കൊച്ചിയിലെ ചാനലുകാര്‍ക്ക് ഇനി ഉറക്കമില്ലാത്ത രാത്രികളാണുള്ളത്. കസ്റ്റംസിന്റെ ചോദ്യം ചെയയലിനായി എത്തുന്ന മന്ത്രി കെടി ജലീലിന്റെ വിഷ്വലെടുക്കാനാണ് ചാനലുകാര്‍ ഉറക്കം കളഞ്ഞ് മത്സരിക്കുന്നത്. ആദ്യത്തെ തവണ ചോദ്യം ഇഡിയുടെ ചോദ്യം ചെയ്യലിന് ജലീല്‍ എത്തിയപ്പോള്‍ ഒരു മീന്‍ കുഞ്ഞുങ്ങളുമറിഞ്ഞില്ല. എന്നാല്‍ രണ്ടാം തവണ എന്‍ഐഎ ആസ്ഥാനത്ത് എത്തിയപ്പോള്‍ മനോരമ ന്യൂസിലെ റിപ്പോര്‍ട്ടറാണ് കണ്ടുപിടിച്ചത്. അത് മറ്റ് ചാനലുകാര്‍ക്ക് നാണക്കേടായി. ഇനിയങ്ങനെ സംഭവിക്കാതിരിക്കാന്‍ കൊച്ചിയില്‍ ഉറക്കമൊഴിച്ചിരിക്കാന്‍ ശ്രമിക്കുകയാണ് ചാനലുകാര്‍.

നയതന്ത്ര ബാഗേജ് വഴിയുള്ള സ്വര്‍ണക്കടത്തുമായി ബന്ധപ്പെട്ടു മന്ത്രി ജലീലിനെ കസ്റ്റംസും ചോദ്യം ചെയ്യും എന്ന വാര്‍ത്തയോടെയാണ് കൊച്ചി വീണ്ടും തിളയ്ക്കുന്നത്. ഇതിനിടെ പ്രോട്ടോക്കോള്‍ ലംഘനം സംബന്ധിച്ചു കോണ്‍സുലേറ്റിനെതിരേ കസ്റ്റംസ് കേസ് രജിസ്റ്റര്‍ ചെയ്തിട്ടുണ്ട്.

നയതന്ത്ര ചാനല്‍ വഴി എത്തിച്ച സാധനങ്ങള്‍ പുറത്തു വിതരണം ചെയ്യുന്നതു ചട്ടലംഘനമാണെന്നാണ് കസ്റ്റംസ് വൃത്തങ്ങള്‍ പറയുന്നത്.
ഇവിടെ ജലീലിനു ലഭിച്ച മതഗ്രന്ഥങ്ങള്‍ അടങ്ങിയ പാഴ്‌സല്‍ പുറത്തെ സംഘടനകള്‍ക്കു വിതരണം ചെയ്തതായി അദ്ദേഹം തന്നെ സമ്മതിച്ചിട്ടുണ്ട്.

എന്‍ഐഎ തന്നെ സാക്ഷി എന്ന നിലയിലാണ് ചോദ്യം ചെയ്തതെന്നാണ് ആരോപണങ്ങളെ പ്രതിരോധിക്കാന്‍ ജലീല്‍ ഉയര്‍ത്തിയിരിക്കുന്ന വാദം. അതേസമയം, പ്രോട്ടോക്കോള്‍ ലംഘനത്തില്‍ കസ്റ്റംസ് കേസ് രജിസ്റ്റര്‍ ചെയ്ത കേസില്‍ മന്ത്രിയുടെ പങ്ക് വ്യക്തമായാല്‍ മന്ത്രി പ്രതിസ്ഥാനത്തേക്കു വരാന്‍ സാധ്യതയുണ്ടെന്നും ചൂണ്ടിക്കാണിക്കപ്പെടുന്നു.

ഇതിനിടെ, യുഎഇ കോണ്‍സുലേറ്റ് വഴി എന്‍ഫോഴ്‌സ്‌മെന്റ് ഡയറക്ടറേറ്റ്, എന്‍ഐഎ എന്നീ ഏജന്‍സികള്‍ ചോദ്യം ചെയ്തതിനു പിന്നാലെ മൂന്നാമത്തെ ഏജന്‍സിയാണു മന്ത്രിയെ ചോദ്യംചെയ്യാന്‍ ഒരുങ്ങുന്നത്.

ജലീലിനെ ചോദ്യം ചെയ്യുന്നതിനു മുന്നോടിയായി ഇഡിക്കും എന്‍ഐഎയ്ക്കും നല്‍കിയ മൊഴി കസ്റ്റംസ് ശേഖരിക്കും. ഇവ വിശദമായി പരിശോധിച്ച ശേഷമേ മന്ത്രി ജലീലിനെ ചോദ്യം ചെയ്യുകയുള്ളൂവെന്നാണു ലഭിക്കുന്ന സൂചന. ഇന്നലെ കസ്റ്റംസ് കമ്മീഷണറും ഇഡി ഡയറക്ടറും ചര്‍ച്ച നടത്തിയിരുന്നു.

എന്‍ഐഎയ്ക്കു മുമ്പാകെ മന്ത്രി നല്‍കിയ മൊഴിയും പരിശോധിക്കും. നയതന്ത്ര ബാഗേജിലൂടെ കൊണ്ടുവരുന്നതു കോണ്‍സുലേറ്റിന്റെ ആവശ്യത്തിനുള്ള വസ്തുക്കളാണ്. ഇതു വിതരണം ചെയ്യണമെങ്കില്‍ കേന്ദ്രത്തിന്റെ അനുമതി ആവശ്യമാണ്.

ഈ സാഹചര്യത്തിലാണ് യുഎഇ കോണ്‍സുലേറ്റിനെതിരേ കേസെടുത്തത്. യുഎഇ കോണ്‍സുലേറ്റ് മന്ത്രിയെ ബന്ധപ്പെടുകയാണ് ചെയ്തതെന്നാണ് പറയുന്നത്. ഇതിന്റെ ഭാഗമായി ജലീലില്‍നിന്നു വിവരങ്ങള്‍ ശേഖരിക്കാനും കസ്റ്റംസിന് അധികാരമുണ്ട്.

മന്ത്രിയെ ചോദ്യം ചെയ്യാന്‍ കസ്റ്റംസും തയാറെടുക്കുന്ന സാഹചര്യത്തില്‍ പ്രതിപക്ഷ പാര്‍ട്ടികള്‍ വ്യാപക പ്രതിഷേധത്തിനൊരുങ്ങിയിരിക്കുകയാണ്. മന്ത്രിയുടെ രാജി ആവശ്യപ്പെട്ടുകൊണ്ടുള്ള പ്രതിഷേധം ഇതോടെ വീണ്ടും ആളിക്കത്തുമെന്നാണ് രഹസ്യാന്വേഷണ വിഭാഗം നല്‍കുന്ന മുന്നറിയിപ്പ്.

ഇഡി, എന്‍ഐഎ എന്നീ അന്വേഷണ ഏജന്‍സികള്‍ മന്ത്രിയെ ചോദ്യം ചെയ്തതിനു പിന്നാലെ 385 കേസുകളാണ് സംസ്ഥാന വ്യാപകമായി പോലീസ് രജിസ്റ്റര്‍ ചെയ്തത്. 1,131 പേരെ അറസ്റ്റ് ചെയതു. കസ്റ്റംസ് ചോദ്യം ചെയ്യല്‍കൂടി ആവുമ്പോള്‍ കേസുകളുടെ എണ്ണം ഇനിയും വര്‍ധിക്കുമെന്നാണു പോലീസ് പറയുന്നത്. അതിനിടെ കോവിഡ് മാനദണ്ഡങ്ങള്‍ പാലിച്ച് സമരം ചെയ്യുന്നവര്‍ക്കെതിരെ ശക്തമായി നടപടിയെടുക്കാന്‍ ഹൈക്കോടതിയും പറഞ്ഞിട്ടുണ്ട്. എല്ലാം കൂടിയാകുമ്പോള്‍ ഇനി വരാനിരിക്കുന്നത് വാര്‍ത്തകളുടെ ദിനമാണ്.