അപ്പടിയാ കാര്യങ്ങള്... പോലീസ് മേധാവി സ്ഥാനത്ത് നിന്നും ലോക്നാഥ് ബെഹ്റയെ മാറ്റുന്നതില് അടുത്ത മാസം തീരുമാനമെന്ന് പ്രമുഖ പത്രം; കേരളത്തില് വിവാദം പുകയുമ്പോള് എന്തായിപ്പോഴൊരു മനംമാറ്റമെന്ന് നോക്കുമ്പോള് കാരണം അതൊന്നുമല്ല; വരുന്ന നിയമസഭാ തെരഞ്ഞെടുപ്പാണ് കാരണമത്രെ
കേരളത്തില് ഏറെക്കാലമായി ഡിജിപിയായിരിക്കുന്ന ആളാണ് ലോക്നാഥ് ബഹ്റ. തന്റെ സ്വതസിദ്ധമായ ശൈലിയില് എതിരാളികളുടെ പോലും ബഹുമാനം പിടിച്ചുപറ്റുന്നയാളാണ് ബഹ്റ. ഇടയ്ക്ക് ബഹ്റയെക്കുറിച്ച് പരാതിയുണ്ടെങ്കിലും പ്രതിപക്ഷത്തിനും സമ്മതനാണ്. മലയാളികളേയും കേരളത്തേയും ഏറെ സ്നേഹിക്കുന്ന ആ ലോക്നാഥ് ബഹ്റയെ പോലീസ് മേധാവി സ്ഥാനത്ത് നിന്നും മാറ്റിയേക്കുമെന്ന വാര്ത്തയാണ് മലയാളത്തിലെ ഏറ്റവും പ്രമുഖ പ്രത്രം നല്കിയിരിക്കുന്നത്.
നിയമസഭ തെരഞ്ഞെടുപ്പിന് മുന്പ് പൊലീസ് മേധാവി സ്ഥാനത്ത് നിന്ന് ലോക്നാഥ് ബെഹ്റയെ മാറ്റണോയെന്നതില് തീരുമാനം അടുത്ത മാസത്തോടെ വരുമെന്നാണ് പത്രം പറയുന്നത്. തെരഞ്ഞെടുപ്പിന്റെ ചുമതല ഏതെങ്കിലും എഡിജിപിക്ക് നല്കി ബെഹ്റയെ നിലനിര്ത്താനും ആലോചനയുണ്ട്. എന്നാല് കേന്ദ്ര തെരഞ്ഞെടുപ്പ് കമ്മിഷന്റെ തീരുമാനമാണ് നിര്ണായകമാവുകയെന്നും പത്രം റിപ്പോര്ട്ട് ചെയ്യുന്നു.
സംസ്ഥാന പൊലീസ് മേധാവി പദവിയില് ലോക്നാഥ് ബെഹ്റ നാല് വര്ഷമാവുകയാണ്. മൂന്ന് വര്ഷം ഒരേ പദവിയില് തുടരുന്ന പൊലീസ് ഉദ്യോഗസ്ഥരെ നിയമസഭ തിരഞ്ഞെടുപ്പിന് മുന്പ് മാറ്റണമെന്ന് നിയമമുണ്ട്. ഇതാണ് ബെഹ്റയുടെ മാറ്റത്തെക്കുറിച്ചുള്ള ചര്ച്ചകള്ക്ക് വഴിതുറന്നത്.
മുഖ്യ തിരഞ്ഞെടുപ്പ് ഓഫിസര് ചീഫ് സെക്രട്ടറിയുമായി അനൗദ്യോഗിക ചര്ച്ചകള് നടത്തിയെങ്കിലും ഔദ്യോഗിക ചര്ച്ചകള് ജനുവരിയിലേ തുടങ്ങു. ബെഹ്റയെ മാറ്റുന്നതില് സര്ക്കാരും അന്തിമ തീരുമാനമെടുത്തിട്ടില്ല. അതിനാല് തെരഞ്ഞെടുപ്പിന്റെ ചുമതല ഏതെങ്കിലും എഡിജിപിക്ക് നല്കി ബെഹ്റയെ നിലനിര്ത്താനാണ് ആലോചന.
മാത്രവുമല്ല, അടുത്ത ജൂണില് അദേഹം വിരമിക്കും. വിരമിക്കാന് ആറ് മാസം മാത്രമുള്ള സമയത്ത് സ്ഥലം മാറ്റരുതെന്ന ചട്ടവും ബെഹ്റയ്ക്ക് അനുഗ്രഹമായേക്കും. അങ്ങനെയെങ്കില് ഭരണത്തിന്റെ തുടക്കം മുതല് ഒപ്പമുള്ള ബെഹ്റയെ തെരഞ്ഞെടുപ്പിലും കൂടെ നിര്ത്താനാവും സര്ക്കാര് ശ്രമിക്കുക. തെരഞ്ഞെടുപ്പ് കമ്മിഷന് അനുവദിച്ചില്ലങ്കില് മാത്രം മാറ്റത്തിലേക്കു കടക്കും.
ബെഹ്റ മാറിയാല് ആര്. ശ്രീലേഖ, ഋഷിരാജ് സിങ്, ടോമിന് തച്ചങ്കരി, അരുണ്കുമാര് സിന്ഹ, സുദേഷ്കുമാര് എന്നിവരാണ് ഡിജിപി പദവിക്കായി പരിഗണനയിലുള്ളവര്. ശ്രീലേഖ ഈ മാസം വിരമിക്കും. ഋഷിരാജ് ജൂലായില് വിരമിക്കുന്നതിനാല് ആറ് മാസമെങ്കിലും കാലാവധിയുള്ളരെ പൊലീസ് മേധാവിയാകാവൂവെന്ന മാനദണ്ഡം അദേഹത്തിന് തടസമായേക്കാം.
പ്രധാനമന്ത്രിയുടെ ഉള്പ്പെടെ സുരക്ഷാചുമതലയുള്ള എസ്പിജി ഡയറക്ടറായി തുടരുന്ന അരുണ്കുമാര് സിന്ഹ കേരളത്തിലേക്ക് മടങ്ങാനും സാധ്യതയില്ല. അതോടെ ടോമിന് തച്ചങ്കരിക്കോ സുദേഷ്കുമാറിനോ നറുക്ക് വീഴും. ഇതിനുള്ള ചരടുവലികള് സജീവവുമാണ്.
പോലീസ് മേധാവി എന്ന നിലയില് ഏറെ പേരെടുത്തയാളാണ് ലോക്നാഥ് ബഹ്റ. കഴിവ്, പ്രവര്ത്തനമികവ്, ഭരണ നിര്വഹണം, സേനയിലെ പ്രവൃത്തിപരിചയം എന്നീ മാനദണ്ഡങ്ങളും മുമ്പ് പോലീസ് മേധാവിയായി ജോലിചെയ്തുള്ള പരിചയം, എന്.ഐ.എ., സി.ബി.ഐ. എന്നിവിടങ്ങളിലെ അനുഭവസമ്പത്ത് തുടങ്ങിയ ഘടകങ്ങളൊക്കെ ബെഹ്റയ്ക്ക് അനുകൂലമായി. അതു കൂടാതെ സര്ക്കാരിന് ഏറ്റവും ആഭിമുഖ്യം ബെഹ്റയോടുതന്നെയായിരുന്നു. അതദ്ദേഹം ഇപ്പോഴും കാത്ത് സൂക്ഷിക്കുന്നുണ്ട്.
1985 ബാച്ച് കേരള കേഡര് ഐ.പി.എസ്. ഉദ്യോഗസ്ഥനാണ് ലോക്നാഥ് ബെഹ്റ. ആലപ്പുഴ എ.എസ്.പി ആയാണ് ആദ്യ നിയമനം. തിരുവനന്തപുരം സിറ്റി പോലീസ് ഡെപ്യൂട്ടി കമ്മിഷണര് ആയും കൊച്ചി പോലീസ് കമ്മിഷണര്, പോലീസ് ആസ്ഥാനത്ത് ഐ.ജി., എ.ഡി.ജി.പി. നവീകരണം എന്നീ തസ്തികകളില് പ്രവര്ത്തിച്ചിട്ടുണ്ട്. ഒഡീഷ സ്വദേശിയാണ്. എന്തായാലും ലോക്നാഥ് ബഹ്റയുടെ പോലീസ് മേധാവി സ്ഥാനത്തിലെ തീരുമാനം അന്തിമ തീരുമാനം ഉടനറിയാം.
https://www.facebook.com/Malayalivartha