യു.ഡി.എഫ് അധികാരത്തില്‍ വരുമ്പോള്‍ ബെഹ്റയുടെ എല്ലാ കള്ളത്തരങ്ങളും അഴിമതിയും അന്വേഷിക്കാന്‍ കമീഷനെ നിയോഗിക്കും...സര്‍ക്കാര്‍ നിര്‍ദേശിക്കുന്ന ഏത് വഴിവിട്ട കാര്യങ്ങളും ചെയ്യാന്‍ തയാറാകുന്ന ഡി.ജി.പിയാണ് ഇന്ന് കേരളത്തിലുള്ളതെന്ന് രമേശ് ചെന്നിത്തല
സംസ്ഥാന പോലീസ് മേധാവി ലോക്നാഥ് ബെഹ്റയ്‌ക്കെതിരെ തുറന്നടിച്ച് പ്രതിപക്ഷ നേതാവ് രമേശ് ചെന്നിത്തല.സര്‍ക്കാര്‍ നിര്‍ദേശിക്കുന്ന ഏത് വഴിവിട്ട കാര്യങ്ങളും ചെയ്യാന്‍ തയാറാകുന്ന ഡി.ജി.പിയാണ് ഇന്ന് കേരളത്തിലുള്ളതെന്ന് രമേശ് ചെന്നിത്തല പറഞ്ഞു. സംസ്ഥാന പൊലീസ് മേധാവി ലോക്നാഥ് ബെഹ്റ ഇന്ന് എല്ലാ അര്‍ത്ഥത്തിലും തരംതാഴ്ന്നു കൊണ്ടിരിക്കുകയാണ്. സര്‍ക്കാറിന്റെ അഴിമതിയും സ്വജനപക്ഷപാതവും കൊള്ളയും തുറന്നുകാട്ടുന്ന പ്രതിപക്ഷ എം.എല്‍.എമാര്‍ക്കും നേതാക്കള്‍ക്കുമെതിരെ കള്ളക്കേസെടുക്കാന്‍ ഡി.ജി.പി തന്നെ മുന്‍കൈ എടുക്കുന്നു. ഈ നടപടി എത്രയും വേഗം അവസാനിപ്പിക്കാന്‍ അദ്ദേഹം തയാറാകണം.
യു.ഡി.എഫ് അധികാരത്തില്‍ വരുമ്പോള്‍ ലോക്നാഥ് ബെഹ്റ എന്ന ഡി.ജി.പിയുടെ എല്ലാ കള്ളത്തരങ്ങളും അഴിമതിയും അന്വേഷിക്കാന്‍ കമീഷനെ നിയോഗിക്കും. പലതരം പര്‍ച്ചേസിലൂടെ കോടിക്കണക്കിന് രൂപയുടെ അഴിമതി നടത്തുന്ന ഡി.ജി.പിയെ സംരക്ഷിക്കുന്ന നിലപാടാണ് സര്‍ക്കാര്‍ സ്വീകരിക്കുന്നത്. അതിന് പ്രത്യുപകരമായിട്ടാണ് പി.ടി. തോമസ്, കെ.എം. ഷാജി, തുടങ്ങിയ യു.ഡി.എഫ് എം.എല്‍.എമാര്‍ക്കും മറ്റു നിരവധി നേതാക്കള്‍ക്കുമെതിരെ കേസെടുക്കാനും അവരെ അപമാനിക്കാനുള്ള ശ്രമം. വി.ഡി. സതീശനെതിരെ ഇല്ലാത്ത ഒരു കേസുമായി വന്നിരിക്കുന്നതും ഇതിന്റെ ഭാഗമാണ്.
കേരളം കണ്ട ഏറ്റവും വലിയ അഴിമതിയും കൊള്ളയും നടത്തിയ ഒരു ഡി.ജി.പിയാണ് നിലവിലുള്ളത്. അക്കൗണ്ടന്‍റ് ജനറലിന്റെ റിപ്പോര്‍ട്ടില്‍ ഡി.ജി.പിയുടെ അഴിമതികള്‍ വ്യക്തമായി പറയുന്നതുകൊണ്ടാണ് സര്‍ക്കാര്‍ ആ റിപ്പോര്ട്ട് കോള്‍ഡ് സ്റ്റേറേജില്‍ വെച്ചിട്ടുള്ളത്. കള്ളക്കേസുകള്‍ എടുത്ത് എല്‍.ഡി.എഫ് സര്‍ക്കാറിനെതിരായ യു.ഡി.എഫിന്റെ പോരാട്ടം പിന്നോട്ട് കൊണ്ടുപോകാം എന്നുള്ളത് വെറും വ്യാമോഹമാണ്. സര്‍ക്കാറി വേണ്ടി എന്ത് അഴിമതിയും നടത്തുന്ന ഡി.ജി.പിയെ നിയമപരമായിത്തന്നെ നേരിടുമെന്നും രമേശ് ചെന്നിത്തല പറഞ്ഞു.
https://www.facebook.com/Malayalivartha
