ആഴിമല തീരത്തെത്തിയ വന്‍തിര കവര്‍ന്നത് ഉറ്റ സുഹൃത്തുക്കളെ.... ജോണ്‍സന്റെ യാത്രയിലെ സന്തോഷം പങ്കുവയ്ക്കാനായി അവര്‍ ഒത്തുകൂടിയത് അന്ത്യയാത്രയാകുമെന്ന് ആരും കരുതിയില്ല. കണ്‍മുന്നില്‍ കടല്‍കണ്ട് വളര്‍ന്നവരും ഇണങ്ങിയും പിണങ്ങിയും കടലിനോട് കൂട്ടായവരും അങ്ങനെയുള്ള നാല് ചെറുപ്പക്കാരെയാണ് ആഴിമല തീരത്തെത്തിയ വന്‍തിര കവര്‍ന്നത്.

എംബിഎ പഠനം എന്ന സ്വപ്നം ബാക്കിയാക്കി ജോണ്‍സന്‍ ക്ലീറ്റസ് യാത്രയായത് നിശ്ചയിച്ചതിലും ഒരു ദിവസംമുമ്‌ബേ, അതും ഉറ്റ സുഹൃത്തുക്കള്‍ക്കൊപ്പം. പഠിച്ച്കുടുംബത്തിന്റെ തണലാകാമെന്ന ജോണ്‍സന്റെയും മനുവിന്റെയും മോഹങ്ങളാണ് കടലെടുത്തത്. വെള്ളിയാഴ്ച വിമാനം കയറാനിരിക്കെയാണ് ജോണ്‍സനെ വിധി തട്ടിയെടുത്തത്. വാടകവീട്ടില്‍ കഴിയുമ്‌ബോഴും കടമെടുത്തും ഓട്ടോ ഓടിച്ച് കിട്ടുന്നതുമായ തുച്ഛവരുമാനം സ്വരുക്കൂട്ടിയും മകനെ പഠിപ്പിച്ച് വലിയ നിലയിലെത്തിക്കണമെന്ന് ക്ലീറ്റസും മോഹിച്ചു.

മകന്റെ വിദേശയാത്ര സ്വപ്നം കണ്ടുനടന്ന അവര്‍ കേട്ടത് വിയോഗത്തിന്റെ വാര്‍ത്ത. സന്തോഷത്തിന്റെയും ആഹ്ലാദത്തിന്റെയും നിമിഷങ്ങള്‍ സങ്കടത്തിനും കൂട്ടനിലവിളിക്കും വഴിമാറി. മനുവും അടുത്ത മാസം ഉപരിപഠനത്തിന് വിദേശത്തേക്ക് പോകാനുള്ള തയ്യാറെടുപ്പിലായിരുന്നു. ജോണ്‍സന്റെ യാത്രയിലെ സന്തോഷം പങ്കുവയ്ക്കാനായിരുന്നു പത്തുപേരുള്ള സുഹൃദ്‌സംഘം വ്യാഴാഴ്ച വൈകിട്ട് കടല്‍ക്കരയില്‍ ഒത്തുചേര്‍ന്നത്.

ആഴിമല ക്ഷേത്രത്തിനു താഴെ കടല്‍ത്തീരത്ത് അവര്‍ ഇരിപ്പുറപ്പിച്ചു. വൈകുന്നേരങ്ങളിലെ കാല്‍പ്പന്ത് കളി വിദേശത്ത് പോയാല്‍ നടക്കില്ലെന്നതുള്‍പ്പെടെ കുഞ്ഞുകുഞ്ഞു വിഷമം ജോണ്‍സണ്‍ പങ്കുവച്ചു. ഇതിനിടെ കടല്‍വെള്ളത്തില്‍ കാല്‍ കഴുകാന്‍ ശ്രമിച്ച ജോണ്‍സനെ വീശിയടിച്ച വന്‍തിര വലിച്ചെടുത്തു. പ്രിയപ്പെട്ടവനെ രക്ഷിക്കാന്‍ സന്തോഷും സാബുവും മനുവും നിക്കോള്‍സണും അപകടം മറന്ന് തിരയിലേക്ക് ചാടി. ചൂണ്ടയിടുകയായിരുന്ന മത്സ്യത്തൊഴിലാളി എറിഞ്ഞുകൊടുത്ത കയറില്‍ രണ്ടുതവണ ശ്രമിച്ചെങ്കിലും മൂന്നാംതവണ നിക്കോള്‍സന് പിടിവള്ളിയായി.ഇതിനിടെ മറ്റ് നാല് പേരെയും കടലെടുത്തു. തൊട്ടുമുമ്പുവരെ കളിചിരിയുയര്‍ന്ന സംഘത്തില്‍ ആര്‍പ്പുവിളികള്‍ ബാക്കിയായി. ഇനിയും കിട്ടാത്ത രണ്ടുപേര്‍ക്കുവേണ്ടി തെരച്ചില്‍ തുടരുന്നു. കടല്‍ കടക്കാനാഗ്രഹിച്ചവരെ കടലെടുത്തത് എല്ലാവരേയും സങ്കടക്കടലിലാക്കി.