ഇന്ന് നടക്കുന്ന പഞ്ചായത്ത് അധ്യക്ഷ തെരഞ്ഞെടുപ്പില്‍ ചെന്നിത്തല തൃപ്പെരുംതുറ പഞ്ചായത്തില്‍ എല്‍ഡിഎഫിന് നിരുപാധിക പിന്തുണ നല്‍കാന്‍ യുഡിഎഫ് പാര്‍ലമെന്ററി പാര്‍ട്ടി യോഗം തീരുമാനിച്ചത് ഹൈക്കമാന്റ് നിര്‍ദ്ദേശ പ്രകാരമാണെന്ന് സൂചന

ബി ജെ പിയെ അകറ്റി നിര്‍ത്താനാണെന്ന വ്യാജേന നടത്തിയ വഴിവിട്ട ബാന്ധവം ഭാവിയില്‍ കേരള നിയമസഭയിലും പുതിയ ബന്ധങ്ങള്‍ക്ക് വഴി തുറക്കും.

കഴിഞ്ഞ ദിവസം തലസ്ഥാനത്തെത്തിയ ഹൈക്കമാന്റ് പ്രതിനിധി താരിഖ് അന്‍വറില്‍ നിന്ന് അനുവാദം വാങ്ങിയ ശേഷമാണ് ചെന്നിത്തലയും ഉമ്മന്‍ ചാണ്ടിയും ഇത്തരത്തില്‍ ഒരു നീക്കം നടത്തിയത്. ഇന്ത്യന്‍ സംസ്ഥാനങ്ങളില്‍ ബിജെപിയെ അകറ്റി നിര്‍ത്തുകയാണ് കോണ്‍ഗ്രസ് ലക്ഷ്യം. അതിന്റെ ഭാഗമായി ഇടതുമുന്നണിയുമായി സഖ്യം ഉണ്ടാക്കിയാലും തെറ്റില്ലെന്നാണ് ദേശീയ കോണ്‍ഗ്രസ് നേതൃത്വം കരുതുന്നത്.

സംസ്ഥാനത്ത് വലതു- ഇടതു മുന്നണികള്‍ തമ്മില്‍ ധാരണയിലാണ് പ്രവര്‍ത്തിക്കുന്നതെന്ന ബി ജെ പിയുടെ ആരോപണം ഇതോടെ സത്യമായിരിക്കുകയാണ്. ഏതു വിധേനയും ബിജെപിയെ അകറ്റി നിര്‍ക്കുക എന്നതാണ് ദേശീയ കോണ്‍ഗ്രസ് നേതൃത്വത്തിന്റെ ലക്ഷ്യം.

ബിജെപിയെ അധികാരത്തില്‍ നിന്നും അകറ്റുന്നതിന്റെ ഭാഗമാണ് തീരുമാനമെന്ന് ആലപ്പുഴ ഡി സി സി അറിയിച്ചു . വൈസ് പ്രസി. സ്ഥാനത്തേക്ക് ആരുടേയും പിന്തുണ തേടാതെ അഞ്ചാം വാര്‍ഡില്‍ യുഡിഎഫില്‍ നിന്ന് ജയിച്ച രവികുമാറിനെ മത്സരിപ്പിക്കാനും പാര്‍ട്ടി യോഗം തീരുമാനിച്ചു. പ്രസിഡന്റ് സ്ഥാനത്തേക്ക് വലത് പിന്തുണ ലഭിക്കുന്നതിനാല്‍ വൈസ് പ്രസിഡന്റ് സ്ഥാനത്തേക്ക് ഇടതു പിന്തുണ കിട്ടുമെന്ന് വലതുമുന്നണി പ്രതീക്ഷിക്കുന്നു.

ഡിസിസി പ്രസിഡന്റ് എം ലിജു, മാന്നാര്‍ അബ്ദുള്‍ ലത്തീഫ്, ജോണ്‍ കെ മാത്യൂ, സിരി സത്യദേവ്, എം ശ്രീകുമാര്‍, രാധേഷ് കണ്ണന്നൂര്‍ എന്നിവരാണ് ചര്‍ച്ചകള്‍ക്ക് നേതൃത്വം നല്‍കിയത്.

നിലവില്‍ യുഡിഎഫ്- ആറ്, എന്‍ഡിഎ- ആറ് , എല്‍ഡിഎഫ് - അഞ്ച്, സ്വതന്ത്രന്‍- ഒന്ന് എന്നിങ്ങനെയാണ് പഞ്ചായത്തിലെ കക്ഷിനില. പട്ടികജാതി വനിതാ സംവരണമാണ് പ്രസിഡന്റ് സ്ഥാനം. യുഡി എഫില്‍ നിന്ന് പട്ടികജാതി വനിതകള്‍ ആരും തന്നെ വിജയിച്ചില്ല. എല്‍ഡിഎഫിലും എന്‍ഡിഎയിലും പട്ടികജാതി വനിതകള്‍ വിജയിച്ചിട്ടുണ്ട്. ഈ സാഹചര്യത്തിലാണ് കോണ്‍ഗ്രസ് തീരുമാനം.

കോണ്‍ഗ്രസ് തീരുമാനത്തിന് മറ്റാരുടെയും സമ്മര്‍ദ്ദമില്ലെന്നാണ് കോണ്‍ഗ്രസ് ജില്ലാ നേതൃത്വത്തിന്റെ വിശദീകരണം. എന്നാലും ചെന്നിത്തല എന്ന പ്രതിപക്ഷ നേതാവിന്റെ മണ്ഡലത്തില്‍ തന്നെ ഇത് വേണമായിരുന്നോ എന്നാണ് ചില കോണ്‍ഗ്രസ് പ്രവര്‍ത്തകരുടെ ചോദ്യം. പ്രതിപക്ഷനേതാവിന്റെ പഞ്ചായത്തില്‍ ഇങ്ങനെ സംഭവിച്ചാല്‍ എന്തുചെയ്യുമെന്നാണ് ചോദ്യം. സി പി എമ്മിനെതിരെ സമരം ചെയ്യുന്നതിന്റെ ആവേശം പോലും ചേരുന്നതാണ് പുതിയ തീരുമാനം.

ബിജെപി ഇത് സംസ്ഥാനത്ത് ഉടനീളം പ്രചരിപ്പിക്കും. അതിന്റെ പ്രത്യാഘാതം ഭയങ്കരമായിരിക്കുമെന്ന കാര്യത്തില്‍ സംശയമില്ല. സംസ്ഥാനത്ത് ഇപ്പോള്‍ തന്നെ ബിജെപി വികാരം ആളികത്തുന്നുണ്ട്. അത് ആളികത്തിക്കാനുള്ള വഴി ബിജെ പി ഇതിനകം തുടങ്ങിയിട്ടുണ്ട്.

മുസ്ലീം ലീഗ് കോണ്‍ഗ്രസ് നേതൃത്വത്തിലേക്ക് എന്ന വാര്‍ത്ത കേരളമെമ്പാടും കോളിളക്കം ഉണ്ടാക്കുന്ന കാലത്താണ് പുതിയ തീരുമാനം ഉണ്ടായിരിക്കുന്നത്. ഇങ്ങനെയാണ് മുന്നോട്ടു പോകുന്നതെങ്കില്‍ കേരളം ഇടതുമുന്നണി ഭരിച്ചാല്‍ പോരേ എന്ന ചോദ്യവും ഉയരുന്നുണ്ട്.