ഐഎഫ്ഡിസിയുടെ ചെയര്‍മാന്‍ സ്ഥാനത്തേക്ക് സുരേഷ് ഗോപിയെ നിയമിക്കുന്നതായി വാര്‍ത്ത പുറത്തുവന്നതോടെ സുരേഷ് ഗോപിയുടെ കടുംപിടുത്തം കാരണം സിനിമ പെട്ടിക്കുള്ളിലായ നിര്‍മാതാവ് രംഗത്ത്. സുരേഷ് ഗോപിയുടെ നിസ്സഹകരണം കാരണം 2009ല്‍ പൂര്‍ത്തിയാക്കിയ സിനിമ റിലീസ് ചെയ്യാന്‍ സാധിക്കുന്നില്ലെന്ന് ആരോപിച്ച് രംഗത്തെത്തിയത് സംവിധായകന്‍ അനീഷ് വര്‍മ്മയാണ്. സുരേഷ് ഗോപി നായകനായ കാവ്യം എന്ന സിനിമയാണ് ഡബ്ബിങ് പ്രവര്‍ത്തനങ്ങള്‍ പൂര്‍ത്തിയാകാത്തതിനാല്‍ പെട്ടിക്കുള്ളിലായത്. സിനിമയുടെ ഡബ്ബിങ് പൂര്‍ത്തിയാക്കാന്‍ 70 ലക്ഷം നടന്‍ ആവശ്യപ്പെട്ടെന്നും അനീഷ് വര്‍മ്മ പറഞ്ഞു.
2008ല്‍ ആണ് സുരേഷ് ഗോപി, മനോജ് കെ ജയന്‍ , വിജയരാഘവന്‍, നവ്യ നായര്‍ എന്നിവരെ കേന്ദ്ര താരങ്ങളാക്കി കാവ്യം എന്ന സിനിമ അനീഷ് വര്‍മ്മ സംവിധാനം ചെയ്യുന്നത്. 23 ദിവസം കൊണ്ട് ചിത്രീകരണം പൂര്‍ത്തിയാക്കി, ഏകദേശം ഒരു കോടി രൂപയാണ് ചിത്രത്തിന്റെ മുടക്കുമുതലായി വകയിരുത്തിയത്. സിനിമയില്‍ അഭിനയിക്കാന്‍ വേണ്ടി സുരേഷ് ഗോപിക്ക് നിശ്ചയിച്ചിരുന്ന പ്രതിഫലം 30 ലക്ഷം രൂപയായിരുന്നു. കരാര്‍ പ്രകാരം ചിത്രീകരണം പൂര്‍ത്തിയാക്കിയതോടെ അദ്ദേഹത്തിന് 20 ലക്ഷം രൂപ കൊടുത്തുവെന്ന് അനീഷ് പറയുന്നു.
എന്നാല്‍ ഇതിന് ശേഷം സാമ്പത്തിക ബുദ്ധിമുട്ടുകളെ തുടര്‍ന്ന് താരത്തിന് മുഴുവന്‍ പണവും കൊടുക്കാന്‍ കഴിയാത്ത വിധത്തിലായി. ബാക്കിയുള്ള പത്തുലക്ഷം നല്‍കിയാലേ താന്‍ ഡബ്ബ് ചെയ്യുകയുള്ളൂവെന്ന് സുരേഷ്‌ഗോപി അറിയിക്കുകയയിരുന്നു. ഇതിനിടെ ബാക്കിയുള്ള താരങ്ങള്‍ ഡബ്ബിങ് നടപടികള്‍ പൂര്‍ത്തിയാക്കിയെങ്കിലും പണം കിട്ടാത്തതിനാല്‍ സുരേഷ് ഗോപി അതിന് വിസമ്മതിക്കുകയായിരുന്നു. സാമ്പത്തിക ബുദ്ധിമുട്ടുള്ള കാര്യം ചൂണ്ടിക്കാട്ടി താരത്തെ സമീപിച്ചെങ്കിലും വിട്ടുവീഴ്ച്ചക്ക് അദ്ദേഹം തയ്യാറായില്ലെന്നുമാണ് അനീഷിന്റെ ആരോപണം.
ഒടുവില്‍ രണ്ട് വര്‍ഷം കഴിഞ്ഞ് പത്തുലക്ഷം നല്‍കാന്‍ തയാറായി സുരേഷ്‌ഗോപിയെ സമീപിച്ചു. എന്നാല്‍ തന്റെ ശമ്പളം കൂടിയെന്നും പത്തുലക്ഷത്തിന് പകരം എഴുപതു ലക്ഷം രൂപ തന്നാല്‍ മാത്രമേ താന്‍ ഡബ്ബ് ചെയ്യുകയുള്ളൂവെന്നുമാണ് അപ്പോള്‍ സുരേഷ് ഗോപി സ്വീകരിച്ച നിലപാട്. ഇതോടെ സിനിമ പൂര്‍ത്തീകരിക്കാന്‍ സാധിക്കാത്ത അവസ്ഥ വരികയും ചെയ്തു.
ഒരു സിനിമ എടുക്കാനുള്ള ആഗ്രഹം കാരണം താനിപ്പോള്‍ കടക്കെണിയില്‍ ആണെന്നാണ് അനീഷ് പറയുന്നത്. ഒന്നരകോടിയോളം രൂപ കടംകയറിയിട്ടുണ്ട്. അതുകൊണ്ടാണ് ഇപ്പോള്‍ താന്‍ മാദ്ധ്യമങ്ങളെ സമീപിച്ചതെന്നും അദ്ദേഹം പറഞ്ഞു. സുരേഷ് ഗോപി എന്ന വ്യക്തിയോട് എനിക്ക് യാതൊരു വിരോധവുമില്ല. സിനിമയുടെ ചിത്രീകരണസമയത്തൊക്കെ യാതാരു ബുദ്ധിമുട്ടുമില്ലാതെ സഹകരിച്ച ആളാണ്. എന്നാല്‍ പ്രതിഫലത്തിന്റെ കാര്യത്തില്‍ ഇത്രയും കടുപിടുത്തം വേണമോ എന്നാണ് അനീഷിന്റെ ചോദ്യം. ഇപ്പോഴും അദ്ദേഹവുമായി ബന്ധപ്പെടാന്‍ ശ്രമിക്കാറുണ്ടെങ്കിലും പലപ്പോഴും സാധിച്ചിട്ടില്ല.
സിനിമയെ കുറിച്ച് അറിയിച്ചപ്പോള്‍ ഡബ്ബ് ചെയ്യാന്‍ എഴുപതു ലക്ഷം രൂപ വേണമെന്ന പഴയ നിലപാട് തന്നെ അദ്ദേഹം സ്വീകരിച്ചതോടെ കാര്യങ്ങള്‍ വീണ്ടും കുഴപ്പത്തിലായെന്നാണ് അനീഷ് പറയുന്നത്. ഇങ്ങനെയുള്ള ഒരാള്‍ എന്‍എഫ്ഡിസിയുടെ ചെയര്‍മാന്‍ സ്ഥാനത്തിരുന്നാല്‍ എങ്ങനെ ഇന്ത്യന്‍ സിനിമയെ എങ്ങനെ രക്ഷപ്പെടുമെന്ന ചോദ്യവും അനീഷ് വര്‍മ്മ ഉന്നയിക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha