പൊന്നളിയാ വണ്ടിവിട്ടോ... കസ്റ്റംസിന് സ്വപ്ന സുരേഷും സരിത്തും നല്കിയ രഹസ്യ മൊഴിയിലെ ഉന്നതരെ പൊക്കാനുറച്ച് എന്ഫോഴ്സ്മെന്റ്; റിവേഴ്സ് ഹവാല ഇടപാടില് സ്വപ്നയെയും സരിത്തിനെയും ചോദ്യംചെയ്യും; വമ്പന്മാര്ക്ക് പുറമേ മന്ത്രി പുത്രന്മാരും അളിയനും ഉള്ളതായി സൂചന; അന്വേഷണം കടുപ്പിച്ച് ഇഡി
സ്വര്ണക്കടത്ത് അന്വേഷിക്കാന് വന്ന കേന്ദ്ര അന്വേഷണ സംഘം കേരളത്തെ ഞെട്ടിപ്പിക്കുന്ന അന്വേഷണത്തിലേക്കാണ് കടന്നിരിക്കുന്നത്. സ്വപ്നയുടേയും സരിത്തിന്റേയും രഹസ്യ മൊഴികളെ അടിസ്ഥാനമാക്കി നീങ്ങാനുള്ള ശ്രമത്തിലാണ് എന്ഫോഴ്സ്മെന്റ് ഡയറക്ടറേറ്റ്. യു.എ.ഇ കോണ്സുലേറ്റിന്റെ നയതന്ത്ര ചാനലിലൂടെ രാഷ്ട്രീയ പ്രമുഖര് ഉള്പ്പെടെ ഉന്നതരുടെ കള്ളപ്പണം ഡോളര് ആയി വിദേശത്തേക്കു കടത്തിയ റിവേഴ്സ് ഹവാലയിലെ ഇടപാടുകള് കണ്ടെത്തുകയാണ് ലക്ഷ്യം. റിവേഴ്സ് ഹവാല ഇടപാടുമായി ബന്ധപ്പെട്ട് ചില മന്ത്രിമാരും ഭരണഘടനാ പദവിയിലുള്ള ഉന്നതനും സിനിമാതാരവും ഉള്പ്പെടെ പ്രമുഖരുടെ പേരുകള് കസ്റ്റംസിനോട് വെളിപ്പെടുത്തിയ സ്വര്ണക്കടത്തു കേസ് പ്രതികളായ സ്വപ്ന സുരേഷിനെയും പി.എസ്. സരിത്തിനെയും ഇ.ഡി ഉടന് ചോദ്യം ചെയ്യും.
അനധികൃത ഇടപാടുകളിലൂടെയും കോഴയായും ലഭിച്ച നൂറു കോടിയിലധികം രൂപ സ്വപ്നയുടെയും സന്ദീപിന്റെയും സഹായത്തോടെ ചില ഉന്നതര് യു.എ.ഇയിലേക്കു കടത്തിയ റിവേഴ്സ് ഹവാലാ ഇടപാടിനെക്കുറിച്ചാണ് ഇഡി അന്വേഷിക്കുക. ഈ ഉന്നതരുടെ വിദേശത്തേതടക്കം കള്ളപ്പണ, ബിനാമി നിക്ഷേപവും ഇടപാടുകളും, പ്രത്യേകം കേസെടുത്ത് അന്വേഷിക്കാനാണ് ഇ.ഡിയുടെ നീക്കം.
സ്വപ്നയെയും സരിത്തിനെയും മൂന്നു ദിവസം ജയിലില് ചോദ്യം ചെയ്യാന് അനുമതി തേടി ഇ.ഡി ഇന്നലെയാണ് എറണാകുളം പ്രിന്സിപ്പല് സെഷന്സ് കോടതിയില് അപേക്ഷ നല്കിയത്. അപേക്ഷ അടുത്ത ദിവസംതന്നെ കോടതി പരിഗണിച്ചേക്കും. നിയമസഭാ സ്പീക്കറുടെ ഉള്പ്പെടെ പേരുകള് ആരോപണവുമായി ബന്ധപ്പെട്ട രാഷ്ട്രീയ വിവാദങ്ങള്ക്ക് വഴിമരുന്നിട്ടതിനു പിന്നാലെയാണ് സംഭവത്തെക്കുറിച്ച് വിശദ അന്വേഷണത്തിന് ഇ.ഡി തിരുവനന്തപുരത്ത് എത്തുന്നത്.
സ്വപ്നയുമൊത്ത് ദുബായിലെ ബുര്ജ് ഖലീഫയില് വച്ച് ഉന്നതനെടുത്ത ചിത്രങ്ങള് ഫോണുകളുടെ ശാസ്ത്രീയ പരിശോധനയില് വീണ്ടെടുത്തിട്ടുണ്ട്. ദുബായിലെ ഭരണക്രമം പഠിക്കാന് കോണ്സുലേറ്റിന്റെ ചെലവില് ചില ഉന്നതരെ സ്വപ്നയും സംഘവും യു.എ.ഇയില് എത്തിച്ചതിന്റെ വിവരങ്ങളും കേന്ദ്ര ഏജന്സികള്ക്കു ലഭിച്ചു.
മൂന്നുവര്ഷമായി സ്വപ്നയും സംഘവും റിവേഴ്സ് ഹവാല ഇടപാട് നടത്തിവന്നതായാണ് കണ്ടെത്തല്. ചില മന്ത്രിമാരുടെ വിദേശത്തെ സാമ്പത്തിക ഇടപാടുകളും നിക്ഷേപങ്ങളും സ്വപ്ന കസ്റ്റംസിനോട് വെളിപ്പെടുത്തിയിട്ടുണ്ട്. മന്ത്രിയുടെ മക്കളും അന്വേഷണ പരിധിയിലാണ്. ലൈഫ് കോഴ ഇടപാടുമായി ബന്ധപ്പെട്ട് ഒരു മന്ത്രിയുടെ മകന്റെ ഭാര്യാപിതാവിന്റെ ഇടപാടുകളെക്കുറിച്ചും സംശയമുണ്ട്. പോലീസുമായി ബന്ധപ്പെട്ട വന് ഇടപാടിലും ഈ മന്ത്രിബന്ധു സംശയമുനയിലുണ്ട്.
അതേസമയം കേന്ദ്രവും റിവേഴ്സ് ഹവാലയില് നിലപാട് കടുപ്പിച്ചിട്ടുണ്ട്. രാഷ്ട്രീയ, സിനിമ, ഉദ്യോഗസ്ഥ പ്രമുഖരുടെ കള്ളപ്പണം ഡോളറാക്കി സ്വപ്നയും സംഘവും യു.എ.ഇ കോണ്സുലേറ്റിന്റെ ഡിപ്ലോമാറ്റിക് ചാനലിലൂടെ കടത്തിയ റിവേഴ്സ് ഹവാല ഇടപാടിലുള്പ്പെട്ടത് എത്ര ഉന്നതനായാലും കണ്ടെത്തുന്നതിന് അന്വേഷണം ശക്തമാക്കാന് കേന്ദ്ര സര്ക്കാര് നിര്ദ്ദേശം. ഇതോടെ വന് സ്രാവുകളുള്പ്പെടെ ഇടപാടിലുള്പ്പെട്ടവരെല്ലാം കുരുങ്ങുമെന്നുറപ്പായി.
കസ്റ്റംസും എന്ഫോഴ്സ്മെന്റ് ഡയറക്ടറേറ്റും സംയുക്തമായാവും അന്വേഷിക്കുക. കോണ്സുലേറ്റിലെ ഉന്നതരും നിരവധി വിദേശികളുമുള്പ്പെടെ പ്രതികളായേക്കും. ഡിപ്ലോമാറ്റിക് ചാനലിലൂടെയുള്ള റിവേഴ്സ് ഹവാല ഉന്നതര്ക്ക് കുരുക്കാകുക തന്നെ ചെയ്യും.
https://www.facebook.com/Malayalivartha