കോടതിമുറിയില് മക്കളെ വാരിപ്പുണര്ന്നു; വധഭീഷണിയുണ്ടെന്നു ഷൈന
കോടതിമുറിയില് രൂപേഷും ഷൈനയും മക്കളായ ആമിയെയും സവേരയെയും വാരിപ്പുണര്ന്നു. മക്കളെ കാണാന് അനുവദിക്കണമെന്ന് ഇരുവരും കോടതിയോട് ആവശ്യപ്പെട്ടിരുന്നു.
ഇത് അംഗീകരിച്ചതോടെ കോടതിക്കു പുറത്ത് റോഡിന്റെ എതിര്വശത്ത് രൂപേഷിനും ഷൈനക്കും ഐക്യദാര്ഢ്യം പ്രഖ്യാപിക്കാനെത്തിയ പോരാട്ടം, ഞാറ്റുവേല തുടങ്ങിയ സംഘടനകളുടെ പ്രവര്ത്തകര്ക്കൊപ്പം ആകാംക്ഷയോടെ കാത്തുനിന്ന മക്കളെയും പോലീസ് ഉദ്യോഗസ്ഥര് എത്തി കോടതിയിലേക്കു കൂട്ടിക്കൊണ്ടുവന്നു. രൂപേഷിന്റെ സഹോദരനൊപ്പം എത്തിയ മക്കളെ ഇരുവരും കെട്ടിപ്പുണര്ന്നു. അഞ്ചു മിനിറ്റിലേറെ വാത്സല്യം പങ്കിട്ടു.
മാതാപിതാക്കളെ കോടതിയില് കൊണ്ടുവന്നപ്പോഴും റിമാന്ഡ് ചെയ്ത് ജെയിലിലേക്കു കൊണ്ടു പോയപ്പോഴും മക്കള് മാവോയിസ്റ്റ് അനുകൂല മുദ്രാവാക്യങ്ങള് ഉച്ചത്തില് മുഴക്കി അഭിവാദ്യം ചെയ്തു.കോടതിപരിസരം നിറഞ്ഞുനിന്ന ആകാംക്ഷയ്ക്ക് വിരാമമിട്ട് മാവോയിസ്റ്റ് മുദ്രാവാക്യങ്ങള് മുഴക്കിക്കൊണ്ടാണു രൂപേഷ് പോലീസ് വാഹനത്തില് നിന്നു പുറത്തിറങ്ങിയത്.
ആദിവാസികള്ക്കു ഭൂമി വിട്ടു കൊടുക്കുക, കാതിക്കുടം നിവാസികളുടെ പ്രശ്നങ്ങള് പരിഹരിക്കുക, പശ്ചിമ ഘട്ടത്തിലെ സായുധ സമരം തുടരുക തന്നെ ചെയ്യും, നക്സല് ബാരി സിന്ദാബാദ് തുടങ്ങിയ മുദ്രാവാക്യങ്ങള് മുഴക്കി രൂപേഷ് കോടതിയുടെ ഒന്നാമത്തെ നിലയിലേക്കു കയറിപ്പോയപ്പോള് പിന്നാലെ വന്ന ഷൈന, തങ്ങള്ക്ക് പോലീസ് കസ്റ്റഡിയില് രണ്ടു തവണ വധഭീഷണിയുണ്ടായെന്നും ദിവസവും പോലീസ് ചോദ്യം ചെയ്യലിന്റെ പേരില് ഭീഷണിപ്പെടുത്തുകയാണെന്നും മാധ്യമ പ്രവര്ത്തകരോട് വിളിച്ചു പറഞ്ഞു.
കോടതി നടപടികള് പൂര്ത്തിയാക്കി അഞ്ചു മണിയോടെ തിരിച്ചിറങ്ങിയപ്പോഴും പോലീസ് വാഹനത്തില് കയറുന്നതുവരെ രൂപേഷ് ഉച്ചത്തില് മുദ്രാവാക്യങ്ങള് മുഴക്കുന്നുണ്ടായിരുന്നു. ഇന്നലെ മൂന്ന് മണിക്കാണു കനത്ത പോലീസ് സുരക്ഷയില് ഇവരെ കൊച്ചിയിലെ പ്രത്യേക കൊടതിയില് ഹാജരാക്കിയത്.
കോയമ്പത്തൂര് സെന്ട്രല് ജയിലില് കഴിയുകയായിരുന്ന ഇവരെ കേരളത്തിലെ തീവ്രവാദ വിരുദ്ധ സ്ക്വാഡ് നേരിട്ടെത്തി കസ്റ്റഡിയില് വാങ്ങി കൊച്ചിയിലെത്തിക്കുകയായിരുന്നു. 20ന് ഇരുവരെയും ഹാജരാക്കാനാവശ്യപ്പെട്ട് അഡീഷണല് സെഷന്സ് കോടതി പുറപ്പെടുവിച്ച ട്രാന്സിറ്റ് വാറന്റിന്റെ അടിസ്ഥാനത്തില് കേരള പോലീസ് വന്സുരക്ഷാ സന്നാഹങ്ങളോടെയാണു കലൂരിലെ സി.ബി.ഐ കോടതിയിലെത്തിച്ചത്. ഐ.എസ്.ഐ.ടി. എസ്.പി: ആര്. അനില്കുമാറിന്റെ നേതൃത്വത്തില് കമാന്ഡോകളടക്കം 30 അംഗ പോലീസ് സംഘം മാവോയിസ്റ്റ് നേതാക്കള്ക്ക് സുരക്ഷയൊരുക്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
