യുവതിയെ വെട്ടി പരിക്കേൽപ്പിച്ച സുഹൃത്തിനെ പൊലീസ് അറസ്‌റ്റ് ചെയ്‌തു. നെടുംകണ്ടം, തച്ചടി കേട്ടയിൽ ബിപിൻ (33)ആണ് അറസ്റ്റിലായത്.

സംഭവം സംബന്ധിച്ച് പൊലീസ് പറയുന്നതിങ്ങനെയാണ്... അടിമാലി ടൗണിനു സമീപം പക്കായിപ്പടിയിൽ 12 വയസ്സുള്ള മകനുമായി താമസിക്കുന്ന കീരിത്തോട് കണ്ടത്തിൽ സോഫിയയുടെ (നിഷ,34) വീട്ടിൽ വെളളിയാഴ്ച രാത്രി 7 മണിയോടെ നിഷയുടെ സുഹൃത്തായ ബിപിൻ എത്തി.

നിഷ വാതിൽ തുറക്കാതെയിരുന്നതിനെ തുടർന്ന് വീടിന്റെ ഗ്ലാസ് ജനൽ ഇടിച്ച് തകർക്കുകയായിരുന്നു. നിഷ അടിമാലി പൊലീസിൽ ഫോണിൽ വിളിച്ചു പറഞ്ഞതിനെ തുടർന്ന് പൊലീസ് എത്തി. ഇരുവരും സുഹൃത്തുക്കളാണെന്ന് പറഞ്ഞതിനാൽ ബിപിനോട് വീട്ടിൽ നിന്നും പോകാൻ ആവശ്യപ്പെടുകയും ബിപിൻ പോവുകയും ചെയ്തു.

എന്നാൽ നിഷയുടെ വീടിന് സമീപം ഒളിച്ചിരുന്ന ബിപിൻ പുലർച്ചെ രണ്ട് മണിയോടെ നിഷയുടെ വീട്ടിൽ എത്തി അതിക്രമിച്ച് കയറുകയും നിഷയുടെ കഴുത്തിന് വെട്ടി പരിക്കേൽപ്പിക്കുകയുമായിരുന്നു.

അടിമാലി താലൂക്ക് ആശുപത്രിയിൽ നിഷയെ പ്രവേശിപ്പിച്ചെങ്കിലും മുറിവ് ഗുരുതരമായതിനാൽ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

അടിമാലി താലൂക്ക് ആശുപത്രി പരിസരത്തു നിന്നും അടിമാലി സി.ഐ അനിൽ ജോർജ്ജും സംഘവും ബിപിനെ കസ്റ്റഡിയിൽ എടുത്തു. ബിപിന് ഭാര്യയും മക്കളുമുണ്ട്. നിഷയുടെ വീട്ടിലെത്തി തെളിവെടുപ്പ് നടത്തി കോടതിയിൽ ഹാജരാക്കിയ പ്രതിയെ റിമാന്റു ചെയ്തു.