എത്ര അനുസരണയുള്ള കുട്ടിയായി ഇഡിയുമായി കളിച്ച് ചിരിച്ച് നടന്ന ബിനീഷ് കോടിയേരിയുടെ സ്വഭാവത്തില്‍ ഇന്നലെ വലിയ മാറ്റം. പുറം ലോകം കാണാതെ ഇഡി കടുപ്പിച്ചപ്പോള്‍ അത് താങ്ങാന്‍ ബിനീഷിന് കഴിഞ്ഞില്ല. ഇന്നലെ രാവിലെ എട്ടരയോടെ ഇ.ഡി ഓഫിസില്‍ എത്തിച്ചപ്പോള്‍ മുതല്‍ അത് വ്യക്തമായി. മറ്റുള്ള കുറ്റവാളികളെ പോലെ ഷര്‍ട്ടിന്റെ കോളറില്‍ പൊക്കിയെടുത്ത് കൊണ്ടുവരാന്‍ ശ്രമിച്ച ഉദ്യോഗസ്ഥനോട് ബിനീഷ് കയര്‍ത്തു. താനാരാണെന്നറിയാമോയെന്ന ഭാവം. എന്നാല്‍ അതൊക്കെ കേരളത്തിലേ നടക്കൂ എന്ന പോലെയാണ് കാര്യങ്ങള്‍ നടന്നത്. നടുവില്‍ താങ്ങിപ്പിടിച്ച് ബിനീഷ് ആശുപത്രിയിലേക്കോടുന്ന കാഴ്ചയാണ് പിന്നെ കണ്ടത്.

ഇഡി പൊന്നനുജനെ പൊരിച്ചെടുത്തെന്നാണ് ആശുപത്രിയിലെത്തിയ ബിനോയ് കോടിയേരി പറഞ്ഞത്. എന്നാല്‍ ബിനോയിയേയും വക്കീലന്‍മാരേയും ബിനീഷിനെ കാണാന്‍ ഇന്നലേയും ഇഡി അനുവദിച്ചില്ല

ലഹരി മരുന്ന് കേസില്‍ ഇ.ഡി ബംഗളുരു മേഖലാ ഓഫീസില്‍ നാലു ദിവസമായി തുടര്‍ന്ന ചോദ്യം ചെയ്യലിനിടെയാണ് ബിനീഷ് കോടിയേരിക്ക് ഇന്നലെ ദേഹാസ്വാസ്ഥ്യമുണ്ടായത്. തുടര്‍ന്ന് വിക്‌ടോറിയ ആശുപത്രിയിലെത്തിച്ചെങ്കിലും കുഴപ്പമില്ലെന്ന് വ്യക്തമായതോടെ രണ്ടു മണിക്കൂറിന് ശേഷം ശാന്തിനഗറിലെ ഇ.ഡി ഓഫീസിലേക്ക് മടക്കികൊണ്ടുവന്നു. പിന്നീട് ചോദ്യം ചെയ്യാതെ വില്‍സണ്‍ ഗാര്‍ഡന്‍ സ്‌റ്റേഷനിലെ ലോക്കപ്പിലേക്ക് മാറ്റി. ഇന്ന് ചോദ്യംചെയ്യല്‍ തുടരും.

ഇന്നലെ ചോദ്യം ചെയ്യല്‍ അഞ്ചര മണിക്കൂര്‍ പിന്നിട്ടപ്പോള്‍ വൈകിട്ട് നാലു മണിയോടെയാണ് നടുവേദനയും വയറുവേദനയും ഉണ്ടെന്ന് ബിനീഷ് അറിയിച്ചത്. ഇ.ഡി ഓഫീസിന്റെ മൂന്നാം നിലയില്‍ നിന്ന് ലിഫ്റ്റില്‍ താഴെയിറക്കിയ ബിനീഷ് ആശുപത്രിയിലേക്ക് പോകാന്‍ നടന്നാണ് ഇ.ഡിയുടെ കാറില്‍ കയറിയത്. വയറിലും നടുവിനും കൈ അമര്‍ത്തിയാണ് നടന്നത്. അടുത്തുള്ള ഗവ.വിക്ടോറിയ ആശുപത്രിയിലാണ് ആദ്യം എത്തിച്ചത്. കൊവിഡ് ആശുപത്രിയായതിനാല്‍ അവിടെ പ്രവേശിപ്പിച്ചില്ല. റഫറന്‍സ് വാങ്ങി ബിനീഷിനെ നഗരത്തിലെ ബൗറിംഗ് ആശുപത്രിയിലേക്ക് മാറ്റി. അവിടെ രണ്ടുമണിക്കൂര്‍ നിരീക്ഷണത്തിനു ശേഷം സ്‌കാനിംഗ് സെന്ററിലെത്തിച്ചു. അവിടേക്കും നടന്നാണ് കയറിയത്. നടുവിന് കുഴപ്പമില്ലെന്ന് പരിശോധനയില്‍ വ്യക്തമായി. വയറിലെ സ്‌കാനിംഗിലും പ്രശ്‌നങ്ങളൊന്നും കണ്ടില്ല. ഇതോടെയാണ് മടക്കിക്കൊണ്ടുവന്നത്.

ആശുപത്രിയിലെത്തിയ സഹോദരന്‍ ബിനോയ് കോടിയേരിയെയും അഭിഭാഷകരെയും ബിനീഷിനെ കാണാന്‍ അനുവദിച്ചില്ല. മാദ്ധ്യമങ്ങളെയും കടത്തിവിട്ടില്ല.

ഇന്ന് കസ്റ്റഡി കാലാവധി കഴിയുന്ന ബിനീഷിനെ ഇതുവരെ 33മണിക്കൂറിലേറെ ചോദ്യംചെയ്തു. ലഹരി മരുന്ന് കേസില്‍ അറസ്റ്റിലായ എറണാകുളം വെണ്ണല സ്വദേശി അനൂപ് മുഹമ്മദുമായുള്ള പണമിടപാടിനെ പറ്റിയാണ് ഇന്നലെയും ചോദ്യം ചെയ്തത്. മിക്ക ചോദ്യങ്ങളോടും ബിനീഷ് പ്രതികരിച്ചില്ല. ബി കാപ്പിറ്റല്‍ സര്‍വ്വീസ്, ബി കാപ്പിറ്റല്‍ ഫോറക്‌സ് ട്രേഡ് െ്രെപവറ്റ് ലിമിറ്റഡ് എന്നീ കമ്പനികള്‍ രൂപീകരിച്ചത് കള്ളപ്പണം വെളുപ്പിക്കാനായിരുന്നുവെന്നാണ് ഇ.ഡിയുടെ സംശയം. ഇതേപറ്റി വിശദമായി ചോദിക്കുന്നതിനിടെയാണ് ദേഹാസ്വാസ്ഥ്യം ഉണ്ടെന്ന് അറിയിച്ചത്.അനൂപിന് ലഹരി മരുന്ന് ഇടപാടിനായി ബിനീഷ് ലക്ഷങ്ങള്‍ നല്‍കിയെന്ന സംശയത്തെ തുടര്‍ന്ന് നാര്‍ക്കോട്ടിക് കണ്‍ട്രോള്‍ ബ്യൂറോയും അന്വേഷണം നടത്തുന്നുണ്ട്. അവരും ചോദ്യം ചെയ്യലിന്റെ ഭാഗമായി. അടുത്ത ദിവസം ഈ കേസിലും ബിനീഷിനെ പ്രതിയാക്കുമെന്ന സൂചനയുണ്ട്. ഇ.ഡിയുടെ കസ്റ്റഡി പൂര്‍ത്തിയാക്കുന്ന മുറയ്ക്കായിരിക്കും നടപടികള്‍.അനൂപിന്റെ അക്കൗണ്ടിലേക്ക് എത്തിയ 60 ലക്ഷം രൂപയില്‍ ബിനീഷിന്റെ നിര്‍ദ്ദേശപ്രകാരവും തുകയെത്തി. അനൂപ് തന്നെയാണ് ഇക്കാര്യം വെളിപ്പെടുത്തിയത്. ഈ മൊഴിക്കുരുക്കില്‍ ബിനീഷിന് വ്യക്തമായ മറുപടി നല്‍കാന്‍ കഴിഞ്ഞിട്ടില്ല.അനൂപ്, ബിനീഷ് എന്നിവരുടെ മലയാള ചലച്ചിത്ര മേഖലയുമായുള്ള ബന്ധവും ഇ.ഡി. അന്വേഷിച്ചു തുടങ്ങി. ഇവര്‍ ചില സിനിമകളില്‍ പണം മുടക്കിയെന്നാണ് ഇ.ഡിക്ക് വിവരം ലഭിച്ചത്. ഇതും കള്ളപ്പണം വെളുപ്പിക്കലിന്റെ ഭാഗമായാണോയെന്നാണ് പരിശോധിക്കുന്നത്. എന്തായാലും ഒന്നിന് പുറകേ മറ്റൊന്നായി ബിനീഷിന് കുരുക്ക് മുറുകുകയാണ്.