നടന്‍ അനില്‍ നെടുമങ്ങാടിന്റെ അപ്രതീക്ഷിത വിയോഗം മലയാള സിനിമാലോകത്ത് വന്‍നടുക്കം ആണ് സൃഷ്ടിച്ചത്. പ്രിയ സുഹൃത്തിന്റെ വിയോഗത്തിന്റെ വേദന സുഹൃത്തുക്കള്‍ മറച്ചുവച്ചില്ല. തന്റെ ഏറ്റവുമടുത്ത സുഹൃത്താക്കളില്‍ ഒരാളായ സച്ചിക്ക് പിന്നാലെ തനിക്ക് ഏറെ പ്രിയപ്പെട്ട നടനായ അനില്‍ നെടുമങ്ങാടും വേര്‍പിരിഞ്ഞതിലുള്ള അഗാധമായ ദുഃഖം പങ്കുവച്ചിരിക്കുകയാണ് നടന്‍ പ്രിഥ്വിരാജ്. 'ഇപ്പോള്‍ കമ്പനി ആയല്ലോ, നിങ്ങള്‍ ഒരുമിച്ചിരുന്ന് ഒരു ഡ്രിങ്ക് കഴിക്കുന്നു എന്ന് വിചാരിക്കട്ടെ... ചിയേര്‍ാറ. ഒന്നുമില്ല. എനിക്ക് ഒന്നും പറയാനില്ല. നിങ്ങള്‍ ശാന്തി നേടിയെന്ന് കരുതുന്നു അനിലേട്ടാ...' എന്നായിരുന്നു പൃഥ്വിയുടെ വാക്കുകള്‍. സച്ചിയുടെ ജന്മദിനത്തില്‍ തന്നെയാണ് അനിലും യാത്ര പറഞ്ഞു പോയിരിക്കുന്നതെന്നത് ഓര്‍മിപ്പിച്ചുകൊണ്ടുള്ള ഒരു കുറിപ്പും പൃഥ്വി തന്റെ ഫേസ്ബുക്ക് പോസ്ടിനോപ്പം നല്‍കിയിട്ടുണ്ട്.

അനില്‍ നെടുമങ്ങാടിന്റെ വിയോഗവാര്‍ത്ത വിശ്വസിക്കാനാവുന്നില്ലെന്ന് നടന്‍ ബിജു മേനോന്‍ ഫേസ്ബുക്കില്‍ കുറിച്ചു. ''അനില്‍ ... ഇനി ഇല്ല എന്നെങ്ങിനെ ഞാന്‍ എന്നെ തന്നെ വിശ്വസിപ്പിക്കും ..?'' അനിലിന്റെ മരണവാര്‍ത്ത പുറത്തു വന്നതിന് പിന്നാലെ ബിജു മേനോന്‍ ഫേസ്ബുക്കില്‍ കുറിച്ചു.

ഇന്നലെ വൈകുന്നേരമാണ് അനില്‍ നെടുമങ്ങാടിന്റെ മരണവാര്‍ത്ത പുറത്ത് വന്നത്. കുളിക്കാനിറങ്ങുന്നതിനിടെ മലങ്കാര ജലാശയത്തിലെ കയത്തില്‍ മുങ്ങിപ്പോയ നടന്‍ അനില്‍ നെടുമങ്ങാടിനെ ജീവനോടെയാണ് പുറത്തെടുത്തതെന്ന് സംഭവസമയത്ത് ഒപ്പമുണ്ടായിരുന്ന സുഹൃത്തുക്കള്‍ പറഞ്ഞു. എന്നാല്‍ ആശുപത്രിയിലെത്തിക്കും മുന്‍പ് മരണം സംഭവിക്കുകയായിരുന്നുവെന്നും ഒപ്പമുണ്ടായിരുന്ന സുഹൃത്ത് പാലാ സ്വദേശി അരുണ്‍ രാജ് മാദ്ധ്യമങ്ങളോട് പറഞ്ഞു.

ക്രിസ്മസ് ദിനത്തില്‍ വൈകിട്ട് അഞ്ച് മണിയോടെ സുഹൃത്തുകള്‍ക്കൊപ്പം ജലാശയത്തില്‍ കുളിക്കാനിറങ്ങിയ അനില്‍ ആഴമേറിയ കയത്തില്‍ മുങ്ങിത്താഴുകയായിരുന്നു. സുഹൃത്തുക്കള്‍ സമീപവാസികളെ അറിയിക്കുകയും പ്രദേശവാസിയായ യുവാവ് മിനിട്ടുകള്‍ക്കകം എത്തി അനിലിനെ കരയ്‌ക്കെത്തിക്കുകയും ചെയ്തു. ആംബുലന്‍സിലേക്ക് കയറ്റുമ്പോള്‍ അനിലിന് ജീവനുണ്ടായിരുന്നു. ഡാം സൈറ്റില്‍ നിന്നും അനിലിനെ തൊടുപുഴയിലെ സ്വകാര്യ ആശുപത്രിയിലെത്തിച്ചെങ്കിലും അതിനോടകം മരണം സംഭവിച്ചിരുന്നു. മരിച്ച നിലയിലാണ് അനിലിനെ ആശുപത്രിയില്‍ എത്തിച്ചതെന്ന് ഡോക്ടര്‍മാര്‍ പറയുന്നത്.

ജോജു ജോര്‍ജ് നായകനായ പീസ് എന്ന ചിത്രത്തില്‍ അഭിനയിക്കാനായാണ് അനില്‍ തൊടുപുഴയില്‍ എത്തിയത്. ക്രിസ്മസ് പ്രമാണിച്ച് ഇവിടേക്ക് പാലായില്‍ നിന്നും അരുണും മറ്റൊരു സുഹൃത്തും കൂടി എത്തുകയായിരുന്നു. തുടര്‍ന്നാണ് ഷൂട്ടിംഗ് ലൊക്കേഷന് അടുത്തുള്ള ഡാം സൈറ്റിലെത്തി ഇവര്‍ കുളിക്കാനിറങ്ങി. നീന്തല്‍ അറിയാവുന്ന ആളായിരുന്നു അനിലെന്ന് അരുണ്‍ പറയുന്നു.


സച്ചിയുടെ ജന്മദിനമായ ഇന്നലെയാണ് അനില്‍ മരണമടഞ്ഞത്. അദ്ദേഹത്തിന്റെ പേരില്‍ ബാനര്‍ അനൗണ്‍സ് ചെയ്തു കൊണ്ടാണ് സുഹൃത്തുക്കള്‍ അദ്ദേഹത്തെ ഓര്‍മ്മിച്ചത്.

സച്ചി ക്രിയേഷന്‍സ് എന്ന പേരിലുളള പുതിയ ബാനര്‍ തുടങ്ങുന്ന കാര്യം മമ്മൂട്ടിയും പൃഥ്വിരാജും ദിലീപും ബിജുമേനോനും അടക്കമുളള താരനിരയാണ് ഫേസ്ബുക്കിലൂടെ പങ്കുവച്ചിരിക്കുന്നത്. സച്ചിയുടെ ഒരുപാട് ആഗ്രഹങ്ങളില്‍ ഒന്നായിരുന്നു സ്വന്തമായി ഒരു സിനിമ നിര്‍മ്മിക്കണമെന്നത്. അതിനുളള ശ്രമങ്ങളും ആരംഭിച്ചിരുന്നു. നിര്‍ഭാഗ്യവശാല്‍ ഇന്ന് സച്ചി നമ്മോടൊപ്പം ഇല്ല അദ്ദേഹത്തിന്റെ ഓര്‍മ്മ നിലനിര്‍ത്തുന്നതിനും, ആഗ്രഹപൂര്‍ത്തീകരണത്തിനും വേണ്ടിയാണ് സച്ചി ക്രിയേഷന്‍സ് എന്ന ബാനര്‍ എന്നാണ് താരങ്ങള്‍ ഫേസ്ബുക്ക് പോസ്റ്റില്‍ വ്യക്തമാക്കിയിരിക്കുന്നത്. സച്ചിയുടെ ഫോട്ടോ പങ്കുവച്ച് മരിക്കുവോളം കൂടെയുണ്ടാകും എന്നാണ് അനില്‍ പറഞ്ഞത്. അത് ശരിക്കും അറംപറ്റിയല്ലോയെന്നാണ് എല്ലാവരും ഓര്‍ക്കുന്നത്.