തെരുവുനായ കുറുകെ ചാടി.... കാര്‍ നിയന്ത്രണം വിട്ട് താഴ്ചയിലേക്ക് മറിഞ്ഞ് യുവാവിന് ദാരുണാന്ത്യം. റോഡിന് കുറുകേ ചാടിയ തെരുവുനായയെ രക്ഷിക്കാന്‍ വെട്ടിച്ച കാറാണ് നിയന്ത്രണം വിട്ട് താഴ്ചയിലേക്ക് മറിഞ്ഞത്. . കാറിലുണ്ടായിരുന്നവരും പിന്നാലെ വന്ന രണ്ട് ബൈക്ക് യാത്രികരും അടക്കം നാലു പേര്‍ക്ക് പരുക്കേറ്റു. ഓമല്ലൂര്‍ പറയനാലി വല്യവീട്ടില്‍ ഷിബിന്‍ബാബു (26) ആണ് മരിച്ചത്.

ശനിയാഴ്ച പുലര്‍ച്ചെ 12.30 നാണ് അപകടം നടന്നത്. സെന്റ് പീറ്റേഴ്സ് ജങ്ഷനില്‍ നിന്നും പാഞ്ഞു വന്ന കാര്‍ റിങ് റോഡിലെ പോസ്റ്റ് ഇടിച്ചു തകര്‍ത്ത് അരികില്‍ നിന്ന വന്മരത്തില്‍ ഇടിച്ച് താഴ്ചയിലുള്ള സ്റ്റേഡിയം റോഡിലേക്ക് മറിയുകയായിരുന്നു.കമ്പി പൊട്ടി വീണ ഉടന്‍ തന്നെ വൈദ്യുതി ബന്ധം വിഛേദിക്കപ്പെട്ടു. എന്നാല്‍ ഒടിഞ്ഞ കമ്പി കാറിന് പിന്നാലെ വന്ന ബൈക്ക് യാത്രക്കാരുടെ ശരീരത്തിലേക്ക് അടിച്ചും തുളച്ചും കയറി. കാറില്‍ മൂന്നുപേരാണ് ഉണ്ടായിരുന്നത്. കുറുകെ ചാടിയ നായയെ കണ്ട് വെട്ടിക്കാന്‍ ശ്രമിച്ചപ്പോഴാണ് അപകടം എന്നാണ് കാറിലുണ്ടായിരുന്ന രണ്ടു പേരുടെ മൊഴി.

കാര്‍ നിശേഷം തകര്‍ന്നു. വലിയ ശബ്ദം കേട്ട് സ്റ്റേഡിയത്തിലെ സെക്യൂരിറ്റിയും സമീപത്ത് തെരഞ്ഞെടുപ്പ് പോസ്റ്റര്‍ ഒട്ടിച്ചു നിന്നവരും ഓടി എത്തിയപ്പോഴാണ് അപകടം അറിയുന്നത്. ഉടന്‍ തന്നെ അവര്‍ ഫയര്‍ഫോഴ്സിനെ വിവരം അറിയിച്ചു. കാറിന്റെ ചില്ല് പൊട്ടിച്ചാണ് അകത്തുണ്ടായിരുന്നവരെ പുറത്തെടുത്തത്. കാര്‍ ഓടിച്ചിരുന്നത് ഷിബിന്‍ ആയിരുന്നു.

കാറില്‍ കുടെയുണ്ടായിരുന്ന സുഹൃത്തുക്കളായ വാര്യാപുരം സ്വദേശികളായ അജിത്ത്്, സന്ദീപ് എന്നിവരെ പരിക്കുകേളാടെ ആശുപത്രിയില്‍ പ്രവേശിപ്പിച്ചു. പത്തനംതിട്ട ബിസ്മി ഷോറൂമിലെ ജീവനക്കാരനാണ് ഷിബിന്‍.