ആരെങ്കിലും പച്ചവെള്ളമാണ് ഇരിക്കട്ടെ എന്ന് പറഞ്ഞ് തന്നാലും മാനമുള്ളവരാരും വാങ്ങരുത് എന്ന വലിയ സിദ്ധാന്തമാണ് സ്വപ്ന നല്‍കിയ ഐ ഫോണിലൂടെ തെളിയുന്നത്. ഐ ഫോണ്‍ കൈയ്യില്‍ കിട്ടിയ സമയത്ത് തുള്ളിച്ചാടി ഉപയോഗിക്കാനറിയാതെ യുവ തലമുറയ്ക്ക് കൈമാറിയവരുമുണ്ട്. ആ തുള്ളിച്ചാടിയവര്‍ ഇപ്പോള്‍ പേടിച്ച് തുള്ളുകയാണ്. മാന്ത്രികനായ മാന്‍ഡ്രോക്ക് എന്ന സിനിമ പോലെയായി ഐ ഫോണ്‍ കിട്ടിയവരുടെ അവസ്ഥ. സന്തോഷം നിലനിര്‍ത്താന്‍ ഐ ഫോണ്‍ മറ്റുള്ളവരുടെ തലയില്‍ കെട്ടി വയ്ക്കാനാണ് നോക്കുന്നത്. അതോടെ സ്വപ്ന കൊടുത്ത ഐ ഫോണെല്ലാം നിങ്ങള്‍ വിളിക്കുന്ന സസ്‌ക്രൈബര്‍ പരിധിക്ക് പുറത്തായി.

അതേസമയം യു.എ.ഇ. കോണ്‍സുലേറ്റിലേക്കായി യൂണിടാക് ഉടമ സന്തോഷ് ഈപ്പന്‍ വാങ്ങിനല്‍കിയത് ആറല്ല, ഏഴ് ഐഫോണുകള്‍ ആണെന്ന സത്യവും പുറത്തായി. അതിലൊരു ഫോണ്‍ ഉപയോഗിക്കുന്നത് സന്തോഷ് ഈപ്പന്‍ തന്നെയാണെന്നും വ്യക്തമായി.

ഏഴില്‍ ആറു ഫോണിന്റെയും ഉപയോക്താക്കളെ ഇ.ഡി. കണ്ടെത്തി. ശേഷിക്കുന്ന ഒരുഫോണില്‍ ബി.എസ്.എന്‍.എല്‍. നമ്പറാണ് ഉപയോഗിക്കുന്നത്. ഇത് ജിത്തു എന്നുപേരുള്ള ആളാണെന്നാണു സൂചന. അതേ സമയം ഈ ഫോണിനെ ചുറ്റിപ്പറ്റിയുള്ള പല കഥകളും പൊങ്ങുന്നുണ്ട്.

യു.എ.ഇ. ദേശീയ ദിനാഘോഷത്തിനെത്തുന്ന അതിഥികള്‍ക്ക് സമ്മാനിക്കാന്‍ സ്വപ്‌നാ സുരേഷിന്റെ നിര്‍ദേശപ്രകാരമാണ് സന്തോഷ് ഈപ്പന്‍ കൊച്ചിയില്‍നിന്ന് ആറു ഐഫോണുകള്‍ വാങ്ങിനല്‍കിയത്. ഇതിലൊന്ന് എം. ശിവശങ്കറാണ് ഉപയോഗിക്കുന്നതെന്നു വ്യക്തമായിരുന്നു. കൂട്ടത്തില്‍ വിലയേറിയ 1.13 ലക്ഷത്തിന്റെ ഐഫോണ്‍ 11 പ്രോ 256 ജി.ബി.യുടേതായിരുന്നു.

ഇത് കോണ്‍സല്‍ ജനറലിന് സമ്മാനമായി കൊടുക്കാനാണു വാങ്ങിയത്. എന്നാല്‍, ഇതിനേക്കാള്‍ മികച്ച ഫോണ്‍ കോണ്‍സല്‍ ജനറല്‍ ആവശ്യപ്പെട്ടതോടെ തിരുവനന്തപുരത്തുനിന്ന് പുതിയ ഫോണ്‍ വാങ്ങിനല്‍കി. 1.13 ലക്ഷത്തിന്റെ ഫോണ്‍ സന്തോഷ് ഈപ്പന്‍ സ്വയം ഉപയോഗിക്കാന്‍ തുടങ്ങി.

സംസ്ഥാന അഡീഷണല്‍ പ്രോട്ടോകോള്‍ ഓഫീസര്‍ക്ക് കോണ്‍സുലേറ്റില്‍നിന്ന് ഐഫോണ്‍ ലഭിച്ചിരുന്നു. ഇതിനുപുറമേ ഒരു വിമാനക്കമ്പനി മാനേജര്‍, തിരുവനന്തപുരത്തെ പരസ്യ ഏജന്‍സിയിലുള്ള പ്രവീണ്‍ എന്നിവരാണ് മറ്റു ഫോണുകള്‍ ഉപയോഗിക്കുന്നതെന്നു വ്യക്തമായി. ശേഷിക്കുന്ന ഒരു ഫോണിന്റെ കാര്യത്തിലുള്ള ആശയക്കുഴപ്പം തിങ്കളാഴ്ചയോടെ പരിഹരിക്കപ്പെടും.

രമേശ് ചെന്നിത്തലയ്ക്ക് ഒരു ഐഫോണ്‍ നല്‍കിയെന്ന് താന്‍ ഉദ്ദേശിച്ചിട്ടില്ലെന്നും നറുക്കെടുപ്പില്‍ വിജയിയായ ആള്‍ക്ക് ചെന്നിത്തല ഒരു ഐഫോണ്‍ നല്‍കിയെന്നാണ് ഉദ്ദേശിച്ചതെന്നും സന്തോഷ് ഈപ്പന്‍ അന്വേഷണ ഏജന്‍സിക്കു മുന്നില്‍ വ്യക്തമാക്കി. ആര്‍ക്കൊക്കെ ഫോണ്‍ കിട്ടിയെന്നു വ്യക്തതയില്ലാത്തതിനാലാണ് ഹൈക്കോടതിയില്‍ നല്‍കിയ ഹര്‍ജിയില്‍ പേരുകള്‍ പറയാതിരുന്നതെന്നും സന്തോഷ് ഈപ്പന്‍ പറഞ്ഞു.

എന്തായാലും ഐ ഫോണ്‍ പലരുടേയും തലയെടുക്കുമെന്ന് ഉറപ്പാണ്. പണമോ പാരിതോഷികമോ വാങ്ങിയാല്‍ ഇന്ന നമ്പരില്‍ വിവരം അറിയിക്കണമെന്ന് എല്ലാ സര്‍ക്കാര്‍ ഓഫീസിലും എഴുതി വച്ചിട്ടുണ്ട്. അതായത് പാരിതോഷികമായാലും കൈകൂലി തന്നെയെന്നര്‍ത്ഥം. അതിന് ചട്ടം പഠിപ്പിക്കുന്ന അഡീഷണല്‍ പ്രോട്ടോകോള്‍ ഓഫീസര്‍ തന്നെ ഫോണ്‍ സമ്മാനം കൈപ്പറ്റി. ഇതേത് വകുപ്പില്‍ പെടുത്താതിരിക്കാമെന്നുള്ള സജീവ ചര്‍ച്ചയും നടക്കുകയാണ്. അതിനിടെ ഓണ്‍ലൈനുകള്‍ ഐ ഫോണുപയോഗിക്കുന്നവരെ പച്ചയ്ക്ക് തന്നെ തുറന്ന് കാട്ടുന്നുണ്ട്. എന്നാല്‍ ഇവരാരൊക്കെയാണെന്ന് വരും ദിവസങ്ങളില്‍ തിരിച്ചറിയാം.