ആ യാത്ര നിയമവിരുദ്ധം തന്നെയെന്ന നിലപാടില്‍ ഉറച്ച് മോട്ടോര്‍ വാഹന വകുപ്പ്. കായംകുളത്ത് മന്ത്രി എം കെ മുനീര്‍ സഞ്ചരിച്ച വാഹനമിടിച്ച് കോളേജ് അദ്ധ്യാപകന്‍ മരിച്ച സംഭവത്തില്‍ മുഖ്യമന്ത്രിയുടെ വാദം തള്ളി മോട്ടോര്‍ വാഹനവകുപ്പ്. മന്ത്രിയുടെ ആംഡബര കാര്‍ യാത്ര നിയമവിരുദ്ധമെന്ന നിലപാടിലാണ് വകുപ്പ്.
നേരത്തെ മുഖ്യമന്ത്രി ഉമ്മന്‍ ചാണ്ടി മുനീറിന്റെ ആഡംബര കാര്‍ ഉപയോഗത്തെ ന്യായീകരിച്ച് രംഗത്തെത്തിയിരുന്നു. ഇതിനു പിന്നാലെയാണ് മന്ത്രിയുടെ യാത്ര നിയമവിരുദ്ധമെന്നു കാട്ടി മോട്ടോര്‍ വാഹന വകുപ്പ് രംഗത്തെത്തിയത്.
വ്യവസ്ഥകള്‍ പാലിക്കാതെയാണ് സ്വകാര്യ ആഡംബര വാഹനത്തില്‍ സര്‍ക്കാന്‍ നമ്പര്‍ പ്ലേറ്റ് സ്ഥാപിച്ചത് എന്നതിനാല്‍ ആലപ്പുഴ ആര്‍ടിഒയില്‍നിന്ന് വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ടെന്ന് ട്രാന്‍സ്‌പോര്‍ട്ട് കമ്മീഷണര്‍ ആര്‍ ശ്രീലേഖ വ്യക്തമാക്കി. മന്ത്രി മുനീറിന് അനുവദിച്ച \'കേരള സ്‌റ്റേറ്റ് 17\' എന്ന നമ്പറാണ് അപകടത്തില്‍പെട്ട ആഡംബര കാറായ റേഞ്ച് റോവറിന് ഉപയോഗിച്ചത്. മന്ത്രിയുടെ ഔദ്യോഗിക വാഹനമായ ടൊയോട്ട ഇന്നോവയ്ക്ക് അനുവദിച്ചതാണ് ഈ നമ്പര്‍ പ്ലേറ്റ് എന്നാണ് മോട്ടോര്‍ വാഹന വകുപ്പ് ചൂണ്ടിക്കാട്ടുന്നത്. അപകടത്തില്‍പെട്ട റേഞ്ച് റോവര്‍ (കെഎല്‍ 56 ജെ999) രജിസ്റ്റര്‍ ചെയ്തിരിക്കുന്നത് മലപ്പുറം കോട്ടക്കല്‍ സ്വദേശിയായ സി കെ വി യൂസഫിന്റെ പേരിലാണ്.
മന്ത്രി എം.കെ. മുനീര്‍ സഞ്ചരിച്ച ആഡംബര കാറിടിച്ച് സ്‌കൂട്ടര്‍ യാത്രികനായ കോളജ് അദ്ധ്യാപകന്‍ പുതുപ്പള്ളി ഗോവിന്ദമുട്ടം മുത്തേഴത്ത് പ്രഫ ശശികുമാറാ(51)ണ് കഴിഞ്ഞ ദിവസം മരിച്ചത്. വാഹനമോടിച്ചിരുന്ന മലപ്പുറം കാരക്കുന്ന് പുളിങ്കുന്നില്‍ സമീറിനെ (30) പൊലീസ് അറസ്റ്റ് ചെയ്യുകയും ചെയ്തു. ബീക്കണ്‍ ലൈറ്റും സര്‍ക്കാര്‍ നമ്പര്‍ പ്ലേറ്റും ആഡംബര കാറില്‍ ഉപയോഗിച്ചായിരുന്നു മന്ത്രിയുടെ യാത്ര. അപകടം നടന്നയുടന്‍ ബീക്കണ്‍ ലൈറ്റും നമ്പര്‍ പ്ലേറ്റും മോട്ടോര്‍ വാഹന വകുപ്പ് അധികൃതര്‍ അഴിച്ചുമാറ്റിയിരുന്നു. ഈ നടപടി വിവാദമാകുമെന്ന് അറിഞ്ഞതോടെ അധികൃതര്‍ ഇത് പുനഃസ്ഥാപിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha