2018 മേയ് ഏഴിന് കോതമംഗലത്തെ ബാറിലുണ്ടായ സംഘര്‍ഷത്തെത്തുടര്‍ന്ന് കുത്തുകുഴി വലിയപാറ പാറപ്പുറത്ത് ചാക്കോയുടെ മകന്‍ ബിനു(27) മരിക്കാനിടയായ സംഭവത്തില്‍ നാലു പ്രതികള്‍ക്ക് 10 വര്‍ഷം തടവ് ശിക്ഷ. അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് ജഡ്ജി കെ.എന്‍. പ്രഭാകരനാണ് വിധി പ്രസ്താവിച്ചത്.

അക്രമി സംഘവുമായി നേരത്തെ ഉണ്ടായ പ്രശ്നങ്ങളുടെ വൈരാഗ്യമാണ് തര്‍ക്കത്തിലും കത്തികുത്തിലും കലാശിച്ചത്. പ്രതികള്‍ മുമ്പ് പലകേസുകളില്‍ ഉള്‍പ്പെട്ടിട്ടുള്ളവരാണ്.

കോതമംഗലത്തുള്ള സ്വകാര്യ ബാറില്‍ മദ്യപിക്കുന്നതിനിടെ വാക്കുതര്‍ക്കം ഉണ്ടാകുകയും കത്തികുത്തില്‍ കലാശിക്കുകയായിരുന്നു. കുത്തേറ്റ് ഗുരുതരമായി പരുക്കു പറ്റിയ ബിനു പിറ്റേദിവസം ആശുപത്രിയിലാണ് മരിച്ചത്.

കേസിലെ ഒന്നാം പ്രതി കോട്ടയം മീനച്ചില്‍ ഇരുമപ്രകര പാറശ്ശേരില്‍ വീട്ടില്‍ സാജന്‍ സാമുവല്‍ (42), രണ്ടാം പ്രതി മീനച്ചല്‍ പൂവരണി കാഞ്ഞിരത്തിങ്കല്‍ വീട്ടില്‍ ജിജോ ജോര്‍ജ് (34), മൂന്നാം പ്രതി കോതമംഗലം തലക്കോട് അള്ളുങ്കല്‍ ഒരേക്കര്‍ ഭാഗം മറ്റത്തില്‍ വീട്ടില്‍ ബേസില്‍ ജോര്‍ജ് (25), അഞ്ചാം പ്രതി നെല്ലിക്കുഴി കൂമുള്ളുംചാലില്‍ (തണ്ടാലത്തുകുടി) മുന്ന എന്നു വിളിക്കുന്ന രാഹുല്‍ (25) എന്നിവര്‍ക്കെതിരേയാണ് 10 വര്‍ഷം തടവും 10,000 രൂപ പിഴയും ശിക്ഷ വിധിച്ചത്. നാലാം പ്രതി പ്രായപൂര്‍ത്തിയാകാത്ത കുട്ടിയെ ശിക്ഷയില്‍ നിന്നും ഒഴിവാക്കി.

പ്രോസിക്യൂഷന്‍ 26 സാക്ഷികളേയും 49 രേഖകളും ഒമ്പത് തൊണ്ടികളും കോടതിയില്‍ ഹാജരാക്കി. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടര്‍ അഡ്വ. അഭിലാഷ് മധു ഹാജരായി. കോതമംഗലം സര്‍ക്കിള്‍ ഇന്‍സ്പെക്ടറായിരുന്ന അഗസ്റ്റിന്‍ ജോസഫാണ് കേസന്വേഷണം നടത്തി കുറ്റപത്രം സമര്‍പ്പിച്ചത്.