ചികിത്സിക്കാനെന്ന പേരിൽ വീടുകളിൽ കയറിക്കൂടി മോഷണം നടത്തുന്ന വ്യാജ വൈദ്യൻ അറസ്റ്റിലായി . തിരുമല കുന്നപ്പുഴ പുതുവൽ പുരയിടം വീട്ടിൽ ഡി. അനിൽകുമാർ എന്ന 48വയസ്സുകാരനെയാണ് വട്ടപ്പാറ പൊലീസ് അറസ്റ്റ് ചെയ്തത് . വെമ്പായം പെരുംകൂർ കടയിൽ വീട്ടിൽ എ. വിജയമ്മയുടെ വീട്ടിൽ നിന്നു മൂന്നര പവൻ, മൊബൈൽ ഫോൺ എന്നിവ ചികിത്സയുടെ പേരിൽ കവർന്നു എന്ന പരാതിയിലാണ് അറസ്റ്റ്.

വിജയമ്മ നടത്തുന്ന ഹോട്ടലിൽ അനിൽകുമാർ പലവട്ടം വരികയും വ്യാജപ്പേരും സ്ഥലവും പറഞ്ഞ് പരിചയപ്പെടുകയുമായിരുന്നു. വൈദ്യനാണെന്നും ജയമ്മയുടെ ഇടതു കൈക്കുള്ള സ്വാധീനക്കുറവ് മാറ്റിക്കൊടുക്കാമെന്നും ഉറപ്പു നൽകി വിശ്വാസം പിടിച്ചെടുത്തു .തുടർന്ന് രണ്ടു ദിവസം വീട്ടിലെത്തി ചികിത്സ നടത്തുകയും ചെയ്തു . മൂന്നാം ദിവസവും എത്തിയ അനിൽകുമാർ താൻ തരുന്ന എണ്ണ സ്വർണത്തിൽ പുരണ്ടാൽ മാറ്റു കുറയുമെന്നും ആഭരണങ്ങൾ ഊരി മേശയ്ക്കുള്ളിൽ വയ്ക്കാനും പറഞ്ഞുവത്രേ .

തുടർന്ന് വിജയമ്മയോട് അകത്തു പോയി വിശ്രമിക്കാൻ പറഞ്ഞ ശേഷം മേശയ്ക്കുള്ളിൽ നിന്നു മാലയും രണ്ടു ലോക്കറ്റുകളും, മൊബൈൽ ഫോണും ഒപ്പം വൈദ്യന്റെ ഫോൺ നമ്പർ കുറിച്ചിട്ട ഡയറിയും കൊണ്ടുപോയി. വട്ടിയൂർക്കാവിൽ യുവതിയുടെ കമ്മലുകൾ കവർന്ന കേസിലും പ്രതിയാണ് ഇയാൾ