വരുന്ന നിയമസഭാ തെരഞ്ഞെടുപ്പില്‍ മിനിമം ഏഴ് സീറ്റ് നല്‍കാമെന്ന് വീരേന്ദ്രകുമാറിന് കോടിയേരിയുടെ വാഗ്ദാനം. വീരന് അടുത്ത ലോക്‌സഭ തെരഞ്ഞെടുപ്പില്‍ കോഴിക്കോട് സീറ്റും നല്‍കും. എന്നാല്‍ വീരന്‍ കോടിയേരിക്ക് വ്യക്തമായ ഒരു മറുപടി നല്‍കിയില്ല.
വീരേന്ദ്രകുമാര്‍ ഇടത്തേക്ക് തിരിയുന്നു എന്ന വാര്‍ത്തയ്ക്ക് ഏതാനും മാസങ്ങളുടെ പഴക്കമുണ്ട്. മന്ത്രിക്കല്യാണത്തിന് കോഴിക്കോട്ടെത്തിയ പ്രതിപക്ഷ നേതാവ് വിഎസ് അച്യുതാനന്ദന്‍ വീരനെ കണ്ടതോടെയാണ് കാര്യങ്ങള്‍ മാറി മറഞ്ഞത്. തൊട്ടു പിന്നാലെ സിപിഎം വേദിയില്‍ വീരേന്ദ്രകുമാര്‍ പ്രത്യക്ഷനായി. അതിനു പിന്നാലെ വീരനെ കാണാന്‍ കോടിയേരിയും വന്നു.
വീരനും കോടിയേരിയും അടച്ച മുറിയില്‍ നടത്തിയ ചര്‍ച്ചയില്‍ തന്ത്രപ്രധാനമായ പല കാര്യങ്ങളും ചര്‍ച്ചയ്ക്ക് വന്നുവെന്നാണ് അറിവ്. പിണറായിയുമായി തെറ്റി എല്‍ഡിഎഫ് വിട്ടതില്‍ താന്‍ ദുഖിതനാണെന്ന് വീരന്‍ പറഞ്ഞതായി കോടിയേരിയുടെ വിശ്വസ്തന്‍ പറയുന്നു. താത്വിക നിലപാടുകളുള്ള ഒരു മുന്നണി വിട്ട് അഴിമതി ഭരണത്തില്‍ പങ്കു ചേര്‍ന്നതിനെ കുറിച്ച് വീരന്‍ ഖിന്നനാണത്രേ.
വീരനെ പാലക്കാട് തോല്‍പ്പിച്ചതാണെന്ന് കോടിയേരിയും പറഞ്ഞു. പാലക്കാട്ട് എം ബി രാജേഷിന് ലഭിച്ചത് കോണ്‍ഗ്രസ് വോട്ടുകളാണ്. അദ്ദേഹത്തിനു ലഭിച്ച ഭൂരിപക്ഷത്തിന്റെ അടിസ്ഥാനം തന്നെ ഇതാണ്. വീരന്‍ എല്ലാം നിശബ്ദമായി കേട്ടിരുന്നു.
മന്ത്രി കെ പി മോഹനനും ജനതാദള്‍ സിപിഎമ്മിലെത്തുന്നതിനോടാണ് താല്പര്യം. കാരണം കൂത്തു പറമ്പ് മണ്ഡലം സിപിഎം ചായവ് പുലര്‍ത്തുന്ന നിയമസഭാ മണ്ഡലമാണ്.
കോഴിക്കോട്ടോ വയനാട്ടോ തനിക്ക് കിട്ടിയിരുന്നെങ്കില്‍ ജയിക്കാമായിരുന്നു എന്നാണ് വീരന്‍ കോടിയേരിയാണ് പറഞ്ഞത്. ഉമ്മന്‍ചാണ്ടിയുടെ തരികിടകളും കോടിയേരി വീരനോട് പറഞ്ഞത്രേ. ഏതായാലും ജനതാദളും കോണ്‍ഗ്രസും തമ്മിലുള്ള ബന്ധത്തില്‍ വിള്ളല്‍ വീഴ്ത്താന്‍ കഴിഞ്ഞതില്‍ സന്തുഷ്ടനാണ് കോടിയേരി. മാതൃഭൂമിയില്‍ നിന്നും കോഴിക്കോട് ഗസ്റ്റ് ഹൗസില്‍ മടങ്ങിയെത്തിയ കോടിയേരി ആഹ്ലാദചിത്തനായി കാണപ്പെട്ടതിന്റെ ഗുട്ടന്‍സ് ഇതാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha