കേരളത്തിലായിരുന്നെങ്കില്‍ കാണാമായിരുന്നു. സംസ്ഥാനം ഭരിക്കുന്ന പാര്‍ട്ടിയുടെ സംസ്ഥാന അധ്യക്ഷന്റെ മകന് ഈ ഗതി വന്നല്ലോയെന്നോര്‍ത്ത് സകല സഖാക്കളും വിഷമത്തിലാണ്. ഒരിക്കലും പേരുദോഷം കേള്‍പ്പിക്കാത്ത മഹാനായ അച്ഛന് തന്നെ നാണക്കേടായിരിക്കുകയാണ്. ഇത്രയും ആദര്‍ശമുള്ള പാര്‍ട്ടിയില്‍ ഇപ്പോള്‍ തന്നെ പ്രവര്‍ത്തകര്‍ ഓരോ ചോദ്യങ്ങള്‍ ചോദിച്ചു തുടങ്ങി. പുറത്ത് ചോദിച്ചാല്‍ വിവരമറിയും.

അതേസമയം എന്‍ഫോഴ്‌സ്‌മെന്റ് ബിനീഷ് കോടിയേരിയെ വട്ടം ചുറ്റിക്കുകയാണ്. പോലീസ് സ്റ്റേഷന്‍, ഇഡി ഓഫീസ്, ചോദ്യം ചെയ്യല്‍ അങ്ങനെ കലാപരിപാടി നാലാം ദിവസവും പിന്നിട്ടു കഴിഞ്ഞു. ഇത്രയും പണവും അധികാരവും ഒക്കെ ഉണ്ടായിട്ടും പയ്യനെ ഒന്ന് കണാന്‍ സഹോദരന്‍ ബിനോയിയും വക്കീലന്‍മാരും നാല് ദിവസമായി തെക്ക് വടക്ക് ഓടുകയാണ്. എന്തിന് ചീഫ് ജസ്റ്റിസിന്റെ വീട്ടു പടിക്കല്‍ വരെ പോയി. ആശുപത്രിയില്‍ കയറാന്‍ ആരുടേം സമ്മതം വേണ്ടല്ലോയെന്ന് വാദിച്ച് അവിടേയുമെത്തി. പക്ഷെ എല്ലായിടത്തു നിന്നും പാവത്തുങ്ങളെ ആട്ടി ഓടിക്കുകയാണ്. ഇത് കേരളമല്ലെന്ന തിരിച്ചറിവ് എല്ലാ ഭാഗത്ത് നിന്നും കിട്ടി. ബിജെപിയുടെ അതികായനായ യദ്യൂരപ്പയുടെ നാടാണ് ബെംഗളൂരു. അവിടെ എന്തെങ്കിലും നടക്കണമെങ്കില്‍ യദ്യൂരപ്പ കനിയണം. നല്ലകഥ, തരം കിട്ടിയാല്‍ സുരേന്ദ്രനേയും മേദിയേയും രണ്ട് പറയുന്ന നമ്മള്‍ യദ്യൂരപ്പയുടെ കാല് പിടിക്കാനോ. കോടിയേരിയുടെ ഭാഷയില്‍ പറഞ്ഞാല്‍ കുറ്റം ചെയ്‌തെങ്കില്‍ തൂക്കിക്കൊല്ലുന്നെങ്കില്‍ കൊന്നോട്ടെ.

ഇതൊക്കെ മേനി പറയാന്‍ കൊള്ളാമെങ്കിലും പാവം പയ്യന് സഹിക്കാന്‍ കഴിയുന്നില്ല. ചോദ്യംചെയ്യലിനിടെ ദേഹോപദ്രവം ഏല്‍പിച്ചോയെന്ന സംശയം ബിനീഷ് കോടിയേരിയും വക്കീലന്‍മാരും തന്നെ സംശയം ചോദിക്കുന്നുണ്ട്. ഇഡിക്ക് പിന്നാലെ എന്‍ഐഎയും എന്‍സിബിയും ബിനീഷിന്റെ പുറകില്‍ തന്നെയുണ്ട്. അടുത്ത കാലത്തൊന്നും പുറത്തിറങ്ങാന്‍ പറ്റാത്ത തരത്തിലുള്ള നടപടികളാണ് ഇവര്‍ സ്വീകരിക്കുന്നത്.

തുടര്‍ച്ചയായ നാലാം ദിവസവും എന്‍ഫോഴ്‌സ്‌മെന്റ് ഡയറക്ടറേറ്റ് ചോദ്യം ചെയ്യുന്നതിനിടെ, ദേഹാസ്വാസ്ഥ്യം അനുഭവപ്പെട്ട ബിനീഷ് കോടിയേരിയെ ആശുപത്രി പരിശോധനയ്ക്കു ശേഷം രാത്രിയോടെയാണ് വില്‍സന്‍ ഗാര്‍ഡന്‍ പൊലീസ് സ്‌റ്റേഷനിലേക്കു മാറ്റിയത്. വൈകിട്ട് നാലരയോടെ ബൗറിങ് ആശുപത്രിയില്‍ എത്തിച്ച ബിനീഷിനെ പരിശോധനകള്‍ക്കുശേഷം രാത്രി 9.30 നാണ് ഡിസ്ചാര്‍ജ് ചെയ്തത്. ചെയ്യാത്ത കാര്യങ്ങള്‍ സമ്മതിക്കാന്‍ ഇഡി സമ്മര്‍ദം ചെലുത്തുകയാണെന്ന്, സ്‌കാനിങ്ങിനായി ആശുപത്രിയില്‍നിന്നു പുറത്തേക്കു കൊണ്ടുപോകുന്നതിനിടെ ബിനീഷ് മാധ്യമങ്ങളോടു പറഞ്ഞു.

സഹോദരന്‍ ബിനോയിയും അഭിഭാഷകരും എത്തിയിരുന്നു. വ്യാഴാഴ്ച മുതല്‍ 36 മണിക്കൂറാണു ബിനീഷിനെ ചോദ്യം ചെയ്തത്. നടുവേദനയുമുണ്ടെന്ന് ബിനീഷ് അറിയിച്ചതായി ഉദ്യോഗസ്ഥര്‍ പറഞ്ഞു. കസ്റ്റഡി വൈകിട്ട് അഞ്ചിന് അവസാനിക്കുമെന്നതിനാല്‍ ഇന്നു കോടതിയില്‍ ഹാജരാക്കും. ഇന്നു ജാമ്യാപേക്ഷ നല്‍കുമെന്ന് അഭിഭാഷകര്‍ അറിയിച്ചു. ചോദ്യംചെയ്യലിനിടെ ദേഹോപദ്രവം ഏല്‍പിച്ചോയെന്ന ആശങ്കയും ഇവര്‍ ഉന്നയിച്ചു. നര്‍കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) കസ്റ്റഡിയില്‍ ആവശ്യപ്പെട്ടാല്‍ നിയമക്കുരുക്കു മുറുകുമെന്ന അഭ്യൂഹത്തിനിടെയാണു ബിനീഷ് ചികിത്സ തേടിയത്.

കേരളത്തില്‍ വച്ചാണ് പയ്യനെ ഇഡി പിടികൂടിയെങ്കില്‍ നമ്മുടെ കണ്‍വെട്ടത്ത് നമ്മുടെ ജയിലില്‍ തന്നെ കഴിയാമായിരുന്നു. ഇപ്പോള്‍ പഴയ കൊഴക്കട്ടയൊന്നുമല്ല. നല്ല രസികന്‍ ഭക്ഷണമാ. പിന്നെ വേണ്ടപ്പെട്ടവനും കൂടിയാകുമ്പോള്‍ പറയേണ്ടല്ലോ. എല്ലാം നശിപ്പിച്ചത് പയ്യന്റെ എടുത്ത് ചാട്ടമാണ്. എന്തിന് ബംഗളൂരുവില്‍ പോയി ഇഡിയുടെ വായില്‍ ചാടിയെന്നാണ് അരിയാഹാരം കഴിക്കുന്ന പാവം സഖാക്കള്‍ ചോദിക്കുന്നത്. ഇനിയിപ്പോ യദ്യൂരപ്പയുടെ നാട്ടിലാണുള്ളത്. ഇനി യദ്യൂരപ്പാ വാപ്പാ എന്ന് വിളിക്കാതെ ഒരു രക്ഷയില്ല.