കേരള കോണ്‍ഗ്രസ് (എം) എന്ന പേരും രണ്ടില ചിഹ്നവും ഉപയോഗിക്കാന്‍ ജോസ് കെ. മാണി എംപി നേതൃത്വം നല്‍കുന്ന ഗ്രൂപ്പിനു അനുമതി നല്‍കിയ കേന്ദ്ര തിരഞ്ഞെടുപ്പു കമ്മിഷന്റെ ഉത്തരവ് ഹൈക്കോടതി ശരിവച്ചു. കമ്മിഷന്റെ ഉത്തരവിനെതിരെ പി.ജെ ജോസഫും ജോസഫ് വിഭാഗത്തിലെ പി. സി. കുര്യാക്കോസും നല്‍കിയ ഹര്‍ജികള്‍ ജസ്റ്റിസ് എന്‍. നഗരേഷ് തള്ളി.

പാലാ നിയമസഭാ ഉപതിരഞ്ഞെടുപ്പില്‍ സ്ഥാനാര്‍ഥിയെ നിര്‍ത്തുന്ന കാര്യത്തില്‍ വ്യത്യസ്ത തീരുമാനമെടുത്തത് ഉള്‍പ്പെടെയുള്ള കാരണങ്ങള്‍, കേരള കോണ്‍ഗ്രസില്‍ (എം) എതിര്‍ചേരികളുണ്ടെന്ന കമ്മിഷന്റെ കണ്ടെത്തല്‍ ശരിവയ്ക്കുന്നുവെന്ന് കോടതി വ്യക്തമാക്കി. വസ്തുതകള്‍ വിലയിരുത്തിയുള്ള നിഗമനത്തില്‍ റിട്ടധികാരം വിനിയോഗിച്ച് ഇടപെടുന്നില്ലെന്നു കോടതി പറഞ്ഞു.

ഇരുകൂട്ടരും നല്‍കിയ പട്ടികയില്‍ പൊതുവായുള്ള 305 അംഗങ്ങളില്‍നിന്നു ഭൂരിപക്ഷ പരിശോധന നടത്തിയ കമ്മിഷന്റെ നടപടി ശരിയല്ലെന്നു ജോസഫ് വിഭാഗം വാദിച്ചെങ്കിലും കോടതി അംഗീകരിച്ചില്ല. 450 അംഗ സംസ്ഥാന സമിതിയിലെ ഭൂരിപക്ഷം പരിശോധിച്ചിരുന്നില്ല. ഇരുകൂട്ടരും ഹാജരാക്കിയ പട്ടിക വിശ്വസനീയമല്ലാത്തതിനാല്‍ രണ്ടിലും പൊതുവായുള്ളവരെ പരിഗണിച്ചതില്‍ തെറ്റില്ല. പട്ടികയില്‍ ക്രമക്കേടിനു സാധ്യതയുണ്ടെന്നു കമ്മിഷന്റെ ലോ ഡയറക്ടര്‍ പറഞ്ഞിരുന്നു. സംസ്ഥാനസമിതി അംഗങ്ങളുടെ പട്ടിക അന്തിമമാക്കേണ്ട അധികാരി ആരെന്നു പാര്‍ട്ടി ഭരണഘടനയില്‍ പറയുന്നില്ലെന്നും കോടതി ചൂണ്ടിക്കാട്ടി.

ജോസ് കെ. മാണി വിഭാഗത്തിനു ഹൈക്കോടതി വിധിയോടെ തദ്ദേശ തിരഞ്ഞെടുപ്പില്‍ കേരള കോണ്‍ഗ്രസ് (എം) സ്ഥാനാര്‍ഥികളായി രണ്ടില ചിഹ്നത്തില്‍ മത്സരിക്കാം. സംസ്ഥാന തിരഞ്ഞെടുപ്പു കമ്മിഷന്റെ ഉത്തരവ് ഇന്ന് ഉണ്ടായേക്കും. രണ്ടില ചിഹ്നം 17-ന് മരവിപ്പിക്കുമ്പോള്‍ തീരുമാനം ഹൈക്കോടതി വിധിക്ക് വിധേയമായിരിക്കുമെന്ന് കമ്മിഷന്‍ വ്യക്തമാക്കിയിരുന്നു. അന്നു ജോസ് വിഭാഗത്തിനു ടേബിള്‍ ഫാനും ജോസഫ് വിഭാഗത്തിനു ചെണ്ടയും അനുവദിക്കുകയും ചെയ്തിരുന്നു. ഇനി ടേബിള്‍ ഫാന്‍ ചിഹ്നം ഏതെങ്കിലും സ്വതന്ത്രന് അനുവദിക്കും.