സംസ്ഥാനത്തെ തദ്ദേശഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് ഒക്ടോബര്‍ മൂന്നാംവാരത്തില്‍ നടന്നേക്കും. എന്നാല്‍ തീയതിയായിട്ടില്ല. നവംബര്‍ ഒന്നിന് പുതിയ ഭരണസമിതികള്‍ അധികാരത്തില്‍ വരേണ്ടതുണ്ട്.
അതേസമയം, സെപ്തംബറിലോ ഒക്ടോബറിലോ ഇലക്ഷന്‍ നടത്തണമെന്നല്ലാതെ മറ്റൊരു തീരുമാനവുമെടുത്തിട്ടില്ലെന്ന് സംസ്ഥാന തിരഞ്ഞെടുപ്പ് കമ്മിഷണര്‍ കെ. ശശിധരന്‍ നായര്‍ പറഞ്ഞു. 2015 നവംബര്‍ ഒന്നിന് പുതിയ ഭരണ സമിതി അധികാരമേറ്റെടുക്കണം. അന്നാണ് പുതിയ സമിതി ആദ്യയോഗം ചേരേണ്ടത്. അതിനുമുമ്പ് തിരഞ്ഞെടുപ്പ് നടത്തി പുതിയ ഭാരവാഹികളെ സജ്ജമാക്കി നിറുത്തണമെന്നും അദ്ദേഹം പറഞ്ഞു.
പുതിയതായി രൂപീകരിച്ച കണ്ണൂര്‍ കോര്‍പറേഷനില്‍ ആദ്യ മേയര്‍ വനിതയായിരിക്കും. തൃശൂര്‍, എറണാകുളം കോര്‍പറേഷനുകള്‍ക്കും വനിതയായിരിക്കും മേയര്‍. കണ്ണൂര്‍ കൂടി കോര്‍പറേഷനാകുന്നതോടെ സംസ്ഥാനത്തെ മുനിസിപ്പല്‍ കോര്‍പറേഷനുകള്‍ ആറായി. തദ്ദേശഭരണ സ്ഥാപന ഭരണത്തില്‍ 50 ശതമാനം വനിതകള്‍ക്ക് സംവരണം ചെയ്തിട്ടുണ്ട്. അതുകൊണ്ടുതന്നെ ആറു കോര്‍പറേഷനുകളില്‍ മൂന്നിടത്ത് വനിതകള്‍ മേയറായി വരും. ഇപ്പോള്‍, വനിതാ മേയര്‍മാരുള്ള തിരുവനന്തപുരം, കൊല്ലം, കോഴിക്കോട് കോര്‍പറേഷനുകളില്‍ പുരുഷ മേയര്‍മാര്‍ വന്നേക്കും. 2010ല്‍ യു.ഡി.എഫ് നേടിയത് ചരിത്ര വിജയം തിരുവനന്തപുരം: യു.ഡി.എഫ് ചരിത്ര വിജയമാണ് 2010 ല്‍ നടന്ന തദ്ദേശ തിരഞ്ഞെടുപ്പില്‍ ഇടതുമുന്നണിയെ അട്ടിമറിച്ച് നേടിയത്. പഞ്ചായത്ത് തിരഞ്ഞെടുപ്പില്‍ ഇടതുമുന്നണിക്ക് മുന്‍തൂക്കമെന്ന പരമ്പരാഗത രീതിയാണ് തകിടം മറിഞ്ഞത്. കേരളത്തിലുടനീളം അന്ന് യു.ഡി.എഫ് തരംഗം ആഞ്ഞു വീശിയപ്പോള്‍ കോഴിക്കോട് മാത്രമാണ് ഇടതിനെ പിന്തുണച്ചത്. പതിന്നാല് ജില്ലാ പഞ്ചായത്തുകളില്‍ എട്ടും യു.ഡി.എഫ് നേടി. ഗ്രാമപഞ്ചായത്തുകളില്‍ 579 എണ്ണത്തില്‍ യു.ഡി.എഫ് വിജയിച്ചപ്പോള്‍ 347 എണ്ണത്തില്‍ മാത്രമേ ഇടതുമുന്നണിക്ക് വിജയിക്കാനായുള്ളൂ. അതേസമയം നഗരസഭകളില്‍ മുന്‍തൂക്കം നേരിയ തോതിലെങ്കിലും നിലനിറുത്താന്‍ ഇടതു മുന്നണിക്ക് കഴിഞ്ഞിരുന്നു. 11 നഗരസഭകള്‍ യു.ഡി.എഫിന് ലഭിച്ചപ്പോള്‍ 13 എണ്ണം എല്‍.ഡി.എഫിന് നേടാനായി. കോര്‍പറേഷനുകള്‍ രണ്ടെണ്ണം യു.ഡി.എഫിന് ലഭിച്ചപ്പോള്‍ മൂന്നെണ്ണം ഇടതു മുന്നണിക്ക് ലഭിച്ചു.
ഇപ്പോഴാകട്ടെ തികച്ചും വ്യത്യസ്തമായ രാഷ്ട്രീയ അന്തരീക്ഷത്തിലാണ് തിരഞ്ഞെടുപ്പ് നടക്കാന്‍ പോവുന്നത്. രണ്ടു മുന്നണികളിലെയും കക്ഷികളില്‍ മാറ്റമുണ്ടായിരിക്കുന്നു. നഗരസഭകളുടെയും പഞ്ചായത്തുകളുടെയും അതിര്‍ത്തികളും പുനര്‍നിര്‍ണയിക്കപ്പെട്ടു. പുതിയ ഒരു കോര്‍പറേഷന്‍ കൂടി വന്നു കണ്ണൂര്‍. മുനിസിപ്പാലിറ്റികളുടെയും ഗ്രാമപഞ്ചായത്തുകളുടെയും എണ്ണം കൂടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha