ശിവശങ്കറിനെ കൂടാതെ നിരവധി ഐ. എ. എസ്. ഉദ്യോഗസ്ഥര്‍ അഴിമതിയുടെ ഭാഗമാണെന്നാണ് കേന്ദ്ര ഏജന്‍സികള്‍ കരുതുന്നത്. ഇവര്‍ക്കെല്ലാം ഉന്നത രാഷ്ട്രീയ ബന്ധങ്ങളുണ്ട്.

മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറുടെ നേതൃത്വത്തില്‍ നടന്ന അഴിമതികള്‍ക്ക് സര്‍ക്കാരിന്റെ പൂര്‍ണ പിന്തുണയുണ്ടെന്ന് കേന്ദ്ര അന്വേഷണ ഏജന്‍സികള്‍ കരുതുന്നു. ഒരു ഐ. എ. എസ്. ഉദ്യോഗസ്ഥന്‍ മാത്രം വിചാരിച്ചാല്‍ കോടി കണക്കിന് രൂപയുടെ അഴിമതി നടത്താന്‍ കഴിയില്ലെന്നാണ് അന്വേഷണ ഏജന്‍സികള്‍ വിചാരിക്കുന്നത്.

അതു കൊണ്ടാണ് സ്വര്‍ണകടത്ത് കേസിന് പിന്നാലെ വന്‍കിട സര്‍ക്കാര്‍ പദ്ധതികളിലേക്കും അന്വേഷണം വ്യാപിപ്പിക്കാന്‍ എന്‍ഫോഴ്‌സ്‌മെന്റ് ഡയറക്ടറേറ്റ് തീരുമാനിച്ചത്. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറിയായ എം ശിവശങ്കര്‍ മുന്‍കൈ എടുത്ത നാല് വന്‍ പദ്ധതികളുടെ വിശദാംശങ്ങള്‍ നല്‍കാനാണ് ഇഡി സര്‍ക്കാരിന് നിര്‍ദ്ദേശം നല്‍കിയിട്ടുള്ളത്. കെ ഫോണ്‍, സ്മാര്‍ട് സിറ്റി, ഡൗണ്‍ടൗണ്‍, ഇ മൊബിലിറ്റി പദ്ധതികളുടെ വിശദാംശങ്ങള്‍ ആണ് നല്‍കേണ്ടത്.

നാല് പദധതികളും മുടങ്ങാനാണ് സാധ്യത.അഴിമതി പിടിക്കപ്പെട്ടാല്‍ പദധതികള്‍ നിര്‍ത്തിവയ്ക്കാന്‍ ദേശീയ ഏജന്‍സികള്‍ക്ക് തീര്‍ച്ചയായും ആവശ്യപ്പെടാം. നാല് വന്‍കിട പദ്ധതികളിലും കോടി കണക്കില്‍ രൂപയുടെ അഴിമതിയാണ് കണ്ടെത്തിയിരിക്കുന്നത്. നാല് പദധതികള്‍ കൂടാതെ സര്‍ക്കാര്‍ നടപ്പിലാക്കുന്ന മറ്റ് പദധതികളിലും ദേശീയ ഏജന്‍സികള്‍ അഴിമതി മണക്കുന്നുണ്ട്.

വന്‍കിട പദ്ധതികളുടെ വിശദാംശങ്ങള്‍ നല്‍കണമെന്ന് ആവശ്യപ്പെട്ട് എന്‍ഫോഴ്‌സ്‌മെന്റ് ഉദ്യോഗസ്ഥര്‍ ചീഫ് സെക്രട്ടറിക്ക് കത്ത് നല്‍കിയിട്ടുണ്ട്. പദ്ധതികളുടെ മറവില്‍ കോടിക്കണക്കിന് രൂപയുടെ അഴിമതി നടന്നെന്നാണ് ഇഡിയുടെ പ്രാഥമിക വിലയിരുത്തല്‍. ധാരണാ പത്രം, പങ്കാളികള്‍, ഏറ്റെടുത്ത ഭൂമി, ഭൂമിക്ക് നല്‍കിയ വില തുടങ്ങിയവ വിശദമാക്കണം എന്നും കത്തില്‍ ആവശ്യപ്പെട്ടിട്ടുണ്ട്. എം ശിവശങ്കറിന് പുറമേ മറ്റ് ചില ഐഎഎസ് ഉദ്യോഗസ്ഥരുടെ പങ്കും അന്വേഷണത്തിന്റെ പരിധിയില്‍ വരുന്നുണ്ടെന്നാണ് വിവരം. ചീഫ് സെക്രട്ടറിക്ക് കത്ത് കിട്ടിയതോടെ മുഖ്യമന്ത്രിയുടെ ചങ്കിടി കൂടിയെന്നാണ് വിവരം.

സ്വപ്ന പദ്ധതികളുടെ മറവില്‍ ശിവശങ്കറും സി പി എമ്മുമായി ബന്ധപ്പെട്ട ചിലര്‍ റിയല്‍ എസ്‌റ്റേറ്റ് കച്ചവടവും നടത്തിയതായി എന്‍ഫോഴ്‌സ്‌മെന്റിന് വിവരം ലഭിച്ചു. ഇതില്‍ ഐ. എ. എസ്. ഉദ്യോഗസ്ഥരുമുണ്ട്. ഐ. എ. എസ്. ഉദ്യോഗസ്ഥര്‍ക്ക് പുറമേ വിവിധ സര്‍ക്കാര്‍ തലങ്ങളിലുള്ള ഉദ്യോഗസ്ഥരും അഴിമതിയുടെ ഭാഗമാണ്. അവരുടെ പൂര്‍ണ വിവരങ്ങള്‍ ഇഡിക്ക് ലഭിച്ചിട്ടുണ്ട്.

എന്‍ഫോഴ്‌സ്‌മെന്റ് ഡയറക്ടേറ്റിന്റെ അന്വേഷണം സ്വര്‍ണക്കടത്ത് കേസിന് അപ്പുറത്തേക്ക് നീളുന്നതിന്റെ സൂചനയാണ് ഇപ്പോള്‍ പുറത്ത് വരുന്നത്. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിന്റെ സ്വത്തുക്കളെ കുറിച്ചും എന്‍ഫോസ്‌മെന്റ് അന്വേഷണം തുടങ്ങി. ബാങ്ക് ഡെപ്പോസിറ്റുകള്‍, ഭൂസ്വത്ത് എന്നിവയിലാണ് പരിശോധന നടക്കുന്നത്. സ്വന്തം പേരില്‍ ലോക്കര്‍ അടക്കം ഉണ്ടോ എന്നും എന്‍ഫോഴ്‌സ്‌മെന്റ് അന്വേഷിക്കുന്നുണ്ട്.

കേരളത്തില്‍ നടപ്പിലാക്കുന്ന വിവിധ വന്‍കിട പദ്ധതികള്‍ക്ക് നേതൃത്വം നല്‍കുകയും സഹകരിക്കുകയും ചെയ്യുന്ന ഉദ്യോഗസ്ഥരുടെ വ്യക്തിപരമായ വിവരങ്ങള്‍ ശേഖരിക്കാന്‍ ഇഡി തീരുമാനിച്ചിട്ടുണ്ട്.

പിണറായി സര്‍ക്കാരില്‍ അഴിമതി വ്യാപിക്കുന്നതിന് മുമ്പ് സര്‍ക്കാര്‍ ഉദ്യോഗസ്ഥര്‍ക്കിടയിലെ അഴിമതിയുടെ വിശദാംശങ്ങള്‍ 2018 ഫെബ്രുവരിയില്‍ വിജിലന്‍സ് പുറത്തുവിട്ടിരുന്നു. 2016 മുതല്‍ 2018 വരെ അഴിമതി നിരോധന നിയമപ്രകാരം വിജിലന്‍സ് കെണിയില്‍ കുടുങ്ങിയത് 764 സര്‍ക്കാര്‍ ഉദ്യോഗസ്ഥരാണ്. പാലക്കാട് ജില്ലയിലാണ് ഏറ്റവും കൂടുതല്‍ ഉദ്യോഗസ്ഥര്‍ കുടുങ്ങിയത്. തിരുവനന്തപുരമായിരുന്നു തൊട്ടുപിന്നില്‍ : 111.

അതേസമയം അഴിമതി കാണിക്കുന്നവര്‍ വീട്ടില്‍ കിടന്നുറങ്ങില്ലെന്ന് 2019 ഒക്ടോബര്‍ 19 ന് മുഖ്യമന്ത്രി പറഞ്ഞതോര്‍ത്ത് കേരളം ഇപ്പോള്‍ പൊട്ടിച്ചിരിക്കുകയാണ്. മട്ടന്നൂര്‍ നഗരസഭയുടെ ഗവ. സ്പഷ്യാലിറ്റി ആശുപത്രിയുടെയും റവന്യുടവറിന്റെയും ശിലാ സ്ഥാപനം നിര്‍വഹിച്ച് സംസാരിക്കുമ്പോഴാണ് മുഖ്യമന്ത്രി ഇപ്രകാരം പറഞ്ഞത്. അഴിമതിക്കാര്‍ സര്‍ക്കാര്‍ പണിത കെട്ടിടത്തില്‍ പോയി കിടക്കേണ്ടി വരുമെന്നും മുഖ്യമന്ത്രി പറഞ്ഞു. ചെറുതായാലും വലുതായാലും അഴിമതി അഴിമതി തന്നെയാണെന്ന് അദ്ദേഹം പറഞ്ഞു.

ഓഫീസുകളില്‍ വരുന്ന ആളുകളുടെ ആവശ്യം പെട്ടെന്ന് നടക്കണമെന്ന ആഗ്രഹത്തെ ചക്ഷണം ചെയ്യാന്‍ ചിലര്‍ ശ്രമിക്കുന്നതായി മുഖ്യമന്ത്രി പറഞ്ഞു. ഇതിന് മറുപടിയായി കേരളത്തില്‍ ആദ്യമായി സര്‍ക്കാര്‍ ഭക്ഷണം കഴിക്കേണ്ടി വരുന്നത് മുഖ്യമന്ത്രിയാണെണ് പ്രതിപക്ഷ നേതാവ് പറഞ്ഞു. അതേ മുഖ്യമന്ത്രിയാണ് ഇപ്പോള്‍ അഴിമതികാരനായി മാറിയത്.