കോടതിയിൽ സൂക്ഷിച്ചിരിക്കുന്ന തെളിവുകൾ പോലും സുരക്ഷിതമല്ലേ? എറണാകുളം ജില്ലാ കോടതിയിൽ നിന്ന് ലക്ഷങ്ങൾ വിലമതിക്കുന്ന റാഡോ വാച്ച് ഉൾപ്പെടെ 124 തൊണ്ടിമുതലുകൾ കാണാതായ സംഭവം വലിയ ചർച്ചയാകുന്നു. ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി രണ്ടിന്റെ പരിഗണനയിലുണ്ടായിരുന്ന തൊണ്ടിമുതലുകളാണ് മോഷണം പോയതായി കണ്ടെത്തിയിരിക്കുന്നത്.

2016 മുതൽ 2026 വരെയുള്ള കാലയളവിലെ കേസുകളുമായി ബന്ധപ്പെട്ട തൊണ്ടിമുതലുകളാണ് കാണാതായത്. ലക്ഷങ്ങൾ വിലയുള്ള ആഡംബര റാഡോ വാച്ചിന് പുറമെ മറ്റ് വിലപിടിപ്പുള്ള വസ്തുക്കളും ഇതിൽ ഉൾപ്പെടുന്നുണ്ട്. കോടതിയിലെ സ്ട്രോങ് റൂമിൽ സൂക്ഷിച്ചിരുന്ന തൊണ്ടിമുതലുകളാണ് നഷ്ടപ്പെട്ടത്.

സംഭവം ശ്രദ്ധയിൽപ്പെട്ടതിനെ തുടർന്ന് ജൂനിയർ സൂപ്രണ്ട് കോടതിയെ വിവരം അറിയിക്കുകയായിരുന്നു. തുടർന്ന് കോടതിയുടെ നിർദേശപ്രകാരം എറണാകുളം സെൻട്രൽ പൊലീസിൽ പരാതി നൽകി. പരാതിയുടെ അടിസ്ഥാനത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഒരു കേസുമായി ബന്ധപ്പെട്ട 124 തൊണ്ടിമുതലുകളാണ് കാണാതായതെന്നാണ് പുറത്തുവരുന്ന വിവരം.

എന്നാൽ എറണാകുളം ജില്ലാ കോടതിയിൽ ഇത്തരമൊരു സംഭവം ഉണ്ടാകുന്നത് ഇതാദ്യമല്ല. നേരത്തെ അഭിമന്യു കൊലക്കേസുമായി ബന്ധപ്പെട്ട കുറ്റപത്രം ഉൾപ്പെടെയുള്ള 11 പ്രധാന രേഖകൾ കോടതിയിൽ നിന്ന് കാണാതായിരുന്നു. പിന്നീട് പ്രോസിക്യൂഷന്റെയും പൊലീസിന്റെയും കൈവശമുള്ള പകർപ്പുകൾ ഉപയോഗിച്ച് രേഖകൾ പുനർനിർമിക്കാൻ ഹൈക്കോടതി ഉത്തരവിട്ടിരുന്നു.

തലശേരി ഫസൽ വധക്കേസിലും നിർണായക തെളിവായ രക്തം പുരണ്ട തൂവാല കോടതിയിൽ നിന്ന് കാണാതായ സംഭവം വലിയ വിവാദമായിരുന്നു. തൂവാല സൂക്ഷിച്ചിരുന്ന മുദ്രവച്ച കവറിന് പുറത്ത് 'എലി കൊണ്ടുപോയി' എന്ന് രേഖപ്പെടുത്തിയിരുന്നതും അന്ന് വലിയ വാർത്തയായി. പിന്നീട് തൂവാല കോടതിയിൽ നിന്നുതന്നെ കണ്ടെത്തിയെന്നായിരുന്നു ജീവനക്കാരുടെ വിശദീകരണം.

ഇപ്പോൾ എറണാകുളം ജില്ലാ കോടതിയിൽ വീണ്ടും തൊണ്ടിമുതലുകൾ കാണാതായതോടെ കോടതികളിലെ തെളിവുകളുടെ സുരക്ഷയെക്കുറിച്ച് ഗൗരവമായ ചോദ്യങ്ങളാണ് ഉയരുന്നത്. ഇത്രയും വിലപിടിപ്പുള്ള വസ്തുക്കൾ സ്ട്രോങ് റൂമിൽ നിന്ന് എങ്ങനെ കാണാതായി? സംഭവത്തിന് പിന്നിൽ ആരാണ്? പൊലീസിന്റെ അന്വേഷണത്തിൽ കൂടുതൽ വിവരങ്ങൾ പുറത്തുവരുമോ? ഉറ്റുനോക്കുകയാണ് കേരളം.