേഷണം വീണ്ടും ശക്തമായത്.