മാന്നാര്‍ പൊലീസ് സ്റ്റേഷനിലെ ഗ്രേഡ് എസ്‌ഐയായ ഷാജിമോനെ മോഷണ കേസില്‍പെട്ട വാഹനം ഉടമയ്ക്ക് വിട്ടുകൊടുക്കാന്‍ കൈക്കൂലി വാങ്ങിയതിന് അറസ്റ്റ് ചെയ്തു. ഡിവൈഎസ്പി ഹരി വിദ്യാധരന്റെ നേതൃത്വത്തിലുള്ള വിജിലന്‍സ് സംഘമാണ് അറസ്റ്റ് ചെയ്തത്. മണ്ണഞ്ചേരി സ്വദേശിയായ കെ.പി.ഷാജിമോന്‍ ചങ്ങനാശേരിയിലാണ് താമസം.

ചങ്ങനാശേരി പായിപ്പാട് ജംക്ഷനു സമീപം റോഡിലായിരുന്നു ഇന്നലെ വൈകിട്ട് 6.25-ന്് അറസ്റ്റ്. പരാതിക്കാരനായ ചങ്ങനാശേരി ഫാത്തിമാപുരം കുഴിവേലില്‍ കണ്ണന്‍കാട്ടില്‍ പി.എച്ച്.കബീറില്‍ നിന്നു 2,000 രൂപ കൈക്കൂലി വാങ്ങുമ്പോഴായിരുന്നു പിടിക്കപ്പെട്ടത്.

സ്വന്തമായി 2 ഗുഡ്‌സ് ഓട്ടോകളുള്ള കബീര്‍ അതില്‍ ഒന്ന് ലോക്ഡൗണ്‍ തുടങ്ങിയപ്പോള്‍ നാട്ടുകാരനായ ഒരാള്‍ക്ക് വാടകയ്ക്ക് നല്‍കിയിരുന്നു. സെപ്റ്റംബര്‍ 7-ന് ഈ വാഹനം ഒരു മോഷണ കേസില്‍ മാന്നാര്‍ പൊലീസ് പിടികൂടി. പ്രതികള്‍ ജാമ്യത്തില്‍ ഇറങ്ങിയിട്ടും വാഹനം വിട്ടുനല്‍കാന്‍ പൊലീസ് തയാറായില്ല. ഇതിനിടെ ഷാജിമോന്‍ കബീറിനോട് 5000 രൂപ കൈക്കൂലി ആവശ്യപ്പെട്ടു. ഇതേ തുടര്‍ന്ന് വിജിലന്‍സ് എസ്പി: വി.ജി.വിനോദ് കുമാറിന് കബീര്‍ പരാതി നല്‍കി.

2,000 രൂപ നല്‍കാമെന്നു പറഞ്ഞതനുസരിച്ച് ഇന്നലെ പായിപ്പാട് വച്ചു പണം കൈമാറിയപ്പോള്‍ വിജിലന്‍സ് പിടികൂടുകയായിരുന്നു. കോവിഡ് പരിശോധന നടത്തിയശേഷം ഇന്നു കോട്ടയം വിജിലന്‍സ് കോടതിയില്‍ ഹാജരാക്കും.