അരുവിക്കരയില്‍ ജൂണ്‍ 27ന് ഉപതിരഞ്ഞെടുപ്പു പ്രഖ്യാപിച്ചതോടെ കേരളം അരുവിക്കരയിലേക്ക് ചുരുങ്ങുന്നു. സ്പീക്കറായിരിക്കെ അന്തരിച്ച ജി. കാര്‍ത്തികേയന്റെ തട്ടകത്തില്‍ നടക്കുന്ന ഉപതിരഞ്ഞെടുപ്പ് കേരള രാഷ്ടീയത്തിലെ നിര്‍ണായകമായ വഴിത്തിരവാകും ഉണ്ടാക്കുക. കാര്‍ത്തികേയന്റെ സിറ്റിങ് സീറ്റ് നിലനിര്‍ത്തുക കോണ്‍ഗ്രസിനും യുഡിഎഫിനും അഭിമാനപ്രശ്‌നമാണ്. വിജയിച്ചാല്‍ യുഡിഎഫും സര്‍ക്കാരും അകപ്പെട്ടിരിക്കുന്ന വിവാദങ്ങളില്‍ നിന്നുള്ള ഉയര്‍ത്തെഴുന്നേല്‍പ്പാവും അത്. തുടര്‍ച്ചയായ തിരഞ്ഞെടുപ്പു പരാജയങ്ങള്‍ സംസ്ഥാന രാഷ്ട്രീയത്തില്‍ തങ്ങളെ പിന്നോട്ടടിച്ചിട്ടില്ലെന്നു തെളിയിക്കാന്‍ എല്‍ഡിഎഫിനും വിജയം കൂടിയേതീരൂ. തദ്ദേശ, നിയമസഭാ തിരഞ്ഞെടുപ്പുകള്‍ക്ക് ആമുഖമാകുന്ന നിര്‍ണായക ജനവിധി എന്ന പ്രത്യേകതയും അരുവിക്കരയ്ക്കുണ്ടാകും.
മുന്‍ സംസ്ഥാന സെക്രട്ടറി പിണറായി വിജയനാകും എല്‍ഡിഎഫ് പ്രചാരണത്തിന്റെ അമരത്ത്. കെപിസിസി പ്രസിഡന്റ് വി.എം. സുധീരന്‍ കോണ്‍ഗ്രസിനു വേണ്ടി നേരിട്ടു മേല്‍നോട്ടം വഹിക്കും.
ബാര്‍ കോഴ ആരോപണവും അന്വേഷണവും അനുബന്ധ വിവാദങ്ങളും യുഡിഎഫ് രാഷ്ട്രീയത്തെ കലക്കിമറിക്കുന്നതിനിടെയാണു ഉപതിരഞ്ഞെടുപ്പ് പ്രഖ്യാപിച്ചത്. ഇരുമുന്നണി ഈ വലിയ വെല്ലുവിളിയാണ് നേരിടുന്നത്. പ്രതിപക്ഷ നേതാവ് വി.എസ്. അച്യുതാനന്ദനുമായി ഇടഞ്ഞു നില്‍ക്കുന്ന സിപിഎമ്മും ബാര്‍കോഴ വിവാദങ്ങളില്‍ ഉഴലുന്ന യുഡിഎഫും ഉപതിരഞ്ഞെടുപ്പിനെ എങ്ങനെ നേരിടുമെന്ന് കണ്ടറിയണം.
ഉപതിരഞ്ഞെടുപ്പില്‍ സിപിമ്മിനുവേണ്ടി സംസ്ഥാന കമ്മിറ്റിയംഗം എം വിജയകുമാര്‍ തന്നെ മത്സരിക്കുമെന്ന് ഏതാണ്ട് ഉറപ്പായിട്ടുണ്ട്. ഇന്ന് പിണറായി വിജയന്റെ സാന്നിധ്യത്തില്‍ കൂടുന്ന സിപിഎം തിരുവനന്തപുരം ജില്ലാകമ്മിറ്റി യോഗം വിജയകുമാറിനെ സ്ഥാനാര്‍ഥിയായി പ്രഖ്യാപിക്കും. എന്നാല്‍ യുഡിഎഫില്‍ സീറ്റിനുവേണ്ടി വടം വലിയാണ് നടക്കുന്നത്. കാലാകാലങ്ങളായി ആര്‍എസ്പിയാണ് ഇവിടെ മത്സരിക്കുന്നത്. ആര്‍എസ്പി ഇപ്പോള്‍ യുഡിഎഫിലുള്ളത് കൊണ്ട് അവര്‍ സീറ്റിനായി അവകാശവാദമുന്നയിക്കാനും സാധ്യതയുണ്ട്. കോണ്‍ഗ്രസ് കാര്‍ത്തികേയന്റെ ഭാര്യ ഡോ.എം.ടി. സുലേഖ തന്നെ സ്ഥാനാര്‍ഥിയാകണം എന്ന താല്‍പര്യത്തിലാണ്. മുഖ്യമന്ത്രി ഉമ്മന്‍ ചാണ്ടി, വി.എം. സുധീരന്‍, മന്ത്രി രമേശ് ചെന്നിത്തല എന്നിവര്‍ അദ്ദേഹത്തിന്റെ കുടുംബത്തെ ഇത് അറിയിച്ചുകഴിഞ്ഞു. സുലേഖ സന്നദ്ധത അറിയിച്ചിട്ടില്ലെങ്കിലും അതിനു തയാറാകുമെന്ന പ്രതീക്ഷ നേതൃത്വത്തിനുണ്ട്. എന്നാല്‍ കോണ്‍ഗ്രസിനുള്ളില്‍ നിന്ന് തന്നെ സീറ്റിനായി വടംവലി ആരംഭിച്ചിട്ടുണ്ട്.
കാര്‍ത്തികേയന്റെ മക്കളിലാരെങ്കിലും മല്‍സരിക്കാനുള്ള സാധ്യതയും തള്ളിക്കളയാനാവില്ല. കോഴിക്കോട്ട് രാഹുല്‍ഗാന്ധി പങ്കെടുക്കുന്ന സമ്മേളനത്തിരക്കിലായ കോണ്‍ഗ്രസ് നേതൃത്വം ഉടന്‍ സുലേഖയുമായി വീണ്ടും സംസാരിക്കും. ദേശീയതലത്തില്‍ കോണ്‍ഗ്രസിന്റെ തിരിച്ചുവരവിന്റെ സൂചന കേരളം സമ്മാനിക്കണം എന്ന ആഗ്രഹം എ.കെ. ആന്റണി അടക്കമുള്ള നേതാക്കള്‍ക്കുണ്ട്.
സിപിഎം സംസ്ഥാന കമ്മിറ്റി അംഗവും മുന്‍ മന്ത്രിയുമായ എം. വിജയകുമാര്‍, സിഐടിയു ജില്ലാ സെക്രട്ടറിയും സിപിഎം ജില്ലാ സെക്രട്ടേറിയറ്റ് അംഗവുമായ വി.കെ. മധു എന്നിവരിലൊരാള്‍ എല്‍ഡിഎഫ് സ്ഥാനാര്‍ഥിയാകാനാണു കൂടുതല്‍ സാധ്യത. സുലേഖയെ മല്‍സരരംഗത്ത് ഇറക്കിയാല്‍ ബദല്‍ വനിതാ സ്ഥാനാര്‍ഥി എന്ന ആശയവും എല്‍ഡിഎഫ് പരിഗണിക്കുന്നു. ഈ പശ്ചാത്തലത്തില്‍ ദേശീയ നിര്‍വാഹക സമിതി അംഗം ശോഭാ സുരേന്ദ്രന്റെ പേര് ബിജെപിയും ആലോചിക്കുന്നുണ്ട്.
ഏതാനും ദിവസം മുന്‍പു തലസ്ഥാനത്തെത്തിയ ബിജെപി ദേശീയ അധ്യക്ഷന്‍ അമിത് ഷാ അരുവിക്കരയില്‍ മിന്നുന്ന പ്രകടനം ഉണ്ടാകണമെന്നു നിഷ്‌കര്‍ഷിച്ചാണു മടങ്ങിയത്. രാഷ്ട്രീയമായി രണ്ടു മുന്നണികള്‍ക്കും നല്ല സ്വാധീനമുള്ള പ്രദേശമാണ് അരുവിക്കര. നിയമസഭാ സമ്മേളനം നടക്കുന്ന ഘട്ടത്തിലായിരിക്കും തിരഞ്ഞെടുപ്പു പ്രചാരണം എന്നതിനാല്‍ സഭ പിരിഞ്ഞാല്‍ നേതാക്കള്‍ കൂട്ടത്തോടെ അരുവിക്കരയിലാകും.
ഉപ തിരഞ്ഞെടുപ്പുമായി ബന്ധപ്പെട്ട് എല്‍ഡിഎഫ് നേതൃയോഗം ഈമാസം 31നു ചേരും. മേഖലാ ജാഥ കഴിഞ്ഞ ശേഷം യുഡിഎഫ് നേതൃയോഗം വിളിക്കാനായിരുന്നു മുന്‍ ധാരണ എങ്കിലും അതു നേരത്തേയാകാനും സാധ്യതയുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha