ഓഹരി വിപണിയിൽ കുതിച്ചുചാട്ടം. ഈ വാരത്തിന്റെ തുടക്കമായ ഇന്ന് വ്യാപാരത്തിന്റെ ആരംഭത്തിൽ തന്നെ സെൻസെക്‌സ് 1000ലധികം പോയിന്റാണ് മുന്നേറിയത്. 75,000ന് മുകളിലാണ് സെൻസെക്‌സ്. നിഫ്റ്റി 23,300 എന്ന സൈക്കോളജിക്കൽ ലെവലിന് മുകളിലാണുള്ളത്.

ആഗോള വിപണിയിൽ എണ്ണവില കുറഞ്ഞതും റിലയൻസ് ഇൻഡസ്ട്രീസിന്റെ സെപ്റ്റംബർ പാദ ഫല കണക്കുകൾ പ്രതീക്ഷിച്ചതിനേക്കാൾ മികച്ചതായതുമാണ് വിപണിയിൽ പ്രതിഫലിച്ചത്.

ഇന്ത്യ മുഖ്യമായി ആശ്രയിക്കുന്ന ബ്രെൻഡ് ക്രൂഡ് വില ബാരലിന് 110 ഡോളറിൽ താഴെയാണ്. ഇന്ന് മാത്രം മൂന്ന് ശതമാനത്തിലധികമാണ് താഴ്ന്നത്. ഇന്ന് ഓഹരി വിപണിയുടെ ആരംഭത്തിൽ തന്നെ നിക്ഷേപർക്ക് 3.5 ലക്ഷം കോടി രൂപയുടെ നേട്ടമാണുണ്ടായത്. റിലയൻസ് ഇൻഡസ്ട്രീസ് തന്നെയാണ് ഏറ്റവുമധികം നേട്ടമുണ്ടാക്കിയ ഓഹരി. ഇന്ന് ഉയർന്നത് ആറുശതമാനമാണ്.

വിദേശ നിക്ഷേപകർ വെള്ളിയാഴ്ച 3598 കോടിയുടെ ഓഹരികളാണ് വാങ്ങിക്കൂട്ടിയത്. റിലയൻസിന് പുറമേ ഭാരതി എയർടെൽ, എച്ച്ഡിഎഫ്‌സി ബാങ്ക്, മാക്‌സ് ഹെൽത്ത്‌കെയർ, ഇൻഫോസിസ് ഓഹരികളും നേട്ടമുണ്ടാക്കി.