സംസ്ഥാനത്ത് കോവിഡ് വ്യാപനം രൂക്ഷമാകുന്ന പശ്ചാത്തലത്തില്‍ മുഖ്യമന്ത്രി പിണറായി വിജയന്റെ അധ്യക്ഷതയില്‍ ഓണ്‍ലൈനായി ഇന്നു വൈകുന്നേരം 4.30 നു സര്‍വകക്ഷിയോഗം ചേരും. തിരുവനന്തപുരം, കോഴിക്കോട്, മലപ്പുറം ജില്ലകളില്‍ കോവിഡ് രോഗികളുടെ എണ്ണത്തില്‍ പ്രതിദിനം വന്‍ വര്‍ധനയാണുണ്ടായിരിക്കുന്നത്. ഈ സാഹചര്യത്തില്‍ ഭാഗിക ലോക്ക്ഡൗണ്‍ ഉള്‍പ്പെടെയുള്ള കാര്യങ്ങള്‍ ചര്‍ച്ച ചെയ്യാനായാണ് ഇന്നു സര്‍വകക്ഷിയോഗം വിളിച്ചിരിക്കുന്നത്. സമ്പൂര്‍ണ അടച്ചിടല്‍ ശാശ്വത പരിഹാരമല്ലെങ്കിലും കൈവിട്ടു പോകുന്ന സ്ഥിതിയുണ്ടായാല്‍ അതും വേണ്ടിവരും.

വീണ്ടുമൊരു ലോക്ക് ഡൗണ്‍ ജനങ്ങള്‍ എങ്ങനെ ഉള്‍ക്കൊള്ളുമെന്നതില്‍ സര്‍ക്കാരിനും ആശങ്കയുണ്ട്. ഇക്കാര്യങ്ങള്‍ ഇന്ന് ചര്‍ച്ച ചെയ്യും. പ്രതിപക്ഷ സമരങ്ങള്‍ ഒഴിവാക്കണമെന്ന ആവശ്യവും സര്‍ക്കാര്‍ മുന്നോട്ടുവയ്ക്കും. ഇന്നലെ അവലോകനയോഗത്തില്‍ കളക്ടര്‍മാരും ജില്ലാ പൊലീസ് മേധാവികളും ഓരോ ജില്ലയിലെയും ഗുരുതര സ്ഥിതി വിവരിച്ചു. 20 ദിവസം കൂടുമ്‌ബോള്‍ രോഗികളുടെ എണ്ണം ഇരട്ടിക്കുകയാണെന്ന് ആരോഗ്യ വിദഗ്ദ്ധര്‍ പറഞ്ഞു. കൊവിഡ് നിയന്ത്രണങ്ങള്‍ നടപ്പാക്കുന്നതില്‍ നിന്ന് ക്രമസമാധാന പാലനത്തിലേക്ക് പൊലീസ് മാറിയത് സ്ഥിതി ഗുരുതരമാക്കിയെന്നാണ് പൊതു വിലയിരുത്തല്‍.

വരും ദിവസങ്ങളില്‍ പൊലീസ് ഇടപെടല്‍ കര്‍ശനമാക്കും. പൊതുയിടങ്ങളിലെല്ലാം പൊലീസ് സാന്നിദ്ധ്യമുണ്ടാകും.