പിണറായി സര്ക്കാരിനെ കാലില് തൂക്കി കടലില് കളയണം; വീണ്ടും പൊട്ടിത്തെറിച്ച് സുരേഷ് ഗോപി; വിശ്വാസികളെ വഞ്ചിച്ച സര്ക്കാരിനെതിരെ പ്രതികരിക്കണം; പ്രതിപക്ഷം വെറും പാവ; വിവാദ പ്രസ്താവനകള് തുടര്ന്ന് സുരേഷ് ഗോപി എം.പി
തന്റെ സിനിമയിലെ പഞ്ചു ഡയലോഗുകള് ഇപ്പോള് സുരേഷ് ഗോപി പയറ്റുന്നത് ഇപ്പോള് പിണറായി വിജയന്റെ നെഞ്ചത്താണ്. സംസ്ഥാന സര്ക്കാരിനെതിരെ രൂക്ഷ വിമര്ശനവുമായി രാജ്യസഭാ എം പിയും സിനിമാ താരവുമായ സുരേഷ് ഗോപി. ഇത്രയും മോശപ്പെട്ട ഒരു ഭരണം കേരളത്തിലെന്നല്ല ഇന്ത്യയിലെ ഒരു സംസ്ഥാനത്തും ഉണ്ടായിട്ടില്ലെന്നും ഈ സര്ക്കാരിനെ എടുത്ത് കാലില് പിടിച്ച് പുറത്തെറിയണമെന്നും സുരേഷ് ഗോപി എം.പി. തളാപ്പില് കണ്ണൂര് കോര്പ്പറേഷനിലെ എന്.ഡി.എ.സ്ഥാനാര്ഥികളുടെ സംഗമം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്തെ സര്ക്കാരും പ്രതിപക്ഷവും ഒരുപോലെ പരാജയമാണ്. സര്ക്കാര് വിശ്വാസികളെ വിഷമിപ്പിച്ചു. ഈ സര്ക്കാരിനെ ഒടുക്കിയേ മതിയാകൂയെന്നും അദ്ദേഹം പറഞ്ഞു.
രാജ്യം ഇതുവരെ കാണാത്ത വൃത്തികെട്ട ഭരണമാണ് പിണറായി സര്ക്കാരിന്റെ ഭരണമാണ്. നെറികേട് കാണിച്ച ഈ സര്ക്കാരിനെ പ്രതിരോധിക്കാന് പ്രതിപക്ഷത്തിന് സാധിക്കുന്നില്ല. തട്ടിപ്പും വെട്ടിപ്പും കൊള്ളയുമാണ് സര്ക്കാരിന്റെ മുഖമുദ്ര. ഇത്തരം സര്ക്കാരിനെതിരെ പ്രതികരിക്കാനുള്ള അവസരമാണ് തിരഞ്ഞെടുപ്പ്. കേരളത്തിലെ പ്രതിപക്ഷം പാവമാണ്. ഇല്ലെങ്കില് ആദ്യ പ്രളയത്തിനു ശേഷം തന്നെ സര്ക്കാരിനെയെടുത്ത് പുറത്തു കളഞ്ഞേനെ എന്നും അദ്ദേഹം പറഞ്ഞു.
'വിശ്വാസികളെ വേദനിപ്പിച്ച സര്ക്കാരാണിത്. അത്തരത്തില് മൂന്നാം മണ്ഡലകാലമാണിത്. എല്ലാത്തിനും ഒരു തീര്ത്തെഴുത്തുണ്ടാകും എന്നു തന്നെയാണ് കരുതുന്നത്. പത്ത് ബി.ജെ.പി. എം.എല്.എ.മാര് നിയമസഭയില് ഉണ്ടായിരുന്നെങ്കില് എത്ര നന്നായിരുന്നു എന്ന് ഈ അവസരത്തില് ചിന്തിച്ചു പോകുന്നു'. വരും കാലത്ത് മാറ്റങ്ങള് ഉണ്ടാവുക തന്നെ ചെയ്യുമെന്നും സുരേഷ് ഗോപി പറഞ്ഞു. ദേശീയ ഉപാധ്യക്ഷന് എ.പി.അബ്ദുള്ളക്കുട്ടി, സംസ്ഥാന സെക്രട്ടറിമാരായ കെ.രഞ്ജിത്ത്, എസ്.സുരേഷ്, ജില്ലാ പ്രസിഡന്റ് എന്.ഹരിദാസ്, ബിജു ഏളക്കുഴി, സ്ഥാനാര്ഥികള് എന്നിവര് പങ്കെടുത്തു.
ഒന്നാംഘട്ട തദ്ദേശ തിരഞ്ഞെടുപ്പില് വോട്ട് രേഖപ്പെടുത്തിയ സുരേഷ് ഗോപി അന്ന് ഉച്ചയ്ക്ക് മുമ്പ് തന്നെ എല്ലാവരും പോളിംഗ് ബൂത്തിലെത്തി വോട്ട് ചെയ്യണമെന്ന് ആഹ്വാനം ചെയ്തിരുന്നു. ഉച്ചയ്ക്ക് ശേഷം കിംവദന്തികള് പരത്താന് ചില ജാരസംഘങ്ങള് ഇറങ്ങിയിട്ടുണ്ടെന്നായിരുന്നു താരത്തിന്റെ പ്രതികരണം.തന്റെയടുത്ത് ആവശ്യങ്ങളുമായി എത്തുന്നവര് ബി ജെ പി ജില്ലാ പ്രസിഡന്റിന്റെ ശുപാര്ശ കൂടി കൊണ്ടുവരണമെന്ന വിവാദ പ്രസ്താവനയും സുരേഷ് ഗോപി ഈ തിരഞ്ഞെടുപ്പ് കാലത്താണ് നടത്തിയത്. ജില്ലാ പ്രസിഡന്റുമാരുടെ കത്തുമായി വരാത്ത ആര്ക്കും താന് യാതൊരു സഹായവും ചെയ്യില്ലെന്നും അദ്ദേഹം പറഞ്ഞു. തിരുവനന്തപുരത്ത് പ്രചാരണം നടത്തവെ യു ഡി എഫ് - എല് ഡി എഫ് സ്ഥാനാര്ത്ഥികള് മലിനമാണെന്ന പരാമര്ശവും സുരേഷ് ഗോപിയുടെ ഭാഗത്ത് നിന്നുണ്ടായിരുന്നു.
https://www.facebook.com/Malayalivartha