യുവതിയ്ക്ക് ഒപ്പമുള്ള നഗ്‌നചിത്രങ്ങള്‍ സോഷ്യല്‍ മീഡിയയില്‍ പ്രചരിപ്പിക്കുമെന്ന് ഭീഷണിപ്പെടുത്തി 25 ലക്ഷം തട്ടാന്‍ ശ്രമിച്ച യുവാവ് അറസ്റ്റില്‍. ഉളിയത്തടുക്ക നാഷണല്‍ നഗറിലെ കെ.നൗഫലാണ് പൊലീസിന്റെ പിടിയിലായത്. നൗഫല്‍ ഭീഷണി മുഴക്കിയതായി അബ്ദുല്‍ ഖാദര്‍ എന്നയാള്‍ പരാതി നല്‍കിയതിന് പിന്നാലെയാണ് പ്രതിയെ പിടികൂടിയത്.

അബ്ദുല്‍ ഖാദര്‍ സോഷ്യല്‍ മീഡിയ വഴി പരിചയപ്പെട്ട യുവതിയുമായി ഒണ്‍ലൈനിലൂടെ ചാറ്റിംഗ് നടത്തിയിരുന്നു. ഇതിന് പിന്നാലെയാണ് യുവതിക്കൊപ്പമുള്ള നഗ്‌നചിത്രങ്ങള്‍ കൈയ്യിലുണ്ടെന്ന് കാണിച്ച് നൗഫല്‍ ഖാദറിനെ സമീപിച്ചത്. ചിത്രം പുറത്തു വിടാതിരിക്കണമെങ്കില്‍ 25 ലക്ഷം രൂപ നല്‍കണമെന്നായിരുന്നു നൗഫലിന്റെ ആവശ്യം. എന്നാല്‍ തുക കൂടുതലാണെന്ന് പറഞ്ഞതോടെ പത്ത് ലക്ഷം നല്‍കണമെന്നായി ആവശ്യം.കെണിയില്‍ പെട്ടത് മനസിലാക്കിയ ഖാദര്‍ 50,000 രൂപയുമായി നൗഫലിനെ സമീപിച്ചെങ്കിലും അത് വാങ്ങി ബാക്കി പണവുമായി വരാന്‍ ഇയാള്‍ ആവശ്യപ്പെട്ടതായും ഖാദര്‍ പറയുന്നു.
ഇതിന് പിന്നാലെയാണ് ഖാദര്‍ വിദ്യാനഗര്‍ പൊലീസില്‍ പരാതിപ്പെട്ടത്. തുടര്‍ന്ന് ബാക്കി തുക ശരിയായിട്ടുണ്ടെന്ന് പറഞ്ഞ് വിളിച്ച് വരുത്തുകയും നൗഫലിനെ കയ്യോടെ പിടികൂടുകയുമായിരുന്നുവെന്ന് പൊലീസ് പറഞ്ഞു. ഇയാളില്‍ നിന്നും മൊബൈല്‍ ഫോണും പിടിച്ചെടുത്തിട്ടുണ്ട്. നൗഫലിനൊപ്പം നിരവധി പേരുണ്ടെന്നും ഇവര്‍ക്കതിരെ അന്വേഷണം ആരംഭിച്ചതായും പൊലീസ് വ്യക്തമാക്കി.