മണര്‍കാട് ഗ്രാമപഞ്ചായത്ത് രണ്ടാം വാര്‍ഡ് യു.ഡി.എഫ്. സ്ഥാനാര്‍ഥി സാബു ചെറിയാന്റെ പ്രചാരണത്തിന്റെ മൈക്ക് അനൗണ്‍സ്‌മെന്റ് നടത്തിയത് ഉമ്മന്‍ ചാണ്ടി ! അനൗണ്‍സ്‌മെന്റ് വാഹനം പ്രചാരാണം തുടങ്ങിയപ്പോള്‍ മൈക്കിലൂടെയുള്ള ശബ്ദം തിരിച്ചറിഞ്ഞ നാട്ടുകാര്‍ തങ്ങളുടെ പ്രിയ നേതാവിനെ കാണാന്‍ ഓടിയെത്തി. എന്നാല്‍ ഉമ്മന്‍ ചാണ്ടിയുടെ ശബ്ദം മാത്രമായിരുന്നു ഉണ്ടായിരുന്നത്, ആളില്ലായിരുന്നു. കാര്യം അറിഞ്ഞപ്പോള്‍ പലരും നിരാശരായി.

മുന്‍മുഖ്യമന്ത്രിയും സ്ഥലം എം.എല്‍.എയുമായ ഉമ്മന്‍ ചാണ്ടി, സാബു ചെറിയാന് വോട്ട് അഭ്യര്‍ഥിക്കുന്ന ഓഡിയോ നേരത്തെ റെക്കോര്‍ഡ് ചെയ്ത് ഉപയോഗിച്ചായിരുന്നു അനൗണ്‍സ്‌മെന്റ്. എല്ലാ തെരഞ്ഞെടുപ്പിലും കുറഞ്ഞത് ഒരു തവണയെങ്കിലും ഈ പ്രദേശത്ത് വരുന്ന ഉമ്മന്‍ ചാണ്ടിക്ക് ഇത്തവണ ഇവിടേക്ക് എത്തിചേരാന്‍ സാധിച്ചിട്ടില്ല. അതില്‍ അണികളില്‍ പലരും ദുഖിതരുമാണ്. അതുകൊണ്ടാണ് ഇത്തരമൊരു ആശയം കൊണ്ടുവന്നതെന്ന് സാബു ചെറിയാന്‍ പറഞ്ഞു.

ഉമ്മന്‍ ചാണ്ടി എന്ന് പറയുന്നത് ഈ പ്രദേശത്തുള്ളവര്‍ക്കോ പുതുപ്പള്ളിക്കാര്‍ക്കോ കോട്ടയംകാര്‍ക്കോ മാത്രമല്ല കേരളത്തിലുള്ള എല്ലാ വിഭാഗം ആളുകള്‍ക്കും ഒരു വികാരമാണെന്ന് അദ്ദേഹം പറഞ്ഞു. താന്‍ പഞ്ചായത്തംഗമായിരുന്ന കാലയളവിലും ബ്ലോക്ക് പഞ്ചായത്തംഗമായിരുന്ന കാലയളവിലും ഈ പ്രദേശത്തിന്റെ വിവിധ ആവശ്യങ്ങള്‍ക്കായി അദ്ദേഹത്തെ സമീപച്ചപ്പോള്‍ എപ്പോഴും അനുകൂലമായ നിലപാടായിരുന്നു ഉമ്മന്‍ ചാണ്ടി സ്വീകരിച്ചിരുന്നത്. അതുപോലെ ഈ പ്രദേശത്തെ ജനങ്ങളുടെ ആവശ്യങ്ങള്‍ അന്വേഷിക്കുകയും നടത്തിക്കൊടുക്കുന്നതിലും അദ്ദേഹം പ്രത്യേകം താല്‍പ്പര്യം പ്രകടിപ്പിച്ചിരുന്നു. അതുകൊണ്ട് ഈ വാര്‍ഡിലുള്ളവര്‍ക്ക് അദ്ദേഹവുമായി ഒരു പ്രത്യേക ആത്മബന്ധമുണ്ടെന്നു സാബു പറഞ്ഞു. കോവിഡിന്റെ പശ്ചാത്തലത്തിലും സംസ്ഥാനത്തൊട്ടാകെയുള്ള തെരഞ്ഞെടുപ്പിന്റെ കാര്യങ്ങള്‍ക്ക് ചുക്കാന്‍പിടിക്കുന്നതിനാലാണ് ഉമ്മന്‍ ചാണ്ടിക്ക് ഇവിടേക്ക് എത്തിചേരാന്‍ സാധിക്കാത്തതെന്ന് പറഞ്ഞ് ആശ്വസിപ്പിച്ചാണ് സാബു ജനങ്ങളെ പരിച്ചിവിട്ടത്.എല്‍.ഡി.എഫ്. സ്ഥാനാര്‍ഥി ജോയിമോന്‍ വാളാട്ടും എന്‍.ഡി.എ. സ്ഥാനാര്‍ഥി സിന്ധു അനില്‍കുമാറുമാണ് സാബുവിന്റെ എതിരാളികള്‍.