പാര്ട്ടിയുമായി ആലോചിക്കാതെയാണ് പലപ്പോഴും നിലപാടുകള് പരസ്യപ്പെടുത്തുന്നത്; യു ഡി എഫ് കണ്വീനര് സ്ഥാനത്ത് നിന്നും എം.എം ഹസനെ നീക്കണമെന്ന് ആവശ്യപ്പെട്ട് കോണ്ഗ്രസ് ഹൈക്കമാന്റിന് പരാതികളുടെ പ്രവാഹം
യു.ഡി.എഫിന്റെ കെട്ടുറപ്പിനെ ബാധിക്കുന്ന തരത്തിലാണ് കണ്വീനര് എം.എം ഹസന്റെ പെരുമാറ്റമെന്നും സ്ഥാനത്ത് നിന്നും ഹസനെ നീക്കണമെന്നും ആവശ്യപ്പെട്ട് കോണ്ഗ്രസ് ഹൈക്കമാന്റിന് പരാതികളുടെ പ്രവാഹം. നിരവധി കോണ്ഗ്രസ് എം.എല്.എമാരും എം.പിമാരും കേരളത്തിന്റെ ചുമതലയുളള താരിഖ് അന്വറിനും എ.ഐ.സി.സി ജനറല് സെക്രട്ടറി കെ.സി വേണുഗോപാലിനോടും ഇതെപറ്റി പരാതി നല്കി. കുറച്ചുപേര് താരിഖ് അന്വറിനോട് നേരിട്ട് പരാതി പറഞ്ഞു. ഹസന് പലകാര്യങ്ങളെക്കുറിച്ചും യാതൊരു ധാരണയുമില്ലെന്നും കത്തിലെ പരാതിയില് പറയുന്നു.
തദ്ദേശ തിരഞ്ഞെടുപ്പില് നേരിട്ട കനത്ത തോല്വിയുടെ പശ്ചാത്തലത്തില് കോണ്ഗ്രസില് വ്യാപക അസ്വാരസ്യങ്ങളുണ്ടാകുന്നുണ്ട്. ഇതില് ഏറ്റവും പുതിയതാണ് ഹസനെതിരായ പരാതി. മാദ്ധ്യമങ്ങളെ ഒപ്പംകൂട്ടി വെല്ഫെയര് പാര്ട്ടി നേതാക്കളെ കണ്ടതും അവരുടെ പിന്തുണ സ്വീകരിച്ചെന്ന പ്രസ്താവനയും തിരഞ്ഞെടുപ്പില് കോണ്ഗ്രസിനും യു.ഡി.എഫിനും തിരിച്ചടിയായെന്നും നേതാക്കള് കത്തില് പറയുന്നു. പാര്ട്ടിയില് ആലോചിക്കാതെയാണ് പലപ്പോഴും ഹസന് നിലപാടുകള് പരസ്യപ്പെടുത്തിയതെന്നും കത്തിലുണ്ട്.
ഹസനെ കണ്വീനര് സ്ഥാനത്ത് നിര്ത്തി മുന്നോട്ട്പോയാല് അത് യു.ഡി.എഫിന്റെ കെട്ടുറപ്പിനെ ബാധിക്കുമെന്നും വരുന്ന നിയമസഭാ തിരഞ്ഞെടുപ്പില് കനത്ത തിരിച്ചടി ലഭിക്കുമെന്നും നേതാക്കള് അഭിപ്രായപ്പെടുന്നു. വെല്ഫെയര് പാര്ട്ടിയുമായി നീക്കുപോക്കുണ്ടാക്കിയെന്നും യു.ഡി.എഫ് അധികാരത്തിലെത്തിയാല് ലൈഫ് ഉള്പ്പടെ നാല് മിഷനുകളും പിരിച്ചുവിടുമെന്നും എം.എം ഹസന് നടത്തിയ പ്രസ്താവനകള് തിരഞ്ഞെടുപ്പ് വേളയില് കോണ്ഗ്രസിനെതിരെ ജനങ്ങളുടെ വന് അതൃപ്തിയ്ക്ക് ഇടയാക്കിയിരുന്നു.
https://www.facebook.com/Malayalivartha
