സിസ്റ്റര്‍ അഭയ കേസില്‍ ഒന്നാം പ്രതി ഫാ.തോമസ് കോട്ടൂരിന്റെ വാദം ഇന്നലെ ഒരു ദിവസം കൊണ്ട് തിരുവനന്തപുരം സിബിഐ കോടതിയില്‍ പൂര്‍ത്തിയായി. മൂന്നാം പ്രതി സിസ്റ്റര്‍ സെഫിയുടെ വാദം കഴിഞ്ഞ ദിവസം പൂര്‍ത്തിയാക്കിയിരുന്നു. പ്രതികളുടെ വാദത്തിന് പ്രോസിക്യൂഷന്‍ ഇന്ന് മറുപടി വാദം പറയും (ഡിസംബര്‍ 10). പ്രോസിക്യൂഷന്‍ സാക്ഷികളായി സിബിഐ 49 പേരെ കോടതിയില്‍ വിസ്തരിച്ചു. പ്രതിഭാഗം സാക്ഷികളായി ഒരാളെ പോലും വിസ്തരിക്കാന്‍ പ്രതികള്‍ക്ക് സാധിച്ചില്ല.

അഭയ കേസില്‍ താന്‍ നിരപരാധിയാണെന്നും പ്രതികള്‍ മറ്റ് പലരും ആണെന്നും ഒന്നാം പ്രതി ഫാ.തോമസ് കോട്ടൂര്‍ സിബിഐ കോടതിയില്‍ വാദിച്ചു. സിബിഐ തന്നെ പ്രതിയാക്കിയത് കെട്ടിച്ചമച്ച കഥകളുടെ അടിസ്ഥാനത്തിലാണെന്ന് ഒന്നാം പ്രതി ഫാ.കോട്ടൂര്‍ വാദിച്ചു.

ദൃക്‌സാക്ഷിയും പ്രോസിക്യൂഷന്‍ മൂന്നാം സാക്ഷിയുമായ അടയ്ക്ക രാജു സംഭവ ദിവസം പുലര്‍ച്ചെ കോണ്‍വെന്റില്‍ വച്ച് പ്രതികളെ കണ്ടുവെന്ന മൊഴി വിശ്വാസയോഗ്യമല്ലെന്ന് ഒന്നാം പ്രതിയുടെ അഭിഭാഷകന്‍ വാദിച്ചു.