കണ്ണൂരില്‍ മാനസിക വൈകല്യമുള്ള 22കാരിയെ മൂന്ന് പേര്‍ ചേര്‍ന്ന് പീഡിപ്പിച്ചു. ശനിയാഴ്ച വൈകിട്ടാണ് സംഭവം നടന്നത്. സംഭവത്തില്‍ സിയാദ്, അബൂബക്കര്‍, മുഹമ്മദ് ബാഷ എന്നിവരെ ശ്രീകണ്ഠപുരം പൊലീസ് അറസ്റ്റു ചെയ്തു. കടയില്‍ സാധനങ്ങള്‍ വാങ്ങാന്‍ പോയ യുവതിയെ സിയാദ് പ്രലോഭിപ്പിച്ച് ബൈക്കില്‍ കയറ്റി അരിബ്രചുഴലി റോഡരികിലെ ആളൊഴിഞ്ഞ ഷെഡിലെത്തിച്ച് പീഡിപ്പിക്കുകയായിരുന്നു.

ഇയാള്‍ അറിയിച്ചതിനെ തുടര്‍ന്ന് ഓട്ടോറിക്ഷയില്‍ സ്ഥലത്തെത്തിയ മുഹമ്മദ് ബാഷയും അബൂബക്കറും യുവതിയെ പീഡിപ്പിച്ചു. നേരത്തെയും നിരവധി കേസുകളില്‍ പ്രതിയാണ് സിയാദ്. യുവതിയെ കാണാത്തതിനാല്‍ വീട്ടുകാര്‍ പൊലീസില്‍ പരാതി നല്‍കിയിരുന്നു. തുടര്‍ന്ന് നടത്തിയ അന്വേഷണത്തിലാണ് പീഡനവിവരം പുറത്തറിഞ്ഞത്. പ്രതികളെ റിമാന്‍ഡ് ചെയ്തു.